قاراقاش ناھىيەسىدە «مەرىپەت بېغىدا نورۇز» پائالىيىتى ئۆتكۈزۈلدى.

تۈرى : مەدەنىيەت يوللىغۇچى : ئابلەت نۇرمۇھاممەد ۋاقتى : 2016-03-22 13:56:07

تەكلىپلىك مۇخپىرىمىز غۇجىئابدۇللا مەمىتىمىن خەۋىرى ،فوتوسى :
3-ئاينىڭ 21-كۈنى،قاراقاش ناھىيەلىك 5-ئوتتۇرا مەكتىپىنىڭ تەنتەربىيە مەيدانى 15 مىڭدىن ئارتۇق ئوقۇتقۇچى-ئوقۇغۇچىلار.ئاتا-ئانىلار،پىشقەدەم كادىرلار،دىنىي زاتلار بىلەن قاينام-تاشقىنلىققا چۆمگەنىدى.بۇ يەردە قاراقاش ناھىيەسىنىڭ بۇ يىللىق نورۇز بايرىمىنى تەبرىكلەش پائالىيىتى بولغان «مەرىپەت بېغىدا نورۇز» داغدۇغىلىق ئۆتكۈزۈلدى.ئالدى بىلەن مەكتەپتىكى 3000 مىڭدىن ئارتۇق ئوقۇغۇچى چىرايلىق بايراملىق كىيىملىرىنى كىيىپ سىنىپ كوللىكتىپى بويىچە پاراتتىن ئۆتتى،ئۇلار ئايرۇپىلان،تانكا قاتارلىقلارنىڭ مودىللىرىنى ھەم نان قاتارلىق يەرلىك مەھسۇلاتلارنى كۆتۈرۈپ مەيداندىن ئۆتۈپ،«بىز ۋەتەننىڭ ياخشى بالىسى» دېگەن ناخشىغا كوللىكتىپ ھالدا ئۇسسۇل ئويناپ ، ئۆزلىرىنىڭ جۇشقۇن روھى كەيپىياتىنى ئىپادىلەپ،نورۇز بايرىمىنى تەبرىكلىدى.مىللىيچە چېلىشىش،خوراز چوقۇشتۇرۇش،قوچقار ئۈسۈشتۈرۈش،شار دەسسەش قاتارلىق ئاممىۋى تەنتەربىيە پائالىيەتلىرى نورۇز كەيپىياتىنى يۇقىرى پەللىگە كۆتۈردى. كۆپچىلىك بىرلىكتە نورۇز ئېشىغا ئېغىز تەگدى.ئوقۇغۇچىلار مېھمانلارغا دوپپا تەقدىم قىلدى. ئەدەبىيات-سەنئەت پائالىيىتىدە ئوقۇتقۇچى-ئوقۇغۇچىلار ئۆزلىرى تەييارلىغان سەر خىل ناخشا-ئۇسسۇل،مۇزىكا،ئېتوت نومۇرلىرىنى يۇقىرى سەۋىيەدە ئورۇنداپ ،نورۇز ئەھلىگە ئېستېتىك زوق بېغىشلىدى.ئاخىرىدا كۆپچىلىك بىرلىكتە مەشرەپ ئويناپ،نورۇز بايرىمىغا تەنتەنە قىلدى.