ئاقيول تورىنىڭ خەۋىرى:شىنخۇا ئاگېنتلىقى، بېيجىڭ تېلېگراممىسى. گوۋۇيۈەن بەنگۇڭتىڭى يېقىندا تارقاتقان «ئاز سانلىق مىللەتلەر ئىشلىرىنىڭ 12-بەش يىللىق يىرىك پىلانى»دا، «12-بەش يىل»دا مىللىي رايونلاردا شەھەر-يېزىلارنىڭ ئۈچ تۈرلۈك ئاساسىي داۋالىنىش سۇغۇرتىسىغا قاتنىشىش نىسبىتىنى 3 پىرسەنت پوئېنت ئۆستۈرۈش، يېزىلارنىڭ يېڭىچە كۈتۈنۈش سۇغۇرتىسى ۋە شەھەر-بازار ئاھالىلىرىنىڭ كۈتۈنۈش سۇغۇرتىسىنىڭ تولۇق قاپلىشىنى ئىشقا ئاشۇرۇش ئوتتۇرىغا قويۇلدى.
  پىلانغا ئاساسەن، دۆلەت «12-بەش يىل»دا مىللىي رايونلاردا جامائەت ساغلاملىقى مۇلازىمەت سىستېمىسى قۇرۇلۇشىنى كۇچەيتىپ، ئېغىر كېسەلنىڭ ئالدىنى ئېلىش ۋە ئۇنى تىزگىنلەش، ساغلاملىق تەربىيەسى، ئانا-بالىلار ساقلىقىنى ساقلاش قاتارلىق جامائەت ساغلاملىقى مۇلازىمەت تورىنى مۇكەممەللەشتۈرۈپ، سەھىيە نازارەتچىلىكى، يېزىلاردا جىددىي قۇتقۇزۇش، روھىي كېسەلنىڭ ئالدىنى ئېلىش ۋە ئۇنى داۋالاش، يېمەكلىك بىخەتەرلىكىنى ئۆلچەپ تەكشۈرۈش قاتارلىق جەھەتلەردىكى ئىقتىدار قۇرۇلۇشىنى كۇچەيتىدۇ. دېھقانچىلىق، چارۋىچىلىق رايونلىرىدا يۇقۇملۇق كېسەل، سوزۇلما خاراكتېرلىك كېسەل، يەرلىك كېسەل ۋە كەسپىي كېسەلنىڭ ئالدىنى ئېلىش، داۋالاش سىستېمىسى بەرپا قىلىش ۋە ئۇنى مۇكەممەللەشتۈرۈشنى تېزلىتىپ، جامائەت ساغلاملىقىغا ئائىت تاسادىپىي ۋەقەلەرنى بىر تەرەپ قىلىش ئىقتىدارىنى ئۆستۈرىدۇ.
   پىلاندا مۇنۇلار ئوتتۇرىغا قويۇلدى: ناھىيە دەرىجىلىك دوختۇرخانىلار(مىللىي تېبابەت دوختۇرخانىلىرىنى ئۆز ئىچىگە ئالىدۇ) باشلامچى، يېزا، بازارلىق دوختۇرخانىلار ۋە كەنت شىپاخانىلىرى ئاساس قىلىنغان ئۈچ دەرىجىلىك داۋالاش-ساقلىقنى ساقلاش مۇلازىمەت تورى قۇرۇلۇشى كۈچەيتىلىدۇ، شەھەرلەردە مەھەللە ساقلىقنى ساقلاش مۇلازىمىتى ئاساس قىلىنغان داۋالاش-ساقلىقنى ساقلاش مۇلازىمىتى سىستېمىسى مۇكەممەللەشتۈرۈلىدۇ. ئۇنىۋېرسال دوختۇرلار مۇھىم نۇقتا قىلىنغان ئاساسىي قاتلام داۋالاش-ساقلىقنى ساقلاش قوشۇنى قۇرۇلۇشى كۇچەيتىلىپ، ئۇنىۋېرسال دوختۇرلارنى ئاساسىي قاتلامدا ئۇزاق مۇددەت مۇلازىمەت قىلىشقا رىغبەتلەندۈرۈش سىياسىتى ئەمەلىيلەشتۈرۈلىدۇ. ئانا-بالىلار مەخسۇس دوختۇرخانىلىرى ۋە ئۇنىۋېرسال دوختۇرخانىلارنىڭ ئانا-بالىلار بۆلۈمى قۇرۇلۇشى كۇچەيتىلىدۇ. ۋىلايەت، شەھەر دەرىجىلىك ئۇنىۋېرسال دوختۇرخانىلار قۇرۇلۇشى كۈچەيتىلىدۇ. يېزىلارنىڭ يېڭىچە ھەمكارلىشىپ داۋالىنىش سۇغۇرتىسىغا قاتنىشىش نىسبىتى مۇقىم ئۆستۈرۈلىدۇ، ئوتتۇرىچە غەملىمە ۋە كاپالەت سەۋىيەسى قەدەممۇ قەدەم ئۆستۈرۈلىدۇ. ئاز سانلىق مىللەت رايونلىرى ۋە مىللىي رايونلاردا ئاياللارنى بالىياتقۇ بوينى راكى، سۈت بېزى راكى بويىچە ھەقسىز تەكشۈرۈش سالمىقى ئاشۇرۇلۇپ، ئاياللارنىڭ ساغلاملىق سەۋىيەسى ئۆستۈرۈلىدۇ.