كوچا بانكىسى

ئەنۋەر قۇتلۇق نەزەرى

ئۇچراپ تۇرار دىققەتلا قىلساق،

رەستىلەردە كوچا بانكىسى.

خىزمەتچىسى يىللاپ بىر ئادەم،

يوق ئۇنىڭكى ھېچبىر فورمىسى!

بىخەتەر ئىشكاپ ئەسلا كۆرۈنمەس،

يىللاپ ئوچۇق بۇ كۆچمە بانكا.

ئۆسۈمىگە ساۋاب بۇيرۇقلۇق،

نەقلەشمەيدۇ ئۇ ھېچقاچاندا.

يا بولمايدۇ پۇلنىڭ تالونى،

سۈرۈشتۈرۈش مەڭگۈ بىھاجەت.

دۇئا قىلىپ قويار خۇشياقسا،

ساڭا ئۈنلۈك ئامانلىق تىلەپ!

ئىچ ئاغرىتىش ياكى سەسكىنىش،

يا باشقىچە بىر خىل ھېسسىيات...

ھەر ئۇچراتساڭ قىينايدۇ سېنى،

‹‹شۈكرى! ››دەيسەن، ‹‹بانكىر››غا قاراپ.

پارچە پۇللار تاشلاپ مېڭىشار،

بۇ بانكىغا ئۆتكەن – كەچكەنلەر.

كەچتى مەندە مۇنداق بىر سوئال:

يېتىشتۈرۈپ ھارامتاماقنى

نېمە قىلار بۇندا ئادەملەر؟!...

ئەسلى مەنبە: http://uy.ts.cn/wenxue/content/2015-10/19/content_461260.htm