بارخاندىن ئاۋاز _ ئەزىز ھېيت [ئۇلانما كۆچۈرۈش]

                  نىمە دەيمەن مەن سىزنى ؟

                    ئەزىز ھېيت كۈن


             پەرى دەيمۇ مەن سىزنى ؟شەيتان دەيمۇ مەن سىزنى؟     
             شەيتانلارنىڭ خۇيى بار ئىنسان دەيمۇ مەن سىزنى ؟     
             قامىتىڭىز زەپ ئەپچىل، ھەركىتىڭىز شوخ،يەڭگىل،        
            چېچەن ھەمدە بەك ئوماق توشقان دەيمۇ مەن سىزنى ؟   
             كۈلكىڭىز زەپ يېقىملىق،بېقىشىڭىز مېھىرلىك،     
            مېھرى ئىسسىق،سۆيۈملۈك پاخلان دەيمۇ مەن سىزنى ؟   
             ئاق لەيلىدەك پورەكلەپ،سىز يۈرۇيسىز  ئەركىلەپ،         
             ئوماقىنە ھەم  كەپسىز  ئاسلان دەيمۇ مەن سىزنى ؟      
             كۆزلىرىڭىز ئوت گويا،كىرپىكىڭىز ئوق گويا،     
             يۈرىكىمنى كۆيدۈرگەن گۈلخان دەيمۇ مەن سىزنى ؟  
              سىز كۆڭلۈمنىڭ گۈزىلى،سەر خىل گۈللەر ئېسىلى،      
            خۇش پۇراقلىق،جىلۋىگەر رەيھان دەيمۇ مەن سىزنى ؟                                    
            خۇلقىڭىزدا   نازاكەت، ھۆسنىڭىزدە لاتاپەت،           
             بەرق ئۇرغان جەزبىلىك رىزۋان دەيمۇ مەن سىزنى ؟      
             تۇلۇن ئايدەك مۆكىسىز،سەھەر بولۇپ كۈلىسىز،      
            ماڭا  ئۈمىد بېرىسىز ،چولپان دەيمۇ مەن سىزنى ؟
             ھوزۇر بەرگەچ سۆيۈشمەك،داۋام قىلدى كۈيۈشمەك،           
             جېنىمغا جان ئۇلىغان  جانان دەيمۇ مەن سىزنى ؟            
            سىزگە يۈرەك قانمىدى،ئۇلغايغان ئوت يانمىدى،                    
            سۆيگۈم ئۈچۈن مەڭگۈلۈك ئارمان دەيمۇ مەن سىزنى ؟                                    

بۇ يازمىنى ئاخىرىدا   ئەزىز ھېيت كۈن تەھرىرلىگەن. ۋاقتى  2012-4-12 16:08  

             گۈلنى  كۆردۈم  گۈلنىڭ تۈۋىدە

                  ئەزىز ھېيت كۈن


               گۈلنى  كۆردۈم  گۈلنىڭ  تۈۋىدە،   
               ئاي  كۈلۈپتۇ ئوماق يۈزىدە.      
                كۆرۈپ قېلىپ مېنى تۇيۇقسىز،         
                تىز قىىزاردى يۈزى ۋىللىدە.

               گۈلنى كۆردۈم گۈلنىڭ تۈۋىدە،   
               ماگنت بار  چوغدەك لىۋىدە.        
               كىرىپ كەتكەچ يۈرىكىمگە چوغ،         
               ئېرىپ كەتتى  جىسمىم شۇررىدە.

               گۈلنى كۆردۈم گۈلنىڭ تۈۋىدە،      
               ئاتەش يانار  شەھلا كۆزىدە.        
               پىسسىڭدە بىر كۈلۈپ قويۇپ،      
               يىراقلىدى  مەندىن  جىممىدە.

               گۈلنى كۆردۈم  گۈلنىڭ  تۈۋىدە،     
               گەپ قىلمايلا كەتتى  جىممىدە.     
               ماڭا دىدى  كۆزلىرى« كۈتۈڭ-   
               ئاخشاملىققا  گۈلنىڭ تۈۋىدە!»                 

