بارخاندىن ئاۋاز _ ئەزىز ھېيت [ئۇلانما كۆچۈرۈش]

   باھار سەنمۇ، مېنى  سېغىندىڭمۇ ؟  

       ئەزىز ھېيت كۈن
                                                                                
ئەي باھار سەن گۈل قىز ،سېغىندىم سېنى                                      
مەن زىمىن،سەن يېشىل دېڭىز،سېغىندىم سېنى.                                 
باھار  سەنمۇ مېنى سېغىندىڭمۇ ؟   


كېتىپ قالدىڭ سەزدۈرمەستىنلا
يىراقلىغان  كۆپ-كۆك ئۇپۇقتەك                                 
سىلجىپ كەتكەن مامۇق بۇلۇتتەك                                    
ئۇچۇپ كەتكەن رەڭدار لەگلەكتەك.                                      
مۆكۈۋاتقان كەچكى شەپەقتەك                                   
چۆكىۋاتقان  يېشىل ئارالدەك                                       
ئۇزاپ كەتكەن مەيۈس ئايالدەك                                 
يوشۇرۇنغان گۈزەل جەننەتتەك                                   
چۈشلەردىكى غۇۋا لەززەتتەك                                         
كەينىڭدە بىر قوڭغۇر تەن قالدى.                                       
نە تەن زىمىن،-زور بەدەن قالدى.                                   
ئۈستۈمگە يېپىلغان بىر گىلەم ئىدىڭ.
مېنى باغاش ئەتكەن ئۇز سەنەم ئىدىڭ.                        
يېيىلغان،يىغىلغان بىر  باھار ئىدىڭ.                        
كۆزۈمگە،كۆڭلۈمگە چىن دىلدار ئىدىڭ                                 
ئەي باھار سەن گۈل قىز،سېغىندىم سېنى.                                       
مەن زىمىن،سەن يېشىل دېڭىز سېغىندىم سېنى.                           
باھار سەنمۇ  مېنى سېغىندىڭمۇ ؟


سەن كەلگەن ئوتلۇق تەلپۈنۈش بىلەن                                 
ئەگىز سۈيى-ھاياجان بولۇپ.                                      
ئويغا يۈگۈرگەن زور قىيان بولۇپ.                                    
لىۋەن كۆرۈنگەن مەجنۇنتال بولۇپ                                 
ئۇسۇلغا چۈشكەن چوكانتال بولۇپ.                                 
ھۈپپىدە ئېچىلغان چېچەكزار بولۇپ                                 
گۈزەل كۆكلەم -يېشىلزار بولۇپ                                    
قۇشلار سايرىغان چىمەنزار بولۇپ                                       
تەبىئەت قىزى - گۈل باھار بولۇپ.                                 
زىمىندا ئۇرغۇغان ئوتلۇق مۇھەبەت                                 
يىلتىزدا ئۇرغۇغان ئوتلۇق مۇھەبەت                                    
بىخلاردا ئۇرغۇغان ئوتلۇق مۇھەبەت                                 
يۈرەكتە ئۇرغۇغان ئوتلۇق مۇھەبەت                                 
ياڭرىغان جۇشقۇن دەريا كۈيىدە                                       
باغدا سايرىغان كاككۇك ئۈنىدە.                                    
تاراتقان شۇ كۈينى مەيىن شوخ شامال.                                 
ۋادا پەرىزاتتەك تۈزگەن رەڭ-جامال.                                 
باھار سەن ئىدىڭ قۇچاق ئاچقان قىز.                                      
يېشىل قۇچىقىڭ- دولقۇنلۇق دېڭىز.                        
ئاھۇ-كىيىكلەر يايرىغان تاغدا.                                   
گۈللەر تەبەسۇم ئەيلىگەن تاڭدا.                                 
دىماقنى يارغان جىگدە چېچىكى.                                   
باغقا يۈگۈرگەن قىزنىڭ يۈرىكى.                                 
ئاشىق كېچىدە يۆلەنگەن ئايغا.                                   
دالا تار كەلگەن بىغەم جۈپ تايغا.                           
دەل-دەرەخلەر چىڭ قۇچاقلاشقان                          
يۆگىمەچلەرمۇ بەك ئامراقلاشقان.                                
ھەممىگە ھاياجان تاراپ كەتكەن.                                 
يۇلتۇزلار ھەۋەس قىپ قاراپ كەتكەن.                                
زىمىننى سۆيگەنتىڭ ئەي گۈزەل باھار،                                    
كۆڭۈلنى سۆيگەنتىڭ ئەي دىلناز نىگار.                                 
يۈتۈپ بىردىن كاككۇكلار ئۈنى                                    
كۆرەلمىدىم ھېچ يەردە سېنى.                              
زىمىندا،كۆڭلۈمدە ئۇچۇپ خازانلار                          
زىمىنغا،كۆڭلۈمگە يېغىپ كەتتى قار.                                 
زىمىن سەزگۈسىدە ئەسلىدىم سېنى                                    
كۆڭلۈم تەلپۈنىشىدە ئەسلىدىم سېنى                                   
ئەي باھار سەن گۈل قىز،سېغىندىم سېنى.                              
مەن زىمىن ،سەن يېشىل دېڭىز سېغىندىم سېنى.                                          
باھار سەنمۇ  مېنى  سېغىندىڭمۇ؟  


