جۇڭگو ئۇيغۇرچە رادىيو تورى 27-يانۋار بېيجىڭ خەۋىرى:
چاغان ھارپىسىدا لياۋنىڭدىكى شىنجاڭ، شىزاڭ، چىڭخەي قاتارلىق جايلاردىن ئوقۇغۇچى قوبۇل قىلىش ۋەزىپىسى بار 41 ئالى مەكتەپنىڭ يېتەكچى ئوقۇتقۇچىلىرى ئۈرۈمچى، تۇرپان، قۇمۇل، ئاقسۇ، قەشقەر قاتارلىق جاي ۋە شىزاڭ، چىڭخەينىڭ قىسمەن رايونلىرىدا 140تىن ئارتۇق ئاز سانلىق مىللەت ئوقۇغۇچىسىنىڭ ئۆيىگە بېرىپ ياخشى نەتىجىلەرنى قولغا كەلتۈردى.
بۇ قېتىم زىيارەت قىلىنغان 120دىن ئارتۇق ئوقۇغۇچىنىڭ ئائىلىسى شىنجاڭدا بولۇپ، زىيارەت ئۆمىكى ئالدى بىلەن شۇ يەردىكى مائارىپ تارماقلىرىنىڭ خىزمەت دوكلاتىنى، جۈملىدىن ئاز سانلىق مىللەت ئالى مەكتەپ ئوقۇغۇچىلىرىنىڭ ئىدىيە سىياسىي تەلىم-تەربىيەسىنى باشقۇرۇشتىكى ئۈلگىلىك تەجرىبىلەر شۇنداقلا شىنجاڭنىڭ تارىخى، مەدەنىيىتى، ئىقتىسادى، ئۆرپ-ئادىتى قاتارلىقلارغا مۇناسىۋەتلىك ئەھۋاللارنى ئاڭلىدى. ئىككى تەرەپ يەنە ئاز سانلىق مىللەت ئالى مەكتەپ ئوقۇغۇچىلىرىنىڭ قاراتمىلىقى ۋە ئۈنۈمى بولغان ئىدىيە سىياسىي تەلىم-تەربىيە خىزمىتىنى قانداق ئىشلەش توغرىسىدا سۆھبەتلەشتى.