بۇ يازمىنى ئاخىرىدا   ئەزىز ھېيت كۈن تەھرىرلىگەن. ۋاقتى  2012-4-12 16:07  

                خىلۋەتتىكى گۈل لىرىكىسى


                     ئەزىز ھېيت كۈن


                             1
                  كۆز ئېقىدەك  سۈزۈك سەھەردە
                   يول بەئەينى  ئاتقان ئوقتەك تۈز.
                   يورۇتتى بۇ  خىلۋەت  ماكاننى،
                   يېنىپ تۇرغان بىر جۇپ شەھلا كۆز.
                   نۇردەك يارقىن ،تاڭدەك يېقىملىق،

                    شۇ كۆزدىكى  ئويناق  جۇلالار.
                    شۇ كۆز ئەكسى : شوخ بۇلاقتىكى
                    ۋىلىقلىغان   ئوماق   سىمالار.

                                 2

                     ئۆتتى  شەھلا كۆزلۈك  پەرىزات،
                     جىسمى  نازۇك  يوپۇرماقتەك زىل.
                     تەبەسۇممى- پارلىغان  قۇياش،
                     سىغماس سۈتتەك  ساپلىغىغا  قىل.

                    لالە ئۆتتى  كۆركەم  باھاردا،
                    ئىپار –ئەنبەر   تارالدى  شۇدەم.
                    گۈلدەك رەڭدار  ئۇز  جامالىغا
                    مىڭ سەنەمنىڭ  گۈزەللىكى جەم.
                                 
                                     3
                       
                      تونىۋالدىم  بۇرۇن  كۆرمەيمۇ
                      بالقىپ  چىقتى كۆڭلۈمدىكى ئاي.
                      سۈزۈلگەنتى  خىرۇستال بولۇپ،
                      چۈشلىرىمدە شۇ گۈلدەك  چىراي.

                       بېقىشلىرى ئاھۇنىڭ  ئۆزى.
                       مېڭىشلىرى  جەرەننىڭ ئۆزى.
                       ئۆلۈكىمۇ  كىرگۈزىدۇ  جان،
                       شەپەق بولۇپ كۈلگەن گۈل يۈزى.

                                       4

                          گۈزەل  شئېىر-تەبى سۈرەت  ئۇ.
                          تەبىئەتكە  بېرەر زىننەت  ئۇ.
                           گۈزەللىكنىڭ  ئىلاھى بولۇپ،
                           مەپتۇن دىلغا  بېرەر  لەززەت  ئۇ.

                            ناخشا  ئېيتسا  ئوخشار بۇلبۇلغا،
                             نەپىس ئۇسۇلدا  تالغا-سۇمبۇلغا.
                            تارقىدىدۇ  ئەڭ يېقىملىق  كۈي،
                            سازىنى  ئۇ چالسا  مەرغۇلغا.

                                                            
                             گۈل ھەسەتتە   نازاكىتىگە
                             ئاي ھەيرەتتە  لاتاپىتىگە.
                              توز ھەسرەتتە  قىياپىتىگە.
                              پەرى دەردتە  كامالىتىگە.

                                             5

                             كەملىك قىلار دۇردانە دىسەم.
                             گۆھەردىنمۇ  نۇرانە دىسەم.
                             قەلبى جەننەت-مەڭگۈلۈك باھار،
                              تېپىلغۇسىز  جانانە  دىسەم.

                             مۆجىزە  ئۇ،  مۆجىزە  ئارا.
                             ئاقلىغىغا  سىڭمىسۇن  قارا.
                             قوشقاي تەڭسىز  ھۆسنىگە ھۆسۈن،
                             گۈل قولىدا گۈل ياساپ يانا.

                             چىن ئالتۇننى  زەرگەر تونۇيدۇ.
                            سەرخىل گۈلنى چىۋەر  تونۇيدۇ.
                            پاراسەتكە  يەتسە گۈزەللىك،
                            ئىككى قەلب،-ئالەم  يورۇيدۇ.
               