كۆرىنەر ئاپپاق قىش لەھەڭ كۆزىدەك.                             
زىمىننى،كۆڭۈلنى باسىدۇ تىترەك.                              
ھەممىنى ئالىدۇ مەھكەم قۇچاقلاپ.                                 
مۇدھىش قۇچىقىدا ئۇزاق ئازاپلاپ.                                 
قويىدۇ قۇياشنى قىلىپ مېھىرسىز.                                    
كۆرسىتەر ئاينىمۇ سۆرۈن- يېقىمسىز.                                
مىڭ-مىڭ تونىتىدۇ باھار قەدرىنى                        
ۋاپادار،مېھىرلىك ،ئۇز يار قەدرىنى                                    
ئەي باھار سەن گۈلقىز،سېغىندىم سېنى                              
مەن زىمىن،سەن يېشىل دېڭىز،سېغىندىم سېنى.                     
باھار سەنمۇ  مېنى  سېغىندىڭمۇ ؟  
                          
   
  بىر سېنى ئەسلىدىم  قاچان كېلىسەن؟                           
سەزگۈمنى سەزگۈڭدە جەزمەن سېزىسەن.                           
مېنىڭدىن يىراقلاپ كىمنى كۈتىسەن ؟                          
سېزىمەن ،بىر مېنى ئەسلەپ ئۆتىسەن.                              
ئەي باھار سەن  گۈل قىز،سېغىندىم سېنى.                           
مەن زىمىن،سەن يېشىل دېڭىز،سېغىندىم سېنى.                        
باھار سەنمۇ  مېنى  سېغىندىڭمۇ ؟


     2010-يىل،1-ئاي.

                   سۆيگۈ تۇتقۇنى

      
                      ئەزىز ھېيت كۈن

  
            ياستۇقنى سۇغاردى قىزنىڭ كۆز يېشى،
            چىققاچقا بىر كېچە ئىسەدەپ يىغلاپ.
            ئامبۇردەك موجۇيتى يۈرەك-باغرىنى،
            قەلبىگە ئەڭ چوڭقۇر ئورنىغان ئازاپ.

            مەغرۇرلۇق قىپ قويغاچ قىشتىكى قۇياش،
            ئاشىققا ياغدۇردى سوغۇق  تەبەسۈم.
            قاقلانغاچ ئاشىغى مۇزرەڭ  چېھىرگە،
            قاي چاغدا كېلىشى بولدى نامەلۇم.

            ئاشىغى سۆيگۈنىڭ بوپ دىۋانىسى
            يامغۇردا يۇيۇنغان دەرەخمۇ بولغان.
            تومۇزدا تەلمۈرۈپ مىڭ كۆزى بىلەن،
            پىژغىرىم  ئاپتاپتا  كاۋاپمۇ  بولغان.

            بار ئىدى شۇ سىما  ھەر بىر باھاردا،
            ئاشىغى قىلچىلىك  ئۈمىد ئۈزمىگەن.
            ھەر كۈنى ئوخشاشلا تاڭلار ئاتسىمۇ،
            ئۆزىگىلا تاڭنى ئاتتى دىمىگەن.
                     
            قىز سەزگەن ئۆزىنى ئاسماندىكى ئاي ،
            ئاشىقنى يەردىكى قارا  پاتقاق-لاي.
            ئاخىرى يوقالغان قىزنىڭ  كۆزىدىن،
            سوغۇق تەبەسۇمدا توڭلاپ چىدىماي.

             ئاي ۋە يىل ئۆتسىمۇ قويغاچ كۆرۈنمەي،
             قىز چۈشكەن ئاسماندىن سېرىلىپ يەرگە.
             ئۆزىمۇ سەزمەستىن تەلپۈنگەن چەكسىز،
              ئەشۇ ئاشىغىنى   كۆزگە سۈرەرگە.

              سېغىنىش ئىچىدە ئۆتتى ئۇزاق قىش،
              كۇلۈپ كەلدى يەنە يېڭى بىر باھار.
              ھەر كېچە چىقتى ئۇ ئېسەدەپ يىغلاپ،
              ئەشۇ ئاشىغىنى  ئاۋال كۆرگەچ خار.

              بىر كۈنى قىز قالدى كۆزگە  ئىشەنمەي،
              تۇراتى  ئاشىغى  كۆكتىن چۈشكەندەك.
              قىز بىر تۈپ دەرەخكە  قالدى يۆلنىپ،
              بولۇپ كۆكرىكىگە بىر  ئوق تەگكەندەك.

              قارىدى ئاشىقنىڭ  چېھرىگە  ئۇزاق،
                       
             چىن كۆڭلى،تۇتاشقان يۈرىكى بىلەن...
             ئۆزىنى ئۇنۇتتى  ئاشىغى  ئۇنى،
             كۆتۈرگەچ  توم ،بەردەم بىلىكى بىلەن.

             قىز شۇ تاپ پاخلاندەك قانچە مۇلايىم؟
             ئېرىگەن ۋۇجۇدى  سىماپتىن  ئارتۇق.
             پاختا  بەدىنىدەك  يۇمشاق ئەمەستۇر،
             ئۆپكىدەك جۈپ كۆكسى گوياكى ياستۇق.

