تەپەككۇردىن تامچىلار

*باشقىلار كۆزنى ئىككىنچى ئېغىز دەيدۇ. مېنىڭچە، كۆز ئېغىزمۇ ئىپادە قىلالمىغان يۈرەكنى كۆرسەتكۈچى ئەينەكتۇر.

* ئالىي مەكتەپ ھاياتىدا مۇھەببەتنى باشتىن كەچۈرۈپ باققانلار تولىمۇ كۆپ، ئەمما مۇھەببەتتىن ھەقىقىي بەھىر ئېلىپ باققانلار تولىمۇ ئاز.

* تىرىشىش چوقۇم غەلبىدىن دېرەك بەرمەيدۇ، ئەمما ۋاز كېچىش چوقۇم مەغلۇبىيەتتىن دېرەك بېرىدۇ.

* دۇنيادا پەقەت ئىككى خىل مۇناسىۋەت مەۋجۇت:بىرى، قانداشلىق. يەنە بىرى، نانداشلىق.

* كۆللەرنىڭ تىنىپ قېلىشى دېڭىزلارنىڭ مۇسىبىتىدىن بېشارەتتۇر.

* بەخت- ئېرىشەلمىگەنلىكىڭدە ئەمەس، ھېس قىلالماسلىقىڭدا.

* بىلىم ئېگەللەش ئىجتىھات تەلەپ قىلسا، بىلىمنى قىممەتكە ئېگە قىلىش پەم-پاراسەت تەلەپ قىلىدۇ.

* خەلىقنىڭ ئاڭ-ساپاسى ئۆسكەنسېرى باشقۇرغۇچىغا ھاجىتى چۈشمەيدىغان بولىدۇ. شۇڭا مۇستەبىتلەر خەلىقنىڭ ئاڭ-ساپاسىنىڭ ئۆسۈشىدىن قورقىدۇ.

*ئەجىرسىز كەلگەن ئامەت- بىلىنمەي كەلگەن ئاپەت.

* مەنسەپتىن چۈشكەن كۈنۈڭ-خەلىقتىن ھەقىقىي باھايىڭنى ئاڭلايدىغان كۈنۇڭدۇر.

*ئەجەپ بىر مەرەز كېسەلگە گىرىپتار بوپقاپتىمەن، دەپ قاقشىماي، ئىلگىرى نېمە گۇناھ ۋە كۇپۇرلۇقلارنى ئۆتكۈزگەنلىكىڭىزنى ئويلىسىڭىزلا،‹‹ياراتقان ئىگىسى تەڭشەيدۇ›› دېگەننىڭ مەنىسىنى بىلىسىز.

* ئۈمىد ۋە كۈتۈشنىڭ ۋاقتى ئۇزىراپ كەتسە، كىشىلەر ئىشەنچتىن ئايرىلىپ قالىدۇ.

* ئۆزى چۈشەنمىگەن شەيئىلەر ھەققىدە سۆزلەش شۇ كىشىنىڭ بىلىمسىزلىكىنى ئاشكارىلاپ قويسا، ئۆزى بىلمىگەن كەسىپتە ئىگىلىك تىكلەش كىشىنى ۋەيران قىلىدۇ.

*ماددىيەتنى دەپ مەنىۋىيەتتىن ۋاز كەچكەن كىشىنىڭ تەقدىرى،بىر خۇرجۇن ئالتۇن بىلەن چۆلدە قالغان كىشىنىڭ تەقدىرىگە ئوخشايدۇ.

* تەرەققىيات تاز باشلارنى تۈگەتكىنى بىلەن، پاينەكۋاشلارنى كۆپەيتىۋەتتى.

* ھازىر قەلبى گۈزەللەرنى تېپىش سىر، تېشى گۈزەللەر ماڭدامدا بىر.

* تىغ ‹قورال› دا ئۆلمىگەن نۇمۇستا ئۆلەر.

* بىمەنە ماختاشلارغا بىرسى، چىرىكلەشكەن-بىيۇكرات مەنسەپدارلار، يەنە بىرسى، نېرۋىسى چاتاقلار ئاسان ئىشىنىدۇ.

* كومپيۇتېر، بىر ئادەم ئەقلىنىڭ كۆپ ئادەم ئەقلىگە قوماندانلىق قىلىشىدۇر.

* تۇرمۇشتا ھەشەمەتچىلىك قىلىش بايلىقىنى كۆز- كۆز قىلىش بولسا، قەبرىلەرنى ھەشەمەتلىك ياساش-ئۆلۈكنى كۆز-كۆز قىلىشتۇر.

* ھىيلىگەر ساھىبجامال-قېپى چىرايلىق ساختا مەھسۇلات.

* شەرم-ھايالىق قىز- پاك ئايالدىن قالغان ئىز.