                كۆزلىرىمىز  تۇتاشقان ئۇپۇق

                          ئەزىز ھېيت كۈن

              سۆيۈشكەندەك زىمىن ۋە ئاسمان
              تۇتاشقاندەك يايلاققا ئورمان،
              قوشۇلغاندەك دېڭىزغا دېڭىز
              يۇغۇرۇلدى ئوتلۇق كۆزىمىز.
              يېيىلىۋاتقان ئاپپاق سۈبھىدەك،
              چىمەندىكى شەپەق رەڭ گۈلدەك ،
              ئاي نۇرىدا يۇيۇنغان كۆلدەك.
              بىر-بىرىگە چۆكتى كۆڭلىمىز.
               بىھۇش بىز بىر تەننىڭ ئىچىدە،
              ئاتەش بىز بىر جاننىڭ ئىچىدە.
               ئېغىز ئەمەس يۈرىكىمىزدىن
               ئېتىلىدۇ  قەلب سۆزىمىز.

               بىر جاھان بىز جاھان ئىچىدە.
                ئويىمىزدا يوق ھېچكىم،ھېچنىمە.
                زامان،ماكان  ئاققان دەريادۇر،
                بىز ئۇنىڭدا  ئۈزگەن بىر كېمە.
                بىز گوياكى خىلۋەت بىر ئارال.
                 يۈزىمىزنى سۆيىدۇ  شامال.
                        
                 بۇلاق ئوخچار تومۇرىمىزدا
                 لىۋىمىزدە شىرىن-شىرىن بال.
                 سۆيگۈ شۇنداق يېپ-يېڭى ئالەم.
                 ئەسىر بولار تەڭ  ئىككى ئادەم.
                 ئىچ-ئىچىدە بولغاچ خوشاللىق،
                 غايىپ بولار قايغۇ،دەرد-ئەلەم.

                  تۇيغىمىزنىڭ ئۆزى مۇزىكا
                 كۆك ئاسماندا قۇش بوپ ئۇچىمىز.
                  تەبىئەتتەك شىرىن سەزگۈدە
                 يېڭى،گۈزەل مەنزىل كۈتىمىز.
                 كۈيىمىز بوپ شاۋقۇنلار دەريا
                 قوشماق دەرەختەك ئاڭلاپ ئۆتىمىز.
                 ئۆركەشلىگەن سۇغا  قېتىلىپ
                 چۆللەرگىمۇ بارار  كۈيىمىز.
                 ئۆزىمىزنى تەبىئەت بىلەن
                 بىر گەۋدىدەك چەكسىز سېزىمىز.
                 سالقىن ھاۋا، ئاققان سۇ بولۇپ
                 يەر قوينىغا  سىڭىپ كېتىمىز.

                  كۆكلەم ئەمەس كۆكلەيدۇ سۆيگۇ
                  يېشىل رەڭدە كېلىدۇ  باھار.
                  كىشنەپ ئۆتكەن ئاتلار ئىزىدىن
                  يەنە چېپىپ ئۆتىدۇ تۇلپار.
                  زەر ۋاقىتقا زىمىندىن،كۆكتىن
                  بۈيۈك ئارزۇ،مۇھەبەت ياغار.
                  ھەر باھاردا يېپ-يېڭى سۆيگۈ
                  جەننەتتەك تۈس ئالىدۇ باغلار،
                  ياش يۈرەكلەر قىزغىن ئىنتىلىپ
                  قۇتلۇق پەيتتە تاپىدۇ دىدار.
                  ئالەم يېڭى،مۇھەبەت يېڭى
                   ياش بىر قىزدۇر مەڭگۈ نەۋباھار !

                  بىز ئايلىنىپ زىمىن –ئاسمانغا
                  ۋاقىتتەك جىمىپ كەتتۇق شۇ قەدەر.
                  مەيىن تۇيۇلسا  دىلبەر كېچىلەر،
                  يەنە كۈندە يېڭى ھەر سەھەر.
                  كۆڭلىمىزدەك چەكسىزدۇر زىمىن،
                   كەچمىش-كەلمىش ئاققۇچى دەريا.
                   ھەر بىر گىيا ئوخشاش سۆيۈملۈك،
                   سۇۋادانلار يەنىلا زىبا.
                   ئوخشاش يولدا ئوخشاش تۇيغۇدا
                    قەدىردانلار ئۆتىدۇ يانا.
                   شۇ ئامراقلار بەلكى بىزدۇرمىز،
                   كەلمىشتىكى بوۋاي-مومايلار.
                   يەنە خوشال مېڭىپ ئۆتىدۇ،
                   ئامراق ياشلار،-غەمسىز جۈپ تايلار.
                   ئېيتىلىدۇ  سۆيگۈ ناخشىسى.
                    ئۈزۈلمەيدىغان دەريا ئۈنىدە.
                    جۇلالايدۇ ئۆلمەس گۈزەللىك،
                    پورەكلىگەن باھار گۈلىدە.
                  