             يۈرىكى چىن خالاپ بولغان بىر ئولجا،
              ئېرىشتە  يوقالغان  ئەس-ھۇشى پۈتۈن.
              كىم ئولجا ؟ كىم ئوۋچى؟ ئايرىش ھاجەتمۇ ؟
              تەڭدۇر جۈپ يۈرەكتە  دۈپۈلدىگەن ئۈن.

              كېلەر ئاشىغىغا  يۆلەنگەچ شۇ قىز،
               جۈپتىگە ئىچ-ئىچىدىن قىلىپ ئامراقلىق.
               قەلبىدىن ئېتىلار  بەخت كۈلكىسى،
               سۆيۈملۈك چېھرىدە باردۇر ئوماقلىق.

                 كەكلىك چۈشى

                  ئەزىز ھېيت كۈن

   
            ئامرىغىم قەپەزدىن بىز كەتتۇق ئۇزاپ،
            يېتەيلا دەپقالدۇق گۈزەل تاغلارغا.
            يېنىمدا  سەن بولساڭ قىلچە ئارمان يوق،
            سىڭىمىز  مەڭگۈلۈك يېشىل باھارغا.

            قاي كۈنى بىز چۈشتۇق مۇدھىش قەپەزگە،
             ئەركىنلىك بىز بىلەن كەتتى خوشلىشىپ.
            نالىمىز-زارىمىز  بولدى تاماشا،
            ئادەملەر قەپەزنى  ئالغاچ ئورىشىپ.

            ھەر كۈنى پەرياد قىپ ئۈنىمىز پۈتتى،
            كەلمىدى شەپقەتسىز  ئىگىمىز رەھمى،
            كۈتمەيتۇق دان،سۇنى،ئەمەك بولۇشنى،
            كۈتەتۇق  چىن دىلدىن ئەركىنلىك ئەسلى.

             سايراش بوپ تۇيۇلدى  قاغىشلىرىمىز
             ئىگىمىز بىلمىگەچ  قۇشلار  تىلىنى.
             بىزلەرنى قەپەزدىن ئەيلەيتى ئازات
             ئىگىمىز چۈشەنسە  ھايات  سىرىنى.
                     
           قاغىدۇق،قاغىدۇق،ئاخىرى ھاردۇق،
           سەن ئۇردۇڭ ئۆزۈڭنى تۆمۈر قەپەزگە.
           قەلبىمدىن چىن سۆيگەن ئاشىغىم ئىدىڭ
           ھۆرلۈك دەپ جان تەسلىم قىلدىڭ ئەجەلگە.

            سەن بىلەن تەڭ  ئۆلدى نازۇك  قەلبىممۇ،
            بوپ قالدىم قەپەزدا  كەكلىك  ھەيككىلى.
             نەس ئىگەم،پەس ئىگەم كۈندە نەچچە ۋاق
             ھىجىيىپ كېلەتى  مېنى كۆرگىلى.

            ھۆرلۈك ھەم سەن ئۈچۈن كېچىپ ھەممىدىن،
            دان يىمەي ،سۇ ئىچمەي ياتتىم نەچچە كۈن.
            كۆزۈمنى بىر قېتىم   ئاچمىدىم  ھەتتا
            ئېچىلسىمۇ قەپەز  ئىشىكى  پۈتۈن.

            يۈرىكىم   ئازاپتا  كەتكەنتى مۇزلاپ.
            سوغۇق قىش ھاۋاسى قىلمايتى تەسىر.
           پەس ئىگەم  ئاجىزنى قىينىغان ئىپلاس،
           مەن ئۇنىڭ  قولىدا چەيلەنگەن ئەسىر.

           مىڭ تەستە  شۇ مۇدھىش قەپەزدىن چىقتىم
                     
          يۈتەي دەپ ئويلىغاچ  قارلىق  دالىدا.
          ئاخىرقى كۆز يېشىم  مۇزلارغا  تامدى،
          روھىم كۆككە ئۇچتى ئېيتىپ  ئەلۋىدا.

           ئامرىغىم  مەن كەلدىم  يېنىڭغا شۇنداق،
           سەن كەبى تەڭسىزلىك،قۇللۇققا كۆنمەي.
          ئىككىمىز  تاغلارغا  بولدۇق  ئايلىنىپ،
          جىلغىلارغا  ئاققان  سۇ بولۇپ  سۆزلەي.

           قاغىشىمىز تۇتۇپ پەسكەش ئىگىمىز،،
           كىرىپتۇ ئاقىۋەت  قەپەز-زىندانغا .
           تەڭشىكى ھامان بار ئۇزۇن جاھان بۇ
           ھالاكەت  كېلىدۇ  شۇملۇق قىلغانغا.

           ياشاشقا ھەققى بار ھەر بىر  جانلىقنىڭ
           ئەركىنلىك ئەزەلدىن ھەممىگە مەنسۇپ.
           ھەر جانلىق كۆرمەيدۇ ياخشى ئاقىۋەت،
           ئۆزگىگە چىن مەنسۇپ ھۆرلۈكنى بوغۇپ.

           بىزنىڭ ۋەتىنىمىز-مۇققەدەس تاغلار،
           نەسلىمىز بەرمەكتە جىم تاشلارغا ئۈن.
           ھاۋالىق شۇ جايلار نەقەدەر  گۈزەل
           چىن نىسىپ مەڭگۈگە مۇھەبەتلىك كۈن.

