كۆڭۈلدىكىدەك ئەر - خوتۇنلۇق مۇناسىۋىتى ئۈچۈن كۆرسەتمە

   ئامىرىكىلىق نىكاھ ئىشلىرى مۇتەخەسسىسى دوكتۇر لاۋرىنىس نىكاھقا مۇناسىۋەتلىك كۆپ كىتابلارنى كۆرگەندىن كېيىن نۇرغۇن كىشىلەرنىڭ تۇرمۇش سەرگۈزەشتىسىگە ئاساسەن قانداق قىلغاندا كۆڭۈلدىكىدەك ئەر - خوتۇنلۇق مۇناسىۋەتكە ئېرىشكىلى بولىدىغانلىقى توغرىسىدا تۈرلۈك تەكلىپنى ئوتتۇرىغا قويغان .

. پاراڭلىشىڭ : ھەركۈنى مەلۇم ۋاقىت چىقىرىپ ، خۇشال كەيپىياتتا ھەمراھىڭىز بىلەن پىكىر ئالماشتۇرۇڭ . بۇ كۆڭۈل بۆلگەنلىك ۋە مۇھەببەتنى ئىپادىلەيدىغان ئەڭ ياخشى ئۇسۇل .

. بىرلىكتە سەيلە قىلىڭ : كۈندە مىنۇت ئەتراپىدا ۋاقىت سەرپ قىلىپ بىللە بەدەن چېنىقتۇرۇش ، ئۆزئارا پىكىر ئالماشتۇرۇش ، ھىسسىيات ئالماشتۇرۇپ ئۇقۇشماسلىقنى تۈگىتىپ يېڭى نىشان تىكلەشتە ئىنتايىن مۇھىم .

. بىرلىكتە بۇرۇن قىلىپ باقمىغان يېڭى ئىشلارنى قىلىڭ : يېڭى ئېچىلغان رېستۇرانغا بېرىپ ئۆزگىچە تائاملاردىن تېتىپ كۆرۈش ، مۇزىكا كېچىلىكىگە قاتنىشىش ، دەم ئېلىش كۈنلىرىنى ئۆزگىچە ئۇسۇلدا ئۆتكۈزۈش ، بىرلىكتە ئۆگىنىش كۇرسلىرىغا قاتنىشىپ ، ئۇزۇندىن بۇيان ئۆگەنمەكچى بولغان نەرسىلەرنى بىللە ئۆگىنىش نىكاھ تۇرمۇشۇڭلارغا تېخىمۇ كۆپ خۇشاللىقلارنى ئېلىپ كېلەلەيدۇ .

.  داۋاملىق سوۋغا تەقدىم قىلىپ تۇرۇڭ :  بىرەر ژۇرنال ياكى بىرەر ئالاھىدە كىتاب سېتىۋىلىپ تەقدىم قىلىش ، گۈل سوۋغا قىلىش ، ياخشى كۆرىدىغان يىمەكلىكلەرنى بىر- بىرىگە بېرىش قاتارلىق ئۇسۇللار ھەمراھىڭىزغا تېخىمۇ كۆپ خۇشاللىق ئېلىپ كېلىدۇ .

.  ئورۇنسىز كوتۇلدىماڭ ، تەنقىدلىمەڭ : ھە دېسىلا قارشى تەرەپتىن قۇسۇر ئىزدەپ يۈرمەي ، كۆپرەك ماختاپ ، ئۇنىڭ سىزگە ئاتا قىلغان مۇھەببىتىگە رەھمەت ئېيتىڭ . قەدىناس ئەر - خوتۇنلار ئارىسىدا پاسسىپ سۆزلەرگە ئەزەلدىن ئورۇن يوق . سىز ياخشى ئۈلگە بولۇپ بەرسىڭىز ، يولدىشىڭىزمۇ ئىشلارنى سىزگە ئوخشاش ياخشى قىلالايدۇ.

. ئوبرازىڭىزنى خۈنۈكلەشتۇرۇپ قويماڭ : ياخشى ئوبراز ئۆزىڭىزگە ۋە ھەمراھىڭىزغا قىلىنغان ياخشى سوۋغات . ساغلام  جەلىپ قىلارلىق تاشقى قىياپىتىڭىز ، يۈرۈش - تۇرۇشىڭىز ئەر - خوتۇنلۇق مۇناسىۋىتىنى تېخىمۇ ئىلگىرى سۈرۈشتە ھەيدەكچىلىك رولىنى ئوينايدۇ .