                    ئىككىمىز تەڭ  كەلگەندە ئەسكە ،
                    قېتىپ قالغان ئىدى كۆزىمىز.
                    ۋۇجىدىمىز ئىككى بولسىمۇ
                    ئۇيۇل بولدى جۈپ يۈرىكىمىز.
                   ئىككى كۆڭۈل،ئىككى ئالەمنى،
                   ئۇيۇل قىلغان مۇھەبەت ئۇلۇغ.
                   كەچمىش،ھازىر كەلگۈسىدىمۇ
                   كۆزلىرىمىز تۇتاشقان ئۇپۇق .         

                  ئېزىتقۇ  كۈيى

                    ئەزىز ھېيت كۈن

            غىپپىدە چىقتى ئۇ كېچە قوينىغا
            ئېرى،بالىسىنى  ئۆيدە قالدۇرۇپ.
             ھەم قورقۇش ھەم شادلىق ئىچرە يۈرىكى
             تۇراتى بەك كۈچلۈك دۈپۈلدەپ سوقۇپ.

            شۇ ئەسنا غەرق مەس ئۇخلايتى ئېرى
            خوتۇنى قوينىدا  چۈشەپ ياتقاندەك.
            قىلچىلىك تۇيمايتى  ئالدانغىنىنى
            خورەككە چۈشكەچكە بوغۇزلانغاندەك.

            ھودۇقۇپ قارايتى ئەتراپقا  ئايال،
            ساپما كەش،رۇباشكا كەيگەن ھالەتتە.
            كۆرىنەتى قۇيغان ئاپپاق ئۆپكىدەك،
            چىرايلىق جۈپ كۆكسى تولغان كۆكرەكتە.

         ... شىۋىرلاش كېلەتى قۇلاقلىرىغا
            يوپۇرماقلاردىن،شىرىن ئېغىزدىن.
            ھىملەشكەن ھالىتى بىر جۈپ بەدەننىڭ
            ھېچ بىر  قېلىشمايتى قوشماق مېغىزدىن.
                          
           «  پەرىشتەم سەنسىز مەن ياشىيالمايمەن ...»
           ئېيتىلار ھەسەلدەك،قايماقتەك  سۆزلەر.
           بىھۇشلۇق ئايالنى تارتار  ئىلكىگە
           ئېچىلىش ئىزدىمەس يۇمۇلغان كۆزلەر.

          ...  شىۋىرلاش ئۈزۈلمەس كېچە قوينىدا،
           ھەر كېچە ئېرىشتە  بىھۇشتۇر  ئايال.
           قايتقاندا ئۆزىدىن مىڭ سەسكەنسىمۇ،
           قىلالمىدى  ئۇ پاك بولۇشقا  ئامال.
           
             بىر كەسپى ھاراقكەش بولغاچقا ئېرى،
            خوتۇنى تەلىپى ئەسكە كەچمەيدۇ.
             ھەر كۈنى ھاراقتا يوقالغاچ ئەقلى
             ئۆيىگە ئەس-ھۇشى بىلەن كەلمەيدۇ.
         

            ھەر ئەسنا يوپۇرماق شىۋىرلىشىمۇ،
            سالار شىرىنلىكنى ئايال ئېسىگە.
            جاق تويۇپ ئېرىنىڭ خورەكلىرىدىن،
            قايتىشقا تەلپۈنەر ئەشۇ  كېچىگە.

             كىيىك  قىز

            ئەزىز ھېيت كۈن


          بەكمۇ  شەھلا كۆزلىرى،
          شەلپەر گويا يۈزلىرى،
          كەمدىن-كەمدۇر سۆزلىرى،
           قېچىپ يۈرگەن كىيىك قىز.