             ئامرىغىم  سەزگەنسەن سۈزۈك سۇلاردىن،
             جىلغىدا  ياڭرىغان سادايىمىزنى.
              شۇ سادا  سۆزلەيدۇ  ھەممە-ھەممىگە
              ھۆرلۈككە  ئاتالغان ھىكايىمىزنى.

              ئامرىغىم بىكارغا  بولمىدۇق قۇربان،
              نەسلىمىز ئەبىدى  تاغقا  ئۇچىدۇ.
              ياۋىلىق- ئەسلىدە  كەكلىك ھۆرلىكى،
              نەسلىمىز  قۇل بولماي ھۆر بوپ ئۆتىدۇ.

              تاغلارنىڭ روھىدۇر  ھۆرلۈك ،مۇھەبەت،
               ئەشۇ روھ  مۇجەسەم  قۇشلار  روھىغا.
                چۈش ئەمەس رىياللىق قەلبىمىزدە ئۇ،
                يوقالماس ئىستەكتۇر ھەر قۇش دىلىدا.

                   بەلكىم

                ئەزىز ھېيت كۈن


           بەلكىم گۈزەل خىيال سىزنى كۆرگىنىم،
           بەلكىم ماڭا  تۇيىلارسىز  چۈش بولۇپ.
           بەلكىم قىلچە كۈتمىگەنسىز سىز  مېنى،
           بەلكىم  مەندىن  يىراقلارسىز  قۇش بولۇپ.

            بەلكىم ئارتۇق ئىشتۇر سىزگە  كۆيگىنىم،
            بەلكىم سىزگە تۇيىلارمەن   كۈلكىلىك.
            بەلكىم مېنى ئويلىماسسىز  بىر مىنۇت،
            بەلكىم سىزگە  قىممىتىم يوق قىلچىلىك.

             بەلكىم  مېنى شۇنداق تەقدىر كۈتكەندۇ،
              بەلكىم بىزگە  قوشۇلماسلىق  تەقدىردۇر.
              بەلكىم چەكسىز  تەلپۈنەرسىز قەلبىمگە،
              بەلكىم قەلبىڭىز مەشۇغۇمنىڭ  قەلبىدۇر.

              بەلكىم  تىزلا قوشىلارمىز  ئىككىمىز،
              بەلكىم  جۇپتۇر  ئەزەلدىنلا  كۆڭلىمىز.
               بەلكىم بىز بىر-بىرىمىزنى كۈتىمىز،
               بەلكىم  قوشماق مېغىز بولۇپ  ئۆتىمىز.
                     

                 گۈزەل  كۈيلەر  

                ئەزىز ھېيت كۈن      
   
           يەڭگىلگىنە تەۋرىنىدۇ  دەرەخلەر،
           ئويچان ،مۇڭلۇق كۆزدۇر گويا كۆك ئاسمان.
           زىمىن،ۋاقىت تۇيىلىدۇ  ناخشىدەك،
           ئوخچۇپ  تۇرغان بۇلاقلاردا  ھاياجان.

            نىمە سىر بار خىجىل بولغان گۈللەردە؟
            نازۇك جىسمى نىمە ئۈچۈن تىترەيدۇ؟
            يوپۇرماقلار  ئېيتىپ بەرگەن كۈيلەردە،
            نازۇك سېزىم ،ئىللىق تۇيغۇ  تەۋرەيدۇ.

            شىرىن چۈشتەك بەك گۈزەلدۇر كەڭ ۋادا،
            خۇمالاشقان  ئاشىق-مەشۇق كۆزىگە.
            جۇشقۇن،ياڭراق ئۇلۇغ دەريا شاۋقۇنى،
            ئوخشار  قايناق مۇھەبەتنىڭ  كۈيىگە.

            گۈزەل دۇنيا،گۈزەل جۇشقۇن بۇ ھايات،
            ياڭرار كۈيلەر  سۆيگۈ-مېھىر تاشقىنى.
            ئۆتسۈن ھايات گۈزەل،لىرىك ناخشىدەك،
            ئۈزۈلمىسۇن مەڭگۈ بەخت  شاۋقۇنى.
                          

            مەڭگۈلۈكتۇر ۋاقىت ئەگلىكى

                ئەزىز ھېيت كۈن

        
           سايلىق ھاسىل تاشلار يىغىلسا
           كۈرمىڭ  يۇلتۇز جەمدۇر ئاسمانغا.
           رەت-رەت بولۇپ ئۆسكەن كۆچەتلەر،
           ئايلىنىدۇ  چەكسىز ئورمانغا.

            سۇ بىلەن ئوت  بىللە  تۇرالماس.
            قاغا مەڭگۈ  بۇلبۇل بولالماس.
            يېپىنسىمۇ قوي تېرىسىنى،
            قانخور بۆرە پاخلان ئاتالماس.

            تۈلكە باپلار  ئاخىر ئۆزىنى،
            مىڭ يىلدىمۇ بىلىنەر ئەگرى.
             ۋاپاسىزلار كېلەر بىر  جايغا،
            ئۆزگەرمەيدۇ  ياخشىلار قەلبى.