.   ھەمراھىڭىزنىڭ ئۆز تۇرمۇشىغا مەسئۇل بولۇشىغا يول قويۇڭ : ئۇ ئۆز تۇرمۇشى ۋە كەلگۈسىنى بەلگىلەشكە ھوقۇقلۇق . ئۇنىڭ تاللىشىغا ھۆرمەت قىلىڭ .  ئۆزۈڭلارنىڭ ئوخشاش ياكى ئوخشاش بولمىغان تەرەپلىرىنى ساقلاپ قېلىپ ، تۇرمۇشۇڭلارنى ئازادە ئۆتكۈزۈشكە تىرىشچانلىق كۆرسىتىپ ، ھەمراھىڭىزنى تېخىمۇ كۆپ خۇشاللىقلارنى بېغىشلاڭ .
 
.  ئورتاق ئۆسۈپ يېتىلىشكە ئەھمىيەت بېرىڭ : سىلەرنىڭ ئۆسۈپ يېتىلىشىڭلار خۇشال ئەسلىمىلەرنى ئاساس قىلغاندا ، مۇناسىۋىتىڭلار تېخىمۇ يېقىنلىشىدۇ .

.  قارشى تەرەپنى ئېگىلىۋىلىش نىيىتىدە بولماڭ : ئىش قىلغان ۋاقىتتا ھەرگىز ھەمراھىڭىزنى ئېگىلىۋىلىش نىيىتىدە بولماي ، ئۇنىڭ ئۆز تۇرمۇش ئۇسۇلى ۋە قىزىقىشى بويىچە ئىش كۆرۈشىگە يول قويۇڭ . قوللاش ، رىغبەتلەندۈرۈش ، مەدەت ۋە ئىلھام بېرىشنى ئاساس قىلىڭ . قەلبىڭىز مىننەتدارلىق بىلەن تولسۇن ، ئىناق ۋە ئىتتىپاق ئۆتۈڭ .

. بىرگە بولغان ۋاقىتىڭىزنى قەدىرلەڭ : شۇنداق قىلالىغاندا بىر - بىرىڭلارغا تېخىمۇ ئامراق بولۇپ كېتىسىلەر . ئۇنىڭ بىلەن بىرلىكتە ياخشى كۆرىدىغان ئىشلارنى قىلىڭ .

. پەقەت ئىككىڭلار خۇشال بولىدىغان ئىشلارنىڭ ھەممىسىنى قىلىڭ : شەخسىي تۇرمۇشقا سىز ۋە ھەمراھىڭىز ئوتتۇرىسىدا قىلىشقا تېگىشلىك ئىشلارنىڭ ھېچقايسىسى چەكلىمىگە ئۇچرىمايدۇ . پەقەت ئىككىڭلارغا پايدىلىق ئىش بولسىلا قىلىۋىرىڭ . باشقىلارنىڭ قانداق ئويلىشى بىلەن كارىڭىز بولمىسۇن ، ھەرقانداق توسالغۇ بولۇشىدىن قەتئىنەزەر ، ئىككىڭلار قانائەتلەنسەڭلارلا بولدى .

.  دادىل بولۇڭ : يېڭى ئۇقۇم ، يېڭى كەچۈرمىش ، يېڭى ئىجتىمائىي مۇناسىۋتكە نىسبەتەن دادىلراق بولۇڭ . بۇنداق قىلىش سىزنىڭ تۇرمۇشتىن خۇشاللىق ئىزدىشىڭىزگە ، يېتىلىشىڭىزگە ،ئىجتىمائىي مۇناسىۋەت دائىرىڭىزنىڭ كېڭىيىشىگە ياردەم بېرىدۇ . سىلەر بىرلىكتە ئۆگەنگەن نەرسەڭلار قانچە كۆپ بولسا ، شۇنچە خۇشاللىنىسىلەر .

.  ئەپۇ قىلىش ۋە مۇھەببەت قويۇشنى ئۆگىنىۋىلىڭ ، ئۆتكەن ئىشلارغا سالىۋات قىلىپ ، بۈگۈننى چىڭ تۇتۇڭ . ھەمراھىڭىز بىلەن بىرلىكتە خۇشال - خۇراملىق بىلەن كەلگۈسىنىڭ پىلانىنى تۈزۈڭ .

. نەپرەتلەنمەڭ ، ئاچچىقلانماڭ ، گۇمانخورلۇق ۋە ھەسەتخورلۇق قىلماڭ : شۇنداق قىلالىسىڭىز  بىر - بىرىڭلارنى تېخىمۇ ھۆرمەتلەپ ، ھەر ئىككىڭلاردا تۇرمۇشقا نىسبەتەن تولۇپ تاشقان مىننەتدارلىق تۇيغۇسى پەيدا بولىدۇ .