           قاپ-قارادۇر قاشلارى،
           يېقىملىق  قاراشلارى،
           جانغا زەنجىر چاچلىرى،
           كۈلۈپ يۈرگەن كىيىك قىز.

           قىيا باققان  كۆزىدە،
           ئاتەش يانغان مېھرىدە،
           يۈتۈپ گۈلنىڭ  تۈۋىدە،
           مۆكۈپ يۈرگەن كىيىك قىز.

          كاككۇكتەك زىل كۈلكىسى،
           بەك جەلپكار جىلۋىسى،
           جانغا ئوتتۇر جەزبىسى،
           قېچىپ يۈرگەن كىيىك قىز.
                     

             جانغا ئوتنى سېپ قويۇپ،
             كۈلۈپ يۈرگەن شوخلۇنۇپ،
             يۈرسەم دەردتە مۇڭلۇنۇپ،
             كۈلۈپ يۈرگەن كىيىك قىز.

                سۆيۈپ ئالار كۈلكە كۈلكىنى
      
                      ئەزىز ھېيت كۈن         

                يوقالمايدۇ  يېقىملىق  كۈلكە
                 ئۇرغۇپ چىقاچ يۈرەك قېتىدىن.
                 ئاشىق كۆرەر مەشۇق قەلبىنى
                 مېھىر يېغىپ تۇرغان چېھرىدىن.

                 ئېغىز ئەمەس ئەسلى كۈلگىنى
                 تاتلىق ھېسقا تولغان كۆڭۈلدۇر.
                 جۈپ لەۋ ئەمەس دەل ئېچىلغىنى
                 پورەك-پورەك كۆرۈنگەن گۈلدۇر.

                 ئاشىق قەلبىر چەكسىز  سۆيۈنەر،
                 كۆرگەندەك بىر يېڭى سەھەرنى.
                 خوشاللىقتا مەشۇق يۈزىدىن
                 يۆتكىمەيدۇ  نىگاھ-نەزەرنى.

                 ئامراق جۈپلەر بېقىشقىنىدا،
                 سۆيۈپ ئالار كۈلكە كۈلكىنى.
                 ئۆز قوينىغا  ئالىدۇ جەننەت
                 ئۇيۇل بولغان بىر جۈپ كۆڭۈلنى.

                   چىغىر يول

                ئەزىز ھېيت كۈن


            قويۇق كەتكەن چاتقال ئىچىدە
           سوزۇلىدۇ  ئىلانسىمان  يول.
           ئەتراپ جىمجىت قېتىپ قالغاندەك،
           شۇمبا  قۇرۇپ  بوپ كەتكەن چۈل-چۈل.

            توقايدىكى خىلۋەت كەپىدىن
            كۆتۈرىلىدۇ  ھاۋاغا  تۈتۈن.
            قىزىق تونۇر كەبى تومۇزدا
            كۆكتە تۇرغان مىس لىگەندۇر كۈن.

             باغجانلىغان  يۇلغۇن تۈۋىدە
             مالچى يىگىت ياتىدۇ  سايداپ.
             زىرىكمەيدۇ  ئادەمسىز  چۆلدە
             قەلەم قاشلىق جۈپتىنى  ئويلاپ.

             ئەتراپ جىمجىت قېتىپ قالغاندەك
             بۇرۇختۇملۇق ئالغان قۇچاقلاپ.
              پەقەت يالغۇز ئاياق  چىغىر يول
             تۇيىلىدۇ  تۇرغاندەك  قاراپ.
             يول ئەمەس دەل چىڭ رىشتىدۇر ئۇ
            
               يۈرەك بىلەن  يۈرەكنى  چاتقان.
               سوزىلىدۇ  ئىككى دىلغا  تەڭ،
              توقايلىقتا بولۇپ  بىر  ئارقان.

               سۇس ئاڭلانغان  شىپىرلاش بىلەن
               كېلەر مەزىلىك تاماقنىڭ ھىدى.
                گالدىن بۇرۇن  كۆڭلى تويىدۇ،
                كۈلۈپ  كەلسە  ئالدىغا  گۈلى.