            مەڭگۈلۈكتۇر ۋاقىت ئەگلىكى.
            ئايرىلىدۇ  ئالتۇن ۋە قەلەي.
            ياخشى-ياماننى بىلگىلى بولماس،
            ۋاقىت بىلەن چىن ئۆلچەپ كۆرمەي.

        گۈللەر  گويا  تەبىئەتنىڭ  قىزلىرى

              ئەزىز ھېيت كۈن

         قىن-قىنىغا  سىغماس باھار  سۇلىرى،
          ئېرىقلارغا پاتماي ئويناپ ئاققىدۇ.
          مەستانىدۇر باغدا كۈلگەن كاكۇكلار،
         سالقىن ھاۋا دىلغا زەپمۇ  ياققىدۇ.

         ۋىچىرلايدۇ ھاياجاندا  قالغاچلار،
         زەپمۇ  گۈزەل كۆرىنىدۇ ھەممە يەر.
        تېشىپ تۇرغان خوشلىغىغا  باھارنىڭ،
        تەڭكەش بولۇپ كۈلگەن گۈللەر جىلۋىگەر.

        گۈللەر، گۈللەر،-تەبىئەتنىڭ  قىزلىرى،
        تاراپ كېتەر يۇلتۇزلارغا  شوخلىغى.
        پورەكلىرى-گويا قىزلار لەۋلىرى،
         تەبەسۇممى-خوشاللىقنىڭ بۇلىغى.

        دىلدا باھار تۇغدۇرىدۇ گۈل مېھرى،
        تۇيىللىدۇ دىلغا زەپمۇ سۆيۈملۈك.
        ئاتا قىلغاچ  كۆڭۈللەرگە خوشاللىق،
         تۇيۇلىدۇ  باھار پەسلى كۆڭۈللۈك.
              

قىز  قەلبى

  ئەزىز ھېيت كۈن

قىزنىڭ كۆڭلى بۇلۇتلۇق ئاسمان،
گاھ ئېچىلىپ،گاھى تۇتىلار.
قوشمىسىدا ماراپ تۇرار قىش،
تەبەسۇمىدا   كۈلىدۇ  باھار.

قىزنىڭ كۆڭلى نازۇك شۇ قەدەر،
زىللىغىدا  سىغدۇرمايدۇ قىل.
قەدىرلەشنى  كۈتكەن گۆھەر ئۇ،
ئوزىغىدۇر مەڭگۈ شىرىن تىل.

قىزنىڭ كۆڭلى پىنھان باھاردۇر،
باشلاپ كېلەر  گۈزەل جەننەتنى.
ئاشىغىغا  بولۇپ سادىق يار،
ئۆمۈر بويى بېرەر  لەززەتنى.

قىزنىڭ كۆڭلى ماگنت  دۇنياسى،
كاۋاپ قىلار  تاش يۈرەكنىمۇ.
قىزنىڭ كۆڭلى مېھىر ئالىمى
بويسۇندۇرار  ئەزىمەتنىمۇ.

        سۆيگۈ قۇدىرتى

        ئەزىز ھېيت كۈن

    ئاققىنى دەريامۇ؟ ياق، ئۇلۇغ سۆيگۈ،
    تاغلاردىن ئېتىلغان چەكسىز ھاياجان!
    چاقنىغان يۇلتۇزمۇ؟ ياق ،بۈيۈك سۆيگۈ،
    زىمىنغا تەلپۈنگەن  يۈكسەك بىر ئارمان.

   قوشۇلۇش دىمەكتۇر- سۆيگۈ  دىمەكلىك،
   سۆيۈشەر ئەبىدى يەر بىلەن  ئاسمان.
   ئۇلۇغلۇغ  تۇغۇلار ئۇلۇغ سۆيگۈدىن،
   سۆيگۈدە يارالغان مۆجىزە جاھان.

   سۆيگۈدە يارالدى ھىملەشكەن تاغلار،
   سۆيگۈدە كېڭەيدى  پايانسىز ئورمان.
   سۆيگۈدە ئۇلغايدى بارچە ھاياتلىق،
   سۆيگۈنىڭ مىۋىسى-ئەبەدى ئىنسان.

  ئۇلۇغلۇغ- سۆيگۈدە،قۇدرەت –سۆيگۈدە،
  ئەڭ ئۇلۇغ دەريادۇر خەلق سۆيگۈسى.
   بەھەيۋەت تاغلاردا خەلقنىڭ قەددى،
   سۆيگۈدە يارىلار جەننەت  كەلگۈسى.
               

       ئۇنۇتسىڭىزمۇ  قويۇڭ  بىر ئەسلەپ

          ئەزىز ھېيت كۈن


        ئۇنۇتسىڭىزمۇ  قويۇڭ بىر ئەسلەپ،
         ئاق يول، خۇشلۇق  تىلىگىنىمنى.
         سەمىمى  ھەم مەڭگۈ ئاق بىلىڭ،
         دەريادەك كەڭ،ئوچۇق  كۆڭلۈمنى.

         كۆيدۈم  سىزگە  مىننەت-تاماسىز،
         تاللىشىڭىزغا قىلدىم  ھەم ھۆرمەت.
         كەتسىڭىزمۇ  كۆزۈمدىن يۈتۈپ،
         بىلدۈرمىدىم  قىلچىلىك  نەپرەت.

