«شىنجاڭ شەھەر گېزىتى» مۇخبىرىنىڭ 18-سېنتەبىر ئۈرۈمچى شەھەرلىك تەرەققىيات ۋە ئىسلاھات كومىتېتىدىن ئۇقۇشىچە، «ئۈرۈمچى شەھىرىنىڭ موتورلۇق قاتناش ۋاسىتىلىرى توختىتىش مەيدانىنى باشقۇرۇش چارىسى»قاتارلىق ئالاقىدار بەلگىلىمىلەرگە ئاساسەن، ئۈرۈمچى شەھەرلىك خەلق ھۆكۈمىتىنىڭ قوشۇلۇشى بىلەن، ئۈرۈمچى شەھىرىدىكى دوختۇرخانىلارنىڭ ئاپتوموبىل توختىتىش مەيدانىغا شۇ دوختۇرخانىدا كېسەل كۆرسىتىۋاتقانلار ۋە داۋالىنىۋاتقانلاردىن باشقىلار ئاپتوموبىل توختاتسا، توختىتىش ھەققى ئېلىنىدىكەن، توختىتىش ھەققى يول بۆلەكلىرىگە ئاساسەن ئايرىلىدىكەن. 1-دەرىجىلىك يول بۆلەكلىرىنىڭ ئاپتوموبىل توختىتىش ھەققى سائىتىگە ئۈچ يۈەن؛ 2-، 3-دەرىجىلىك يول بۆلەكلىرىنىڭكى سائىتىگە ئىككى يۈەن بولىدىكەن.

ئۈرۈمچى شەھىرىدىكى يول بۆلەكلىرى ئادەم ئېقىمى ۋە موتورلۇق قاتناش ۋاسىتىلىرىنىڭ زىچلىقى بويىچە ئۈچ دەرىجىگە ئايرىلىدۇ. ئادەم ۋە موتورلۇق قاتناش ۋاسىتىلىرى زىچ بولغان 1-دەرىجىلىك يول بۆلىكىدىكى دوختۇرخانىلار ئاپتونوم رايونلۇق خەلق دوختۇرخانىسى، ئاپتونوم رايونلۇق جۇڭگو تېبابىتى دوختۇرخانىسى، شىنجاڭ تېببىي ئۇنىۋېرسىتېتىغا قاراشلىق 2-دوختۇرخانا، لەنجۇ ھەربىي رايونى ئۈرۈمچى باش دوختۇرخانىسى، ئۈرۈمچى شەھەرلىك 1-خەلق دوختۇرخانىسى، ئۈرۈمچى شەھەرلىك ئانا-بالىلار ساقلىقنى ساقلاش دوختۇرخانىسى، ئۈرۈمچى شەھەرلىك جۇڭگو تېبابىتى دوختۇرخانىنى؛ ئادەم ۋە موتورلۇق قاتناش ۋاسىتىلىرى زىچراق 2-دەرىجىلىك يول بۆلىكىدىكى دوختۇرخانىلار شىنجاڭ تېببىي ئۇنىۋېرسىتېتىغا قاراشلىق 1-دوختۇرخانا، شىنجاڭ تېببىي ئۇنىۋېرسىتېتىغا قاراشلىق ئۆسمە كېسەللىكلەر دوختۇرخانىسى، شىنجاڭ تېببىي ئۇنىۋېرسىتېتىغا قاراشلىق 6-دوختۇرخانا، ھاۋا ئارمىيەسى دوختۇرخانىسى، تۆمۈريول دوختۇرخانىسى، شىنجاڭ ئىشلەپچىقىرىش-قۇرۇلۇش بىڭتۈەنى دوختۇرخانىسى، ئۈرۈمچى شەھەرلىك دوستلۇق دوختۇرخانىسى، ئۈرۈمچى شەھەرلىك 4-خەلق دوختۇرخانىنى؛ ئادەم ۋە موتورلۇق قاتناش ۋاسىتىلىرى شالاڭراق 3-دەرىجىلىك يول بۆلىكىدىكى دوختۇرخانىلار 1-، 2-دەرىجىلىك يول بۆلەكلىرىدىن باشقا يوللاردىكى دوختۇرخانىلارنى كۆرسىتىدۇ.

ئۈرۈمچى شەھەرلىك تەرەققىيات ۋە ئىسلاھات كومىتېتىدىكىلەر مۇنداق دېدى: ئۈرۈمچى شەھىرىدىكى دوختۇرخانىلارنىڭ ئاپتوموبىل توختىتىش مەيدانىغا شۇ دوختۇرخانىدا كېسەل كۆرسىتىۋاتقان ۋە داۋالىنىۋاتقان ئاغرىقلاردىن باشقىلار ئاپتوموبىل توختاتسا، توختىتىش ھەققى ئېلىنىدۇ، كېسەل كۆرسىتىشكە كەلگەنلەر ۋە داۋالىنىۋاتقانلار شۇ كۈندىكى كېسەل كۆرسىتىش ھەققى تالونى ياكى كېسەلخانىدا يېتىپ داۋالىنىش ھەققى تالونىغا ئاساسەن ئاپتوموبىل توختىتىش ھەققى تاپشۇرمايدۇ.

    مەنبەسى:شىنجاڭ گېزىتى