يېرىم كېچىدە كەلگەن مېھمان

روبېرت . ياسېل

ئورسابىل  رومانلاردا  تەسۋىرلەنگەن  رازۋېدچىكلارغا  ئازراقمۇ  ئوخشىمايىتتى . ئۇنىڭ بىلەن  بىللە  فىرانسىيىچە  سېلىنغان  بۇ مېھمانساراينىڭ  قاراڭغۇ ، زەي  پۇراپ  تۇرىدىغان  كارىدورىدىن ئۆتۈپ  كېتۋاتقان فول قاتتىق ئۈمىدسىزلەندى . ئورسابىل  ئالتىنجى  قەۋەتتىكى  تار  بىر  ئۆيدە  ئولتۇراتتى .  رىۋايەت  تۇسىنى ئالغان مۇشۇنداق  بىر  ئەرباپنىڭ  بۇنداق  جايدا  تۇرۇشنى  تەسەۋۋۇر  قىلىش  تولىمۇ  تەس  ئىدى .
ئورسابىل  ناھايىتى  سېمىز ، باداڭ قورساق  ئادەم  ئىدى ،
--- ئۈمىدسىزلىنۋاتامسىز ، يازغۇچى  ئەپەندى ؟ _ دېدى  ئورسابىل  بېشىنى  بۇراپ .  ئۇ  كۈلۇپ  قويدى  ۋە  ئىشىكنى  ئېچىپ  كەيپى  ئۇچقان  مېھماننى  ئاۋۋال  كىرسۇن  دەپ  ئۆزى  بىر  چەتتە  تۇردى .
--- ئەمما ،دوستۇم ، غەيرەتلىك  بولۇڭ _  دېدى  ئورسابىل  گېپىنى  داۋاملاشتۇرۇپ ، _ سىز  ھازىر  بىر  ھۆججەتنى  كۆرەلەيسىز ،ئۇ  ناھايىتى  مۇھىم  ھۆججەت ،ئۇ  ھۆججەتنى  قولغا  چۈشۈرۈش  ئۈچۈن  نەچچە  ئەر -  ئايال  جېنىدىن  ئايرىلدى ... ھەي ، بۇ  نېمىدىگەن  قىزىق  ئىش  ھە ،  شۇ ئەمەسمۇ ؟
ئۇ  شۇنداق  دېگەچ  ئىشىكنى  يېپىپ  چىراقنى  ياندۇردى .فول  بىردىنلا  شۈركىنىپ  كەتتى ، ئۆينىڭ  ئوتتۇرىسىدا  تاپانچا  تۇتۇۋالغان  بىر  ئەر  تۇراتتى  .
ئورسابىل   ھەيران بولغىنىچە  كۆزىنى  چىمچىقلاتتى .
--- ماكىس ،-  دېدى  ئۇ  ھۆمىدىگىنىچە ، _ ئەجەپ  قورقۇتتىڭا ئادەمنى .  مەن  تېخى  سېنى  بىرلىندىمىكىن  دەپتىمەن ،  بۇ  ئۆيدە  نېمە  ئىش  قىلىپ  يۇرۇيسەن ؟
ماكىس  ئاۋاق ،  پەتەك  ئادەم  ئىدى.  چىرايى  مايمۇننىنىڭ  چىرايىغا  ئوخشاپ  كېتەتتى . شۇتاپتا  ئۇنىڭ  قولىدىكى  تاپانچىنى  ھېسابقا  ئالمىغاندا  ئۇ  ئانچە  خەتەرلىك  ئادەمدەك  كۈرۈنمەيتتى .
--- بۈگۈن  ئاخشام   بىرسى سىزگە  مەلۇم  بىر  خىل  يېڭى  تىپتىكى  باشقۇرلىدىغان  بومبا  توغرىسىدىكى  دوكىلاتنى  ئەكىلىپ  بەرمىدىمۇ ؟ _  دېدى  ماكىس پەس  ئاۋازدا ، _  مەن  ئۇ  دوكىلات  سەندە  تۇرغاندىن  مەندە  تۇرسا  ياخشىراق  بولامدىكىن  دەيمەن .
