يوللانغان ۋاقتى : 2008-11-02 10:35:26    كۆرۈلۈش سانى : 57  

قەدىمدىن بۇيان ئۆي ھايۋانلىرى تەبىئىي چېتىشىش ئارقىلىق، «ئون ئاي قورساق كۆتۈرۈپ» ئەۋلاد قالدۇرىدۇ. بۇ خىل شەكىل مۇقىم، ئىشەنچلىك بولسىمۇ، بىراق بىرقەدەر ئاستا بولىدۇ. ھازىر «تۆرەلمە كۆچۈرۈش» يېڭى تېخنىكىسى قوللىنىلىپ، ئەنئەنىۋى ئۆي ھايۋانلىرىنى كۆپەيتىش ئادىتى ئۆزگەرتىلدى. ئۆي ھايۋانلىرىنىڭ تۆرەلمىسىنى كۆچۈرۈشتە ئەلا نەسىللىك ئانا چارۋا (تەمىنلىگۈچى تەن)نىڭ تۇخۇم چىقىرىش نەيچىسى ياكى بالىياتقۇسىدىن دەسلەپكى مەزگىلدىكى تۆرەلمە ئېلىنىپ، يەنە بىر ئادەتتىكى ئانا چارۋا (قوبۇل قىلغۇچى تەن)نىڭ تۇخۇم چىقىرىش نەيچىسى ياكى بالىياتقۇسىغا سېلىنىپ، «باشقىلار ئۈچۈن قورساق كۆتۈرگۈزۈلىدۇ»، ئادەتتىكى ئانا چارۋا «ھامىلىدار بولۇش» مەسئۇلىيىتىنى ۋەكالىتەن ئۆتەيدۇ. بۇنىڭ بىلەن ئەلا نەسىللىك ئۆي ھايۋانلىرىنى تېخىمۇ كۆپ كۆپىيىش پۇرسىتىگە ئىگە قىلغىلى بولىدۇ. بۇ خىل يېڭى تېخنىكا ئىرسىيەت ئىلمى قائىدىسىگە ئۇيغۇن كېلىدۇ. جانلىقلارنىڭ ئىرسىي خۇسۇسىيىتى ئۇرۇقلانغان تۇخۇمنىڭ ساپاسىغا باغلىق بولىدۇ. ئۇرۇقلانغان تۇخۇم ئاتىنىڭ ئىسپېرمىسى بىلەن ئانىنىڭ تۇخۇمى ئۇچراشقان دەقىقە ۋاقىت ئىچىدە بەلگىلىنىدۇ. خۇددى ئۇرۇقلانغان بىر ئاق قۇ تۇخۇمىغا ئوخشاش مەيلى ئۇنى مېكىيان باسسۇن ياكى چىشى ئۆردەك باسسۇن، ئۇنىڭدىن ئوخشاشلا ئاق قۇ چۈجىسى چىقىدۇ، باشقا قورساقتا بولغاندىمۇ ئوخشاشلا بالا چارۋىنىڭ ئىرسىي ساپاسىنى ساقلاپ قالىدۇ. بىئولوگىيە پېنىنىڭ تەرەققىياتىغا ئەگىشىپ تۆرەلمە كۆچۈرۈش تېخنىكىسىدا يەنە ئىنتايىن زور تەرەققىيات بولدى. نورمال ساندىن ئاشۇرۇپ تۇخۇم چىقىرىش، سۈنئىي ئۇرۇقلاندۇرۇش، تۆرەلمىنى زىيادە تۆۋەن تېمپېراتۇرىدا توڭلىتىپ ساقلاش قاتارلىقلارنىڭ ھەممىسى ئۈنۈمنى ئۆستۈرۈش، كۆپىيىش كوئېففىتسېنتىنى ئاشۇرۇش يۆنىلىشىگە قاراپ تاشلانغان مۇھىم يېڭى قەدەم. ئۆي ھايۋانلىرىنىڭ تۆرەلمىسىنى كۆچۈرۈش تەدرىجىي قېلىپلىشىش ۋە تاۋارلىشىشقا قاراپ يۈزلىنىپ، ئەلا نەسىللىك چارۋىلارنىڭ نەسىلىنى ئادەتتىكى ئۆي چارۋىلىرىنىڭ بالىياتقۇسىدىن پايدىلىنىپ تېز كۆپەيتىش كەڭ ئومۇملاشتى. بۇ چارۋىچىلىقنى تەرەققىي قىلدۇرۇش، ئىنسانلارنىڭ گۆش ئىستېمالى مەسىلىسىنى ھەل قىلىشتىكى زور ئەھمىيەتكە ئىگە يېڭى ئىلگىرىلەش.