ھايۋانلار بىلەن سىردىشىدىغان بالىنى ئاڭلىغانمىتىڭىز؟ بىرازىلىيەنىڭ بىر كەنتىدە بالىلارغا ئارىلاشمايدىغان، ھايۋانلار بىلەن بىللە ئۆتۈشنى ياخشى كۆرۈدىغان بىر بالا بولۇپ، ئۇ كۈن بويى ئائىلىسىدىكى كالا، قوي، ئىت مۈشۈكلەر بىلەن بىللە ئوينايدىكەن. بۇ ھايۋانلارمۇ ئۇنىڭ تىلىنى ئۇقىدىغاندەك ئىش قىلىدىكەن.

بىر قېتىم بىر كىشى ھەسەل ھەرىسى كۆنىكىگە تېگىپ قويغانلىقتىن، ھەرىلەر ئۇنىڭغا ھۇجۇم قىلغان. ئائىلىسىدىكىلەر ھېلىقى بالىنى چاقىرىپ كەلگەندە، ئۇ بالا ھەسەل ھەرىلىرىنىڭ ئالدىغا كېلىپ، ھەرىدىن ئىككىنى تۇتۇپ ئالقىنىغا قويۇپ، بىر مەھەل سۆزلەشكەن، نەتىجىدە ئۇ ئىككى ھەسەل ھەرىسى قايتىپ بېرىپ باشقا ھەرىلەرنى باشلاپ كەتكەن. يەنە بىر قېتىم بىر سېرىك ئۆمىكى ئۇ بالا ئولتۇرۇشلۇق كەنتكە ۋەھشىي شىر سولانغان چوڭ تۆمۈر قەپەستىن بىرنى ئېلىپ كەلگەن، ئۇ بالا بۇنىڭدىن خەۋەر تاپقاندىن كېيىن، دەرھال يۈگۈرۈپ بېرىپ، تۆمۈر قەپەس ئىچىگە كىرىپ، شىر بىلەن سۆزلىشىشكە باشلىغان، شىر ئۇنى چىشلەش ئۇياقتا تۇرسۇن ئەكسىچە دوستانە ھالدا تىلىنى چىقىرىپ، بالىنىڭ يۈزىنى يالاشقا باشلىغان. بۇنى كۆرگەن كىشىلەر ھاڭ-تاڭ قالغان. يەنە بىر قېتىم، ئۇ تاغدىن بىر چوڭ قورساقلىق يىلاننى كۆرۈپ، ئۇنى بىر قانچە قېتىم چاقىرغاندا، يىلان ئۇنىڭ يېنىغا كەلگەن، ئۇ يىلاننى تۇتۇۋېلىپ ئوينىغان، زەھەرلىك يىلان ئۇنى چاقماستىن بەلكى ئۇنىڭ قولىنى يالاشقا باشلىغان، شۇڭا ئۇ يەردىكى كىشىلەر بۇ بالىنى ھايۋانلارنىڭ سىردىشى دەپ ئاتىغان.