ئورسابىل  كېرىسلوغا  بېرىپ  ئولتۇردى  ،
--- مەن بۇ  مېھمانساراينىڭ  باشقۇرغۇچىسىنى  ھەرگىز  كەچۈرمەيمەن ، _ دېدى ئۇ  چىشىنى  چىشلىگىنىچە ،_ مۇشۇنىڭ  بىلەن  ئىككى  قېتىم  ئاشۇ  ئىپلاس  بالكوندىن  بۇ  ئۆيگە   ئادەم  چۈشتى .
فول  نەزىرىنى  بۇ  ئۆينىڭ  دېرىزىسىگە  ئاغدۇردى . جاھانغا  تۈن  پەردىسى  يېيىلغاچقا  سرت  گۆردەك  قاراڭغۇ  ئىدى . 
--- بالكون ؟ _ دەپ  سورىدى  ماكىس  ھەيران  بولغىنىچە ،_  ياق  مەن  بۇ  ئۆينىڭ  قۇلۇپىنى  ئېچىپ  كىردىم  .  بالكون  بارلىقىنى  بىلگەن  بولسام بۇنچە  ئاۋارە  بولۇپ  يۈرمەسكەنمەن .
--- مېنىڭ  دەۋاتقىنىم  بۇ  ئۆينىڭ  بالكونى  ئەمەس ، _ دەپ   چۈشەندۈردى ئورسابىل خاپا  بولغىنىچە ، _ يان ئۆينىڭ  بالكونىنى  دەۋاتىمەن .  ئەممە  بالكون  دېرىزەمنىڭ  تەكچىسىگىچە  سوزۇلغان ، يان  تەرەپتىكى  بوش  ئۆيدىن  ھەرقانداق  ئادەم  بۇ  ئۆينىڭ  بالكونىغا  چىقالايدۇ .  ئۆتكەن  قېتىممۇ  بىر  ئەبلەخ  بۇ  ئۆيگە  مۇشۇنداق  كىر گەن ئىدى .  بۇرۇن  بۇ  ئىككى  ئۆي  بىر  ئىدى .
ماكىس  فولغا  قارىدى  ۋە  بۇيرۇق   تەلەپپۇزدا :
--- ئولتۇرۇڭ  بىز  يېرىم  سائەت   ساقلايمىز  ، دېدى ،
--- ياق،  توغرىسى  دېگەندە  ئوتتۇز  بىر  مىنوت  ساقلايمىز ، _ دېدى  ئورسابىل  ناخۇشلۇق  بىلەن ،_ سائەت  ئون  ئىككىدە  كۆرىشىمىز  دەپ   كېلىشكەنتۇققۇ .  ئېيتىڭا ،  سىز  بۇ  ھۆججەتتىن  قانداق  خەۋەر  تاپتىڭىز ،  ماكىس ؟  دېدى .بۇ  ئاۋاق  جاسۇس  ھېجايغىنىچە :
--- بۇ  ھۆججەتنى  سىلەرنىڭ   ئادىمىڭلارنىڭ  قانداق  قولغا  چۈشۈرىدىغانلىقىدىن  خەۋىرىمىز  بار  ئىدى .  بولدىلا ، بۈگۈن  كېچە  مەن  بۇ  ھۆججەتنى  قايتىدىن  قولۇمغا  چۈشۈرىدىغان بولدۇم .  ئاۋۇ  نېمە،  ئىشىك  ئالدىدىكى  كىم ؟
فول  ئىشىكنىڭ  چېكىلگەن  ئاۋازىنى  ئاڭلاپ  سەكرەپ  ئورنىدىن  تۇردى .  ئورسابىل  چاندۇرماي  كۈلۈپ  قويدى .
--- ئۇ  ساقچى ،_ دېدى  ئورسابىل ،_  مەن  بۇنداق  مۇھىم  ھۆججەت  ھەر  ۋاقىت  قوغدالسا  كېرەك   دەيمەن .چاتاق  چىقمىسۇن  دەپ  بىز  ساقچىنى  تەكشۈرۈشكە  تەكلىپ  قىلغان  ئىدۇق .
