خام ۋە پىششىق تاۋۇز ھەققىدە پاراڭ

  قۇملۇقتا كېتىۋاتقان كارۋان ھەمراھى پىچقان تاۋۇز خام چىقىپ قالغاچقا ، تاۋۇزنى بىر چىشلەم يەپلا تاشلىۋېتىپ يولىغا راۋان بوپتۇ . كېيىن يولدىن ئېزىپ قېلىپ ئۇسسۇزلۇقتىن چاڭقاپ كەتكەن بىر سەيياھ  بۇ خام تاۋۇزنى تېپىۋېلىپ ، ئىشتىھا بىلەن يەپ ئۆلۈمدىن قۇتۇلۇپ قاپتۇ .
  بۇ جەرياننى كۆزەتكۈچىلەر تاۋۇزنى تاشلىۋەتكۈچىگە :  ئىسىت شۇنچە ئىسسىقتا خام تاۋۇز بولسىمۇ ئۇسسۇزلۇقنى باساتتى - دە ، بىكار تاشلىۋەتتى ، دىيىشىمۇ ، باشقىلار تاشلىۋەتكەن خام تاۋۇزنى ئىشتىھا بىلەن يىگەن سەيياھنى مازاق قىلىشىمۇ مۇمكىن . ھەر  نەرسىنىڭ قەدىرى خاسلىقى بىلەن بولىدۇ . ھەممىلا چىرايلىق ئايالنىڭ ياخشى خوتۇن بولالماسلىقى ،كۆرۈمسىز ئاياللارنىڭمۇ ئوخشاشلا ناچار خوتۇنلاردىن بولماسلىقى مۇمكىن .شۇنداقلا قاملاشقان ،ئۇقۇمۇشلۇق يىگىتلەرنىڭ ھەممىسىنىڭ ياخشى ئەرلەردىن ، تومپاي ، تەربىيە كۆرمىگەن  يىگىتلەرنىڭ ناچار ئەرلەردىن بولۇپ كېتىشىمۇ ناتايىن .
  جەمئىيەتتە « شۇنداق ياخشى ئايالنى قويىۋەتتى » ، « شۇنداق يوۋاش  ، ئوبدان ئەردىن ئاجرىشىپ كەتتى » دىگەن پاراڭلارنى ئاڭلاپ تۇرىمىز .نىكاھ ئەر ئايال ئورتاق كۆتىرىپ ماڭىدىغان سىرلىق كۈنلۈك .كۈنلۈك ئاستى بىر دۇنيا ، سىرتى بىر دۇنيا . شۇڭا « ئىسىت ، شۇنداق ئېسىل ئادەم ئىدى ، زايە كەتتى » دەپ ، باشقىلارنىڭ كۈنلۈكىگە ئالدىراپ باھا بېرىپ  ، ھەيران بولىشىمىز بىھاجەت . شۇڭا باشقىلارنىڭ ئائىلىسىدىن ئىبارەت بۇ مۇقەددەس قورغىنىغا ئاغزىغا كەلگەنچە باھا بېرىپ ، باشقىلارغا ئىش ئۆگىتىپ ، ئەقىل كۆرسىتىش تازا ئاقىلانىلىك ئەمەس . ئائىلىدىكى ھار بىر كۆڭۈلسىزلىك  ، جۆرىڭىزنىڭ قاملاشمىغان قىلىق  - ئادەتلىرى دەل لاۋزا تاۋۇزدۇر .بىراق سەۋر قىلسىڭىز « خام تاۋۇز » نى ئالدىراپ پىچىپ  زىدە قىلىپ ، ۋاقىتسىز سېستىۋېتىشتىن ساقلانسىڭىز ، ئۇنى پەرۋىش قىلىپ ۋايىغا يەتكۈزۈپ پىشۇرالىسىڭىز ، « تەمسىز تاۋۇز » غا ئەمەس ، « قىزىل شىكەر» گە ئېغىز تىگىشىڭىز مۇمكىن . ھەمراھىڭىزنىڭ سەمىمىي  ساداقىتى  كۆيۈنۈش - مېھرىبانلىقى ، چېھرىدىكى ھەر بىر رازىمەنلىك  كۈلكىسى  « پىششىق تاۋۇز » دۇر . « پىششىق تاۋۇز » غا قانداق ئېغىز تىگىشمۇ بىر ماھارەت .    ئىنكاسىڭىز ھەر قانچە تىز بولسىمۇ ، نىكاھ توغرىسىدا سالماق بولىشىڭىز لازىمدۇر . « مۇھەببەت ئايدىڭ كېچىلەردە قولتۇقلىشىپ تاماشا قىلىشلا ئەمەس ، مۇھىمى بوران - چاپقۇندا قول تۇتۇشۇپ بىللە يۈرۈشتۇر  » . ھەر بىر ئالتۇن توي خاتىرىسىدە كىشىنى تەسىرلەندۈرگىدەك ئېسىل داستانلار  ، ئاچچىق - چۈچۈك ئەسلىمىلەرمۇ بولىدۇ . بىزدە بىر - بىرىمىزنىڭ  « تاۋۇز »لىرىنى  ئالدىرىماي يىگۈدەك  سەۋر - تاقەت ، « خام تاۋۇز » نى پەرۋىش قىلغۇدەك چىدام  - غەيرەت  ، ھەر بىر تاۋۇزغا تەم كىرگۈزگۈدەك  ماھارەت بولسىلا  ، تۇرمۇش بىزگە كۈلۈپ باقىدۇ ،  مۇھەببەت قۇچاق ئاچىدۇ . 
 دوستۇم   ،« خام تاۋۇز ۋە پىششىق تاۋۇز  » ھەققىدىكى ھىكايىنى ئوقىدىڭىزمۇ ؟  سىزدە « تاۋۇز » لارنى ئالدىرىماي يىگۈدەك سەۋر - تاقەت  ،« خام تاۋۇز » نى پەرۋىش قىلغۇدەك چىدام - غەيرەت بارمۇ ؟؟؟

مەنبە : شىنجاڭ گېزىتى