          بەختىڭىزدىن خوشال  كۈلگەندە،
          سۆيۈنگۈچى دەپ بىلىڭ  مېنى.
          بەختسىزلىك  قاخشاتسا ئەگەر،
          كۈيۈنگۈچى دەپ بىلىڭ مېنى.

          ئۇنۇتسىڭىزمۇ قويۇڭ بىر  ئەسلەپ،
          بىلدۈرىمەن مەڭگۈ ئاق تىلەك.
          ھېچ بولمىسا   دوستلۇق مېھرىنى،
          بېرىڭ ماڭا   قايتا كۆرۈشسەك.

                   نازۇك ئاي

                 ئەزىز ھېيت كۈن

        بالقىغاندا  چېھرىڭىزدە تەبەسۇم،
        ئىختىيارسىز  كۈلكىڭىزدە ئوۋلاندىم.
        كەتسىڭىزمۇ مەندىن جىمجىت يىراقلاپ
        كۆرۈنمەس يىپ-رىشتىڭىزدە  باغلاندىم.

         ئويلاپ قالدىم  سىزنى  ئوماق كەپتەر  دەپ،
         كېلەي دىدىم  ئېھتىياتتا يېقىنلاپ.
         ئاسان ئەمەس يۈرىكىمگە  قوندۇرماق،
          قىل ئۈستىدە ماڭارمەن  مىڭ  قېتىملاپ.

          ھاۋا تۇتۇق  تۈرۈلگەندە  قوشمىڭىز،
          گەر كۈلسىڭىز  كۈلۈپ چىقار قۇياشمۇ.
          سىز چىقىسىز  ئايسىز  تۈندە  ئاي بولۇپ،
          چەكسىز ھوزۇر چېھرىڭىزگە  قاراشمۇ.

           كۆزۈم تويسا كۆڭلۈم مەڭگۈ  تويمايدۇ،
            سىزنى ئوتلۇق يۈرىكىمگە باسقۇم بار.
            جۈپ دىل بولۇپ ،بىر جۈپ قۇشقا ئايلىنىپ،
             يىراق جايغا  بىللە  ئۇچۇپ  بارغۇم بار.
                    
             تەگدى دىسەم قوللىڭىزغا قولۇمنى،
              كۈلۈپ كەتتى بۇلاقتا  ئاي ۋىلىقلاپ.
              بېلىجانلار ھاياجانلىق تۇيغۇدا
               سايىڭىز بوپ ئۈزۈپ كەتتى پىلتىڭلاپ.

               تاڭ بىلەن تەڭ ئايلىنىپسىز سەھەرگە،
               ۋە كۈلدىڭىز پورەكلىگەن گۈل بولۇپ.
               خۇش ھىدىڭىز بولۇپ سەھەر سەلكىنى
              تاراپ كەتتى جىمجىت مەيىن،كۈي بولۇپ.

               سىز تۇرغاندا گۈل تۈۋىدە  گۈل بولۇپ،
               شەبنەم كۆردۈم  چېھرىڭىزدە،گۈللەردە.
               بولدىڭىزمۇ گۈللەر بىلەن تەڭ  مەستخۇش
               شىرىن تۇيغۇ ئېيتىپ  ئېيتىپ  بەرگەن كۈيلەردە؟

                تۇيغۇڭىزنىڭ  شىرىنلىكى  چەكسىزمۇ؟
                چىدالمىدىم سىز باققاندا  مېھىرلىك.
                 ئىلكىڭىزگە  ئۆتۈپ  بولدى  جېنىممۇ
                 نىگاھىڭىز  نىمانچىلا  سېھىرلىك؟


                    
                تاتلىق كۈلۈپ  قاراغاندا  سىز يەرگە،
                كۆڭلۈم كۆردى مەشۇغۇمنىڭ  قەلبىنى.
                جۈپلەشكەندە يۈرىكىمىز،لىۋىمىز،
                 بىھۇشلۇقتا  ئۇنتۇپ  كەتتۇق ھەممىنى.

                  پاك  سۆيگۈمدە  سىماپ بولغاچ قەلبىڭىز،
                  ئايلاندىڭىز ۋىلىقلىغان  بۇلاققا.
                   مىڭ قېتىملاپ بەرگۈم كەلدى جېنىمنى
                   ئەڭ تاتلىغىم-سىز دىلنازغا ،، ئوماققا.

                    بىز كۆرمىگەن ئۇيقۇلۇقتا شىرىن چۈش،
                     پەرىزاتتەك  كۆز ئالدىمدىن يۈتتىڭىز.
                     بىر  رەتتە  مىڭ رەتكە  تەڭ سۆيدۈرۈپ،
                     چىن كۆڭلۈمنى  تا مەڭگۈلۈك ئۇتتىڭىز.

                     مەندىن نىچۈن رەنجىدىڭىز بىلمىدىم،
                     كۈلمىدىڭىز  ئاينى ئۈزۈپ  بەرسەممۇ..
                      ئايرىلمىدىڭىز  ئۆزىڭىزدەك گۈللەردىن،
                      ۋىسال ئۈچۈن تەشنا بولۇپ كەلسەممۇ.