. مەنىسىز ئۇرۇش  - تالاش قىلماڭ :  مەيلى قەيەر ،قايسى ۋاقىت بولسۇن ئۇرۇشماسلىق لازىم .  بولۇپمۇ تاماق يەيدىغان ، ئۇخلايدىغان چاغدا ھەرگىز ئۇرۇشماڭ . ھەربىر كىشى ئۆز پىكرىدە تۇرۇشقا ھوقۇقلۇق ، قارشى تەرەپنىڭ كۆز قارىشىغا ھۆرمەت قىلىپ ، ياخشى بىر تىڭشىغۇچى بولۇڭ .

.  كۈلۈمسىرەش ۋە كۈلكە سىزگە دائىملىق ھەمرا بولسۇن : بۇ ساغلاملىق ۋە ئۇزۇن ئۆمۈر كۆرۈشنىڭ رېتسىپى . سىز ئۆزىڭىز ۋە ھەمراھىڭىزغا بەك تەلەپچان بولۇپ كەتمەڭ ، كۆپرەك كۈلۈمسىرەش ۋە كۈلۈش بىر -بىرىڭلارغا بېرىلىدىغان ھەقىقىي سوۋغات .
 
. تىكىلىپ قاراشنى ئۆگىنىۋىلىڭ : چوڭقۇر ھىسسىيات بىلەن بىر - بىرىڭلارغا قانچە كۆپ قاراشساڭلار ،مۇھەببىتىڭلار شۇنچە كۈچىيىدۇ . سىز قارشى تەرەپنىڭ كۆزىدىن مۇھەببەت  ، ساداقەت  ۋە گۈزەللىكنى كۆرەلەيسىز .
 
. كۆڭۈل بۆلگەنلىكنى ئىپادىلەڭ : قۇچاقلاش ، سۆيۈش ، سىيلاش بۇلارنىڭ ھەممىسى مۇھەببەتنى ۋە كۆڭۈل بۆلگەنلىكنى ئىپادىلەيدىغان ناھايىتى ياخشى ئۇسۇل .

. ساغلام بولغان تۇرمۇش ئادىتىنى يېتىلدۈرۈڭ : ياخشى يىمەكلىك ياخشى روھىي ھالەتنى يېتىلدۈرىدۇ .تۇرمۇشنى رېتىملىق ئۆتكۈزۈڭ .

. ئۆيىڭىز پاكىز ، رەتلىك بولسۇن : بۇنىڭ تىنچ مۇھىتنى يارىتىشقا ، ئائىلىڭىزنىڭ تېخىمۇ بەخىتلىك ۋە ئىناق بولۇشىغا ياردىمى بولىدۇ . بۇ راستىنلا ناھايىتى ئۈنۈملۈك ئۇسۇل .

. يارىشىملىق كېيىنىپ يۈرۈڭ : رەتلىك ، پاكىز ، يارىشىملىق كېيىنىپ ، چىرايلىق ياسىنىپ يۈرسىڭىز ، ئۆزىڭىزمۇ بىر خىل ئىپتىخارلىق تۇيغۇسى ھىس قىلىسىز .

. ئىقتىسادتا ئوچۇق ئاشكارا بولۇڭ : ئۆيىڭىزنىڭ ئىقتىسادىي مەسىلىسىنى قارشى تەرەپ بىلەن بىرلىكتە ھەل قىلىڭ . ئىقتىسادتا بىرلىكككە كېلىپ ، بىر - بىرىگە ئىشىنىپ ، جاپا - مۇشەققەت ، ھوزۇر - ھالاۋەتنى تەڭ  كۆرگەندە ئەر - خوتۇنلۇق مۇناسىۋىتىنى تېخىمۇ مۇستەھكەملىگىلى بولىدۇ .

. قارشى تەرەپنى پۈتۈنلەي قوبۇل قىلىڭ :قارشى تەرەپنىىڭ خاراكتىرى ، ئادىتى ، مىجەزى قاتارلىق ئالاھىدە تەرەپلەرنى ئۆزگەرتىشكە ئۇرۇنماي ، ئەڭ ياخشىسى ئۇنى قوبۇل قىلىڭ . بۇ ئۇزاق مۇددەتلىك ئىناقلىقنى ئىلگىرى سۈرىدۇ .