- شىنجاڭ ئۇيغۇر ئاپتونوم رايونى قۇرۇلغانلىقىنىڭ 60 يىللىقىغا بېغىشلايمەن
يالقۇن ئۆمەر
گۈزەل شىنجاڭ، گۈل ماكان مۇبارەك قۇت كۈنۈڭگە،
يەتتى ساما – پەلەككە بەزمە – مەشرەپ ناۋاسى.
مەزمۇن بېرىپ ئۆزگىچە ھەر بىر ناھار – تۈنۈڭگە،
قىزىپ كەتتى ئاۋامنىڭ جۇشقۇن ئۇسسۇل – ساماسى.
ئامەت سۆيگەن بىغۇبار ئاسايىشلىق چاغلىرىڭ
دىلىمىزنى ھەر بارە ئىزگۈلۈككە يار قىلدى.
جەننەت كەبى جەزبىدار كۆركەم دەريا – تاغلىرىڭ
جىسمىمىزدا ئىپتىخار، ئىشتىياقنى بار قىلدى.
باغلىرىڭدىن ئۇچقان شوخ سابا يەلپۈپ يۈزلەرنى
كەيپىمىزنى زوق ئارا بۇلبۇللارغا جور قىلدى.
خىرامانلىق دەقىقەڭ نۇرلاندۇرۇپ كۆزلەرنى،
ئەل – ئاۋامنى بەختىيار تۇيغۇ ئارا ھۆر قىلدى.
ئاتمىش يىللىق مۇساپەڭ شان – زەپەرگە ئورۇلۇپ،
ھۆسن تۈزەپ، رەڭ تۈزەپ بولۇپ كەتتىڭ بەكمۇ ئۇز.
پاراسەتنىڭ بەھرىدە غەم – غۇسسىلەر چۆرۈلۈپ
جەزبىدار شۇ سىياقىڭ كۆركەملىكتە بولدى توز.
ئانا دىيار، گۈل دىيار زوق – شوق ئارا ئەل ئاۋام،
جەزبىدار شۇ ئەتەڭدىن ئۈمىدلەرنى كۈتىدۇ.
ئېسىل ئادەت – ئەنئەنە خىسلىتىنى قىپ داۋام،
شۆھرىتىڭنى ئاسمانچە ئېگىز قىلىپ ئۆتىدۇ.
ئەسلى مەنبە: http://uy.ts.cn/wenxue/content/2015-10/12/content_459928.htm