                     
                 ئوتقا  چۈشكەن قىلغا  ئوخشاش تولغاندىم،
                 ئەمما ھېچ بىر  گۇناھىمنى  بىلمىدىم.
                 يۇتىۋالغاچ  يىڭنىسىنى  ئازاپنىڭ،
                 ئىچ-ئىچىمدىن  ئۆرتىنىپ بىر كۈلمىدىم.

                ئۆزۈم ئولجا تۇرۇپ، بولدۇم   بىر ئوۋچى،
                چاڭقاپ ئۆتتۈم ئۇزۇن  ھىجران چۆلىدە.
                 ئىسمىڭىزنى  تەكرارلىدىم  مىليۇنلاپ،
                 بىز ئۇچراشقان  قىزىل  گۈلنىڭ تۈۋىدە.

                 يۇمشاق بىر قول  يۈزلىرىمنى  سىلىدى،
                 قۇچىقىمغا  كىرىپ قالدى  قىزىل گۈل.
                 سىزدىن،گۈلدىن تەڭلا كەلدى خۇش بۇي ھىد،
                 نازغىپ تۇرغان گۇلمۇ بىھۇش  سىز تۈگۈل.

                 كۆكتە  تۇلۇن،قوينۇمدا  سىز نازۇك ئاي.
                  جۈپ قەلبىمىز تاتلىق تۇيغۇ ، ھېسقا باي.
                  جىسمىڭىزمۇ يوپۇرماقتەك يوپۇرماق،
                  جەنىتىمىزنىڭ  باشلىنىشى  ئەشۇ  جاي...

                  ئۇنۇت،ئۇنتۇش زۈرۈر بولغان ھەممىنى


                       ئەزىز ھېيت كۈن


                    كېچە دىگىن بىۋاپانىڭ دەردىنى.
                   سېزەلمەيسەن  ئالا كۆڭۈل تەكتىنى.
                   توزكور بىلمەس بەرسەڭمۇ گەر ھەممىنى.
                   نادان قانداق بىلسۇن گۆھەر قەدرىنى ؟
                    كۆرەي دىسەڭ نۇرلۇق ،گۈزەل ئەتىنى
                    ئۇنۇت،ئۇنتۇش زۈرۈر بولغان ھەممىنى.
               

                   « ئۇ» ئەمەستۇر سېنى قويغان ئەلەمگە،
                    ئويۇڭ،كۆڭلۈڭ سېنى سالغان دەرد،-غەمگە،
                    كۆڭۈل بەرسەڭ ئۇندىن  باشقا  ئادەمگە،
                    ئايلىنىسەن  يېپ-يېڭى بىر  ئادەمگە.
                     كۆرەي دىسەڭ نۇرلۇق،گۈزەل ئەتىنى
                     ئۇنۇت،ئۇنتۇش زۈرۈر  بولغان  ھەممىنى.

                     تەڭ كۈلۈشمەي ھاسىل بولماس مۇھەبەت
                     تەڭ كۈيۈشمەي ھاسىل بولماس مۇھەمەت
                     تەڭ  سۆيۈشمەي ھاسىل بولماس مۇھەبەت
                     تەڭ كۈتۈشمەي ھاسىل بولماس مۇھەبەت
                     كۆرەي دىسەڭ نۇرلۇق،گۈزەل ئەتىنى
                     ئۇنۇت ،ئۇنتۇش زۈرۈر  بولغان  ھەممىنى
                        
                   سەن سېغىنساڭ،ئۇ  سۆيۈشسە خەق بىلەن
                   كۈنۈڭ ئۆتسە  تېرىكىشتە « خەپ» بىلەن.
                   تۇتۇق بەرمەي ئۆتۈپ  كەتسە ئەپ بىلەن
                   ئازاپىڭنى  تۆكەلەمسەن  گەپ  بىلەن ؟
                   كۆرەي دىسەڭ نۇرلۇق،گۈزەل  ئەتىنى
                   ئۇنۇت،ئۇنتۇش زۈرۈر بولغان  ھەممىنى.

                   سەن قوغلاشساڭ،  كۈيۈپ ئۇنى نۇرغۇن يىل
                   سۆيگۈسىدىن بېرەلمىسە  ساڭا قىل.
                   ئېزىشتىن يان،كۈيىۋەرمە بولدى قىل.
                   ئۇمۇ سەندەك ئاددى ئادەم، قەدرىڭ بىل.
                   كۆرەي دىسەڭ نۇرلۇق،گۈزەل ئەتىنى
                    ئۇنۇت،ئۇنتۇش زۈرۈر  بولغان ھەممىنى.

                    رىياللىقتىن  ھالقىپ كېتەر تەسەۋۇر.
                    كۆرسىتىدۇ  ئاجىزنىمۇ  بەك مەغرۇر.
                    پۇرلاش چىقار،بىلگەنلىرىڭ بەك پۇزۇز،
                    ھېچ نەرسىگە ھۆكۈم قىلما  بەك بالدۇر.
                     كۆرەي دىسەڭ نۇرلۇق،گۈزەل ئەتىنى
                    ئۇنۇت،ئۇنتۇش زۈرۈر بولغان  ھەممىنى.

