خەقنىڭكىدە قونۇپ قالغان قىز

( مۇھەممەتجان راشىدىن )

توختىكامنىڭ ئىشىك ئالدىدا ،
پەيدا بولۇپ قاپتۇ بىر بۇۋاق.
مەھەللىگە پۈر كەتتى گەپ-سۆز،
ئەل ئاغزىدىن ئېچىلدى تۇۋاق.

مەزىن بىلەن ئىككى ، ئۈچەيلەن،
كۆمۈپ قويۇپ كەلدى ئۇنىمۇ.
قەبرىلىمەي قىلدى قانداق ،
بۇنداق ئىشلار پەقەت شۇلىمۇ ؟

يېقىندىلا تىنغان سۆز -چۆچەك،
باش كۆتۈردى يەنە بۈگۈنمۇ.
-بىزگە بەكمۇ ئۇياتقۇ،-دېدى،-
چىقسا يەنە ئەتە- ئۆگۈنمۇ

بۇ ئىشقىمۇ ساقچى لازىممۇ،
ئۆزى چۈشتى ئەل -يۇرت ئىزدەشكە.
مەھەللىدە ھەر قورا ، ھەر ئۆي،
تولۇپ كەتتى سۇئال ، ئۈندەشكە .

تەگەشمىگەن ئادەم قالمىدى ،
ھەر دوقمۇشتا ھەردەم كۈتۇلداش .
بېشى چۈشتى قىزى بارلارنىڭ ،
قىزلىرىدا يەنە سوكۇلداش.

كىرمەيدىغان بولدى كوچىدىن،
دېمىسىمۇ تالاي ئوغۇل-قىز.
تۈندە قايتار ئۆيگە بىرلىرى ،
بىرلىرىدىن قالدى خۈنۈك ئىز.

تېگىپ ئۆتتى گۇماننىڭ ئوقى ،
قىزلار تۈگۈل جۇۋانلارغىمۇ.
شۈبھىلەندى تۇل خوتۇنلاردىن،
ئاسماق بولدى تۇتۇپ دارغىمۇ .

سەتەڭلەرمۇ قالمىدى چەتتە،
تۇغۇپ تاشلاپ يۈرگەن دەپ شۇنداق .
قاچۇرىدۇ گۇمان ئىماننى،
بەلكىم ھەممە ئەمەستۇر ئۇنداق.

ئۇنى ئويلاپ بۇنڭ ئەسلىشىپ،
يەنە كەلدى ئۇلار قىرلارغا.
كېچىلەردە شۇلاردىن قالغان،
كۆزى چۈشتى كونا ئىزلارغا .

كەلدى ئۇچۇر دوختۇرخانىدى،
دېمەك ، ئاخىر يېشىلدى گۇمان.
كۆلەڭگۈنى كۆمۈپ بولامدۇ،
يەلپۈگەنگە تارقامدۇ تۇمان ؟

بوۋىقىنى تاشلىغان بىلەن ،
ئاغرىقىنى بولامدۇ تاشلاپ ؛
دېمەك ،ئۇنى دوختۇخانىغا ،
بارغانىكەن ئاغرىقى باشلاپ.

بولۇپ چىقتى بوۋاق ئانىسى،
بالنىتسېدا بولۇپ قالغان قىز.
ئاقىۋەتتە شۇنداق بولاركەن،
خەقنىڭكىدە قونۇپ قالغان قىز.