                 ئايلىنىدۇ  جاڭگال جەننەتكە،
                  شۇ بىر جۈپلەر  بېقىشقىنىدا.
                 ئايرىلىدۇ تەبەسۈم بىلەن،
                 بىر-بىرىگە    قېنىشقىنىدا.

                 كۆرۈنىدۇ  جاڭگالمۇ  گۈزەل،
                  كۆڭۈللەردە بولغاچ گۈزەللەك.
                  خوشاللىقتا قوتۇرماچ نانمۇ
                 بىلىنىدۇ  شۇنچە مەزىلىك.

                سۇس ئاڭلانغان شىپىرلاش بىلەن
                دىلبەر كېتەر  كەپىگە ئۇزاپ.
                كۆيدۈرەلمەس خوشال كۆڭۈلنى،
                يالىلدىغان پىجغىرىم  ئاپتاپ.

                قەدىناستۇر  تونۇش چېغىر يول
                سەزگۈسىگە ھەر كۈنى ھەمراھ.
                ئېلىپ بارار  كەپە ئۆيىگە
                جۈپ كۆزىنى يۇمسىمۇ ھەتتا.

               يول سوزۇلغان بىر جۈپ قەلبكە،
                ئايرىمايدۇ دىللارنى قىل-قىل.
                چۆللۈكتىمۇ ئويلايدۇ  ئۇلار،
                 كۈنلىرىنى مەنىلىك،ئېسىل.
      
            كەتكۈسى يوق ئاۋات شەھەرگە
            چىققۇسى يوق ئاسپالىت يولغا.
             ئايلانغاچقا  ئۇلار جاڭگالدا
             ئايرىلالماس گۈل ۋە بۇلبۇلغا.
            

             تەسىراتقا چۈمەر چىغىر يول،
            تۇرغاچ ھايات ئىزناسى بولۇپ.
            تۇرار يەنە يەر يۈزى ئەمەس
            ئىككى كۆڭۈل ئارا سوزۇلۇپ.
                  

             سۆيگۈ تىلى

             ئەزىز ھېيت كۈن

       يەرگە باققان جىمجىت ئاسماندەك،
       مەڭگۈ-مەڭگۈ  سىزگە قارايمەن.
       دېڭىزدىكى تەنھا ئارالدەك،
       ئۈمىد قۇشۇم سىزنى ساقلايمەن.

       بىلگىنىمدە كېچە  ئۆزۈمنى،
       تەلپۈنىمەن سىزگە چولپانغا.
        دەريا بولۇپ ئېقىپ  كېلىسىز،
        ئايلانسام گەر چۆل-باياۋانغا.

        بولۇپ  قالسام سايدا قورام تاش،
        شامال بولۇپ سۆيۈپ ئۆتىسىز.
        قالسام ئازاپ،دەرد  يامغۇرىدا،
         ھەسەن-ھۈسەن بولۇپ كۈلىسىز.

         قىشتا توڭۇپ ھالسىرغىنىمدا،
         گۈزەل باھار بولۇپ كېلىسىز.
         تومۇز ۋاقتى  چاڭقاق دىلىمغا،
         زەمزەم بولۇپ ئېقىپ كىرىسىز.

                   سۆيگۈ

               ئەزىز ھېيت كۈن


         ئولتۇرىمەن ئۆزۈم  يىگانە،     
         سۇ ئاستىغا چۆككەن تاشسىمان.         
         كۆرۈنمەيدۇ  كۆزۈمگە دۇنيا،      
         ئويۇمدا سىز ئاي يۈزلۈك جانان.

          سىزنى ئەسلەش نەقەدەر گۈزەل!      
           شۇنچە شىرىن، شۇنچىلىك ھوزۇر.     
         ئۇنۇتتۇممەن قايغۇ  ئازاپنى،   
        كۆزلىرىمدە چاقنار خوشال نۇر.

           سىز گوياكى كۆزۈم گۆھىرى،   
           ئېچىلغان گۈل كۆڭۈل بېغىمدا.   
          كۆز ئالدىمدىن  كەتمەيسىز دائىم،،
          ياد ئېتىمەن  سىزنى دىلىمدا.  
         
