جۇڭگو يەر تەۋرەشنى ئۆلچەش پونكىتى تورىنىڭ خەۋىرىگە قارىغاندا، 8-ئاينىڭ 17-كۈنى سەھەر سائەت 6 دىن 7 مىنۇت ئۆتكەندە، يۈننەن ئۆلكىسى جاۋتۇڭ شەھىرى يۇڭشەن ناھىيىسىدە 5.0 بال يەر تەۋرىگەن بولۇپ، يەر تەۋرەش مەنبەسىنىڭ چوڭقۇرلۇقى 7000 مېتىرغا يەتكەنىكەن. ئىگەللىنىلىشىچە، بۇ قېتىملىق يەر تەۋرەشتە يۇڭشەن ناھىيە بازىرىدا ناھايىتى كۈچلۈك بولغان تەۋرىنىشنى ھېس قىلغىلى بولغان.
يۇڭشەن ناھىيە بازىرىدا ئولتۇرۇشلۇق ئاھالىلەرنىڭ ئېيتىشىغا قارىغاندا، يەر تەۋرەش يۈز بەرگەن چاغدا ناھىيە بازىرىدا ناھايىتى كۈچلۈك بولغان تەۋرىنىش سېزىلگەن بولۇپ، لېكىن تەۋرىنىش ۋاقتى ناھايىتى قىسقا بولغان، شۇنداقلا تەۋرىنىش جەريانىدا ئۆيلەردىكى ئۇششاق-چۈششەك نەرسىلەرنىڭ يەرگە ئۆرۈلۈپ چۈشۈپ كېتىش ئەھۋالى كۆرۈلگەن
. بەزى كىشىلەرنىڭ مۇخبىرغا ئېيتىپ بېرىشىچە، يەر تەۋرەش يۈز بەرگەندىن كېيىن، ئۇلار دەرھال ئۆيلىرىدىن كوچىلارغا شۇنداقلا كەڭتاشا ئوچۇقچىلىق جايلارغا يۈگۈرۈپ چىقىۋالغان.
مۇخبىرنىڭ يۇڭشەن ناھىيىلىك تەشۋىقات بۆلۈمىدىن ئەھۋال ئىگەللىشىچە، نۆۋەتتە بۇ قېتىملىق يەر تەۋرەش ئاپىتىگە ئالاقىدار ئەھۋاللار تېخىمۇ ئىچكىرىلىگەن ھالدا تەكشۈرۈلمەكتە.