ئىشىك   بىر  مەھەل  جىددى  چېكىلدى ،
--- ئورسابىل  ئەپەندى  ئەمدى  قانداق  قىلاي  دەيسىز ؟
--- مۇبادا  مەن  ئىشىكنى  ئاچمىسام  ئۇلار  مۇشۇ  خىل  ئۇسۇل   بىلەن  ئۆيگە  باستۇرۇپ  كىرىدۇ .  ئۇلار  ئوق  چىقىرىش  توغرىسىدا  ئازراقمۇ  ئىككىلىنىپ  ئولتۇرمايدۇ .
ماكىس  دېرىزە  يېنىغا  ئۇچقاندەك  باردى ،  دېرىزىنى  قولىنى   ئارقىسىغا  قىلىپ  ئاچتى ۋە  بىر  پۇتىنى  دېرىزىنىڭ  سىرتىغا  ئالدى ،  سىرت  قاپقاراڭغۇ  ئىدى .
--- ئۇلارنى  كەتكۈزىۋېتىڭ _ دېدى  ئۇ  ئاگاھلاندۇرغىنىچە ، _ مەن بالكوندا  ساقلاپ  تۇراي ،  بولمىسا  ئوق  چىقىرىمەن
ئىشىك  تېخمۇ  قاتتىق  چېكىلدى ،  بىرسى :
--- ئورسابىل  ئەپەندى   ئورسابىل  ئەپەندى ، _ دەپ  ۋارقىرىدى.
ماكىس  پۈتۈن  بەدىنىنىڭ  ئېغىرلىقنى  بىر  پۇتىغا  چۈشۈردى  ۋە  كەينىگە  بۇرۇلۇپ  تاپانچىنى  ھېلىقى  سېمىز  پور  كۆتەك  بىلەن  ئۇنىڭ  مېھمىنىغا  توغىرلىدى .  يەنە  بىر  قولى  بىلەن  دېرىزىنىڭ  كىشىكىنى  تۇتتى  _ دە ،يەنە  بىر  پۇتىنى  ئېلىپ   بالكۇندىن  ئاتلاپ  ئۆتتى .
ئىشىكنىڭ  تۇتقۇچى  چۆرۈلدى .   ماكىس  ئوڭ  قولى  بىلەن  شاققىدە  دېرىزىنى  ئىتتىرىپ  ئاچتى  _ دە  بالكونغا  سەكرىدى .  كېيىن  <ۋايجان&t;  دەپ  قاتتىق  ۋارقىرىدى _ دە ،  يەرگە  گۈپپىدە  چۈشتى .
ئىشىك  ئېچىلدى .  خىزمەتكار  ھېنرى  بىر  شېشە ،  ئىككى  قەدەھ  قويۇلغان  بىر  پەتنۇسنى  تۇتۇپ  تۇراتتى .  ئۇ  پەتنۇسنى  ئۈستەل  ئۈستىگە  قويۇپ  قويغاندىن  كېيىن  ئۆيدىن  چىقىپ  كەتتى .
پۈتۈن  بەدىنى  شامال  سوققان  قورايدەك  تىترەپ ، چىرايلىرى  ساماندەك  سارغىيىپ  كەتكەن  فول  ھېنرىنىڭ  چىقىپ  كېتىۋاتقان  سىماسىغا  قاراپ   قالدى .
--- ئەمما...  ئەمما....  ساقچىمۇ ؟ _  دەپ  سورىدى  ئۇ  كېكەچلىگىنىچە .
--- قايسى  ساقچىكەن  ئۇ _ ئورسابىل  ئۇلۇغ  تىنىپ  قويدى ، _  ئەمما  مەن  ھېنرى  كېلەرمىكىن  دەيمەن .
--- ئەمما  بالكوندىكى  ئۇ  ئادەم ...._ دەپ  سورىدى  فول  يەنە .
--- يوقسۇ ،_ دېدى  ئورسابىل  جاۋابەن ،_  ئۇ  مەڭگۇ  قايتىپ  كەلمەيدۇ .