ئاسىيا كىندىكى تورى خەۋىرى: ھەسەنجان مەمەتنىڭ ئىككى ھاياتلىق نىشانى بار يەنى: بېيجىڭدا يىلتىز تارتىپ، ھازىرقى ئورنىدا شانلىق نەتىجە قازىنىش؛ يۇرتىنى گۈللەندۈرۈش قۇرۇلۇشىغا ياردەم بېرىش، ئۆزىنىڭ ئۇچۇر بايلىق ئالاھىدىلىكى ۋە ئۈزلۈكسىز كېڭىيىۋاتقان نەزەر دائىرىسىگە تايىنىپ يۇرتداشلارنى باي تۇرمۇشقا ئېرىشتۈرۈش.

ھەسەنجان مەمەت ھازىر بېيجىڭ شەھەرلىك فاڭشەن رايونى شىدۇ بازىرى تۈر باشقۇرۇش ئىشخانىسىنىڭ مۇئاۋىن مۇدىرى. 8-ئاينىڭ 15-كۈنى مۇخبىر ھەسەنجان بىلەن ئالاقىلەشكەن بولۇپ، ھەسەنجان ئىنتايىن راۋان بولغان بېيجىڭ تەلەپپۇزىدا مۇخبىر بىلەن پاراڭلاشقان.

ھەسەنجان مەمەت 30ياش، شىنجاڭ مەكىت ناھىيىسى تۈمەنتال يېزىسىدا تۇغۇلغان بولۇپ بالىنىڭ چوڭى. ئۇ 14ياشقا كىرگەندە دادىسى ۋاپات بولغان. شۇنىڭ بىلەن ئائىلىنىڭ پۈتۈن يۈكى ئاپىسى ھۆرنىسا ئابدۇرېھىمغا يۈكلەنگەن. ئېغىر تۇرمۇش بېسىمى ئاستىدا ھۆرنىسا ئانا ئوغلى ھەسەنجاننى ئوقۇشتىن چېكىندۈرۈشنى ئويلىغان. ئەمما ھەسەنجاننىڭ ئوقۇتقۇچىسى: ‹بۇ بالىنىڭ نەتىجىسى ئىنتايىن ياخشى، ئۆزى تىرىشچان. مەكتەپتە ئوقۇمىسا بەك ئەپسۇسلىنارلىق ئىش بولىدۇ› دېگەن. بۇ گەپلەرنى ئاڭلىغان ھۆرنىسا ئانا مەيلى قانچىلىك جاپالارنى تارتسىمۇ ئوغلىنى ئاخىرغىچە ئوقۇتۇش قارارىغا كەلگەن.
مەكىت ناھىيىلىك 2-ئوتتۇرا مەكتەپ بۇ ئەھۋاللاردىن خەۋەر تاپقاندىن كېيىن ھەسەنجان مەمەتنىڭ پۈتۈن ئوقۇش پۇلىنى كەچۈرۈم قىلغان. 2002-يىلى ھەسەنجان مەمەت ئەلا نەتىجە بىلەن جۇڭگو گېئولوگىيە ئۇنىۋېرسىتېتى ئىنسانلار مەدەنىيىتى باشقۇرۇش ئىنستىتۇتىغا قوبۇل قىلىنغان. بېيجىڭدا ئوقۇغان تۆت يىل مەزگىلىدىكى پۈتۈن ئوقۇش پۇلى ئاپتونوم رايوننىڭ غەربىي رايونلارغا ئوقۇشقا ياردەم بېرىش مەبلىغىدىن كەلگەن.