           بەرگۈم كېلەر  ئېپ  چۈشۈپ ئاينى،  
            قوشۇپ يەنە بۇ ئەزىز جاننى.      
           كېلىڭ گۈزەل تاڭ سەھەر بولۇپ،     
           كۈلكىڭىزنىڭ بولاي قۇربانى.                     

            سىز چىقسىڭىز دالىغا ئەگەر

               ئەزىز ھېيت كۈن


           ساپ ھاۋالىق گۈزەل تاڭ سەھەر
         سىز چىقسىڭىز  دالىغا ئەگەر،
         خىجىل بولۇپ  قۇياش مۆكۈنەر.
            
         سىز چىقسىڭىز  دالىغا ئەگەر،
         تاراپ سىزدىن ئىپارۋە ئەنبەر،
         ئېچىلىدۇ ھۈپپىدە  گۈللەر.

          سىز چىقسىڭىز دالىغا ئەگەر
          نۇرغا  چۈمۈلۈپ ئاسمان بىلەن يەر،
          سىزدەك تاتلىق كۈلىدۇ گۈللەر.

         
          سىز چىقسىڭىز دالىغا  ئەگەر،
           تەڭلا يورۇپ گۈزەل بىر سەھەر،
           ئالەم كۆزۈمگە گۈزەل كۆرىنەر..

                سۆزىڭىز بار دىيەلمەيدىغان....

                سۆزىڭىز بار دىيەلمەيدىغان
                ئايان قىلدى شەلپەر يۈزىڭىز.
                سۆزلەپ بەردى پاك سۆيگۈڭىزنى
                يەرگە باققان ئوتلۇق كۆزىڭىز.

               سۆزىڭىز بار دىيەلمەيدىغان
               ئايان قىلدى تاتلىق كۈلكىڭىز.
                قىلدى مېنى ئېرىپ كەتكەن شام،
                ماگنت بولۇپ  ساپ-،پاك كۆڭلىڭىز.

                سۆزىڭىز بار دىيەلمەيدىغان
                قېچىپ يۈرگەن جەرەن ئۆزىڭىز.
                ئورناپ كەتتى قەلبىمگە چوڭقۇر
                ئېيتماق بولغان يۈرەك سۆزىڭىز.

                سۆزىڭىز بار دىيەلمەيدىغان
                ئايان قىلدى مۇڭلۇق كۆزىڭىز....
                لىۋىڭىزدىن شوراپ ئالمىسام
                دىيەلمەيسىز مەڭگۈ ئۆزىڭىز !
                     

قاچانغىچە مۇشۇنداق قىزلارغا ئوتلۇق لىرىكا يىزىپ ، كويىشىڭىز ئاخىرلاشماي بويتاق ئوتۇپ كىتەرسىز ؟!

باشقۇرغۇچىلار يۇقارقى ئىنكاسنى ئوچۇرۋەتكەن بولساڭلار ، كۈن ئەپەندى چاقچىغىمغا خاپا بولۇپ كەتتى !

              كۆرسەتمەيدۇ قۇياش كەينىنى

                ئەزىز ھېيت كۈن

             تەبەسۇمنى كۆرۈپ ئۆتكۈم  بار،
             كۆرگۈم يوقتۇر  شەيتان پەيلىنى.
              دۇنيا گۈزەل تەبەسۇم بىلەن،
             كۆرسەتمەيدۇ قۇياش كەينىنى.

             زاۋال كۈلگەن گۇگۇم پەيتىدە،
             قۇياش ئۇزار كۈلكىسى بىلەن.
             چىن ئىنسانلار ئەجەل كەلسىمۇ،
              كۈلكە بېرەر سۆيگۈسى بىلەن.

             دەريا كۆڭۈل،دېڭىز كۆڭۈللەر،
             كۆتۈرىدۇ يەرنىڭ  يۈكىنى.
             ئارتۇق كەتمەس ئالى خىسلەتتە،
              قۇياش دىسە ئۇلار  قەلبىنى.

              كۆرسەتمەيدۇ قۇياش كەينىنى،
              ئەسلىتىپ ئېسىل ئادەم قەلبىنى.
              ئەسلى ئىككى يۈز بولسىمۇ ئادەم،
              كۆرسەتمىگەي  كۈندەك كەينىنى.