2006-يىلى ھەسەنجان تۆت يىللىق ئالىي مەكتەپ ھاياتىنى ئاخىرلاشتۇردى. بۇ ۋاقىتتا بېيجىڭ شەھىرىدە ئالىي مەكتەپ ئوقۇغۇچىلىرى ئىچىدىن تۇنجى تۈركۈمدىكى يېزا كادىرلىق ئىمتىھانى ئېلىنغان بولۇپ، ھەسەنجان بۇ ئىمتىھانغا قاتناشقان. ئۇنىڭدىن ئېتىبارەن ئۇنىڭ ھاياتىدا زور بۇرۇلۇش يۈز بېرىپ بېيجىڭ شەھىرىدىكى تۇنجى تۈركۈمدىكى يېزا كادىرىنىڭ بىرى بولۇپ قالغان. ئەينى يىلى ئۇ بېيجىڭ شەھەرلىك فاڭشەن رايونى ليۇ لىخې بازىرى شىدى يېزىسىغا يېزا كومىتېت مۇدىرى بولۇپ چۈشكەن. بۇ جەرياندا ئۇ يېزىدىكى ئامما بىلەن تەڭ جاپا تارتىپ ئۇلار قانداق قىيىنچىلىققا ئۇچرىسا ياردەم قولىنى سۇنغان. ھەسەنجاننىڭ ئۇيغۇر ئىكەنلىكىنى بىلگەن ئامما ئۇيغۇرلار مەدەنىيىتىگە قىزىقىپ  شۇ يەرلىك كىشىلەرنىڭ مۇنازىرە قىزىق نۇقتىلىرىنىڭ بىرى بولۇپ قالغان. ھەتتا بەزىلىرى ئۇيغۇرچە ئۆگىنىشكە باشلىغان.

2009-يىلى، ھەسەنجان خىزمەتنى ياخشى ئىشلىگەنلىكتىن شەنچۈ رايونى شىدۇ بازىرىغا يۆتكەپ كېلىنگەن. ھەسەنجاننىڭ ھازىر خىزمىتى مۇقىم، ئىككى ئىنىسىمۇ بېيجىڭدا مىللىيچە ئالاھىدىلىككە ئىگە ئاشخانا ئاچقان بولۇپ، ئوغلىنىڭ مۇشۇنداق نەتىجە قازانغانلىقىنى كۆرگەن ھۆرنىسا ئانا ئوغلىدىن چەكسىز پەخىرلەنگەن.

ھەسەنجاننىڭ ئائىلە خىزمەت ئىشلىرى بىر ئىزىغا چۈشۈپ خاتىرجەم بولدى. لېكىن ئۇ يۇرتداشلىرىنى ھەرگىزمۇ ئۇنتۇپ قالمىدى. 2009-يىلى يۇرتقا كەلگەندە يېقىن دوستى پۇلىياز پاختا تېرىشتىن ۋاز كېچىپ باشقا پايدىسى كۆپرەك ئىقتىسادىي زىرائەت تېرىش قارارىغا كەلگەن ئىدى. لېكىن ھەسەنجان مەمەتنىڭ مەدەت بېرىشى ئاستىدا يەنىلا پاختا تېرىشنى داۋاملاشتۇرغان. دېگەندەك 2009-يىلىغا كەلگەندە پاختىنىڭ باھاسى بىراقلا ئۆرلەپ ھەسەنجاننىڭ دوستىغا زور پايدا ئېلىپ كەلگەن.

بۈگۈنكى كۈنلۈكتە تۈر باشقۇرۇش ئىشخانىسىنىڭ مۇئاۋىن باشلىقى بولغان ھەسەنجان مەمەت خىزمەتتىن بوشىغان ۋاقىتلىرىدا بېيجىڭدىكى بەزى شىركەتلەرنى يۇرتىغا بېرىپ مەبلەغ سېلىشقا ئۈندىگەن. ئۇ بۇ توغرىسىدا توختىلىپ: ‹مەن يۇرتۇمنىڭ بايلىق ئالاھىدىلىكىنى چۈشىنىمەن. شۇڭا شىركەتلەرنى يۇرتۇمغا مەبلەغ سېلىشقا ئۈندەش ھەر ئىككى تەرەپكە قوش ئۈنۈم ئېلىپ كېلىدۇ. بىزنىڭ بايلىق مەنبەيىمىز بار، بىزنىڭ كۈچىمىز بار نېمىشقا تەرەققىي قىلالمايمىز؟ بىزدە يەنىلا ئوي پىكىر -كەمچىل. يۇرتداشلارنى باياشات تۇرمۇشقا ئېرىشتۈرۈش ئۈچۈن نامرات بالىلارنى ئوقۇش شارائىتىغا ئىگە قىلىش كېرەك. ئامما بىلىمگە ئىگە بولغاندا، نەزەر دائىرىسى كېڭەيگەندە ھەممەيلەن بىرلىكتە تەرەققىي تاپقان گۈزەل يۇرت بەرپا قىلالايمىز› دېدى.