                        
                      بىر چېكىنسەڭ ئۆلگىنىڭگە  تەڭ  ئەمەس،
                      چۈنكى ئىشىك مۇھەبەتتە بىر ئەمەس.
                       كۆيمىگەنگە  كۈيىۋېرىش ئەرزىمەس.
                       يېڭى  سۆيگۈ  ھاۋاسىدىن ئال نەپەس.
                       كۆرەي دىسەڭ  نۇرلۇق،گۈزەل ئەتىنى،
                       ئۇنۇت،ئۇنتۇش زۈرۈر  بولغان ھەممىنى.

                       ئويلاپ باقساڭ ئاتقان تاڭلار يېڭىدۇر،
                        ياپ-ياش پەسىل-ھەر بىر باھار يېڭىدۇر.
                        كۆڭلۈڭ ئۇتقان دىلناز  نىگار  يېڭىدۇر،
                        قۇتلۇق پەيتتە كەلگەن دىدار يېڭىدۇر.
                        كۆرەي دىسەڭ نۇرلۇق ،گۈزەل ئەتىنى،
                        ئۇنۇت ،ئۇنتۇش زۈرۈر  بولغان ھەممىنى.
  
                       قەيسەر يۈرەك ئۈندەر  روھلۇق بولۇشقا،
                       تاغدەك غايەت قۇدرەت،كۈچكە تولۇشقا،
                       مەنزىل مەدەت بېرەر نۇسرەت قۇچۇشقا،
                       يۇلقۇنىدۇ ئارمان كۆكتە  ئۇچۇشقا.
                       كۆرەي دىسەڭ نۇرلۇق،گۈزەل  ئەتىنى.
                       ئۇنۇت ،ئۇنتۇش زۈرۈر بولغان ھەممىنى.

                   ئاشىق غەزىلى  

                    ئەزىز ھېيت كۈن

          مەن  بارايمۇ ئالدىڭىزغا  سىزنى قېنىپ كۆرگىلى؟
          ئاي يۈزىڭىز ئالدىدا چىن ئىشتىياقتىن كۈلگىلى.
          بولدى كۆپ چاغ،كۆپ پەسىل مەن يىگانە پەرۋانىدەك،
          ئىشقىڭىزدا ئوت بولۇپ يالقۇنلىنىپ كۆيگىلى.
          كۆپ زارىقتىم ئىچ-ئچىمدىن كېچە-كۈندۈز ئىنتىلىپ،
          گۈلگە ئوخشاش زەپ چىرايلىق لىۋىڭىزگە  سۆيگىلى.
          لىۋىڭىز ماگنتمىدۇ؟ شوخ-شوخ يۈرىكىڭىز چوغمىدۇ؟
          مېنى قويۇڭ باغرىڭىز –ئاتەش كۆلىگە چۆمگىلى.
          كۈندۈزى كۈن،تۈندە ئاينى سىزگە كەلدىم ئوخشىتىپ،
          بولدى ئۇزاق سىزنى دەپ مەن دەردتە  دەردمەن يۈرگىلى.
          پالىماڭ ھىجران چۆلىگە مېنى يەنە زار قىلىپ،
          تاقىتىم تاق بولدى ئەمدى ۋەسلىڭىزنى كۈتكىلى.
          ئايلىنىپ كەتسەك ئەگەر بىر جانۇ-تەنگە ئىككىمىز،
          رازىمەن سىزنى سۆيۈپ،قىزغىن قۇچاقلاپ ئۆلگىلى.
          كۆڭلىڭىز كۆڭلۈم سۆيۈشتى ئىرمالىشىپ-چىرمالىشىپ،
          ئەمدى بىز بىر-بىرىمىزنىڭ  يۈرىكىگە چۆككىلى.
          سايىمىزدۇر ئىككىمىز بىللە يىگەن قوشماق مېغىز،
          قان بىلەن گۆشتەك سىڭىشىپ مەڭگۈ بىللە ئۆتىلى.       

             پىنھان  سۆيگۈ

            ئەزىز ھېيت كۈن


     كېتىپ بارار بىر يىگىت خوشال،
     قىزدا يوقتۇر پەقەت ئەشۇ  ھال.
     ۋەدە بەرگەچ ھەمراھ بولماققا،
     بىللە ماڭماي قىزغا  نە ئامال؟

    كېتىپ بارار بىر يىگىت خوشال،
    قىز كۆڭلىدە باشقىچە خىيال.
    كۆزى،كۆڭلى قالغان كەينىدە،
    توختىيالماس بولمىغاچ  ئامال.

   كەينىدىن بىر قىز كېلەر خوشال،
   يىگىتىدە يوقتۇر  ئەشۇ ھال.
   ئالدىدىكى قىزدىلا  كۆزى،
   قىزمۇ پات-پات  بۇرۇلۇپ قارار.

  بىر يىگىت ۋە بىر قىز بەك خوشال،
  يارلىرىدا يوقتۇر ئەشۇ ھال.
بىر يىگىت ۋە بىر قىز غەمكىندۇر،
كۆرۈشمەسلىك بولالمايدۇ  دال!
        

     كىيىك قىزنىڭ كۆزلىرىدىكى مۇڭ

         ئەزىز ھېيت كۈن


        كىيىكمۇ  ئەسلى  ئۆزىڭىز؟
       نىمانچە ئوتلۇق كۆزىڭىز؟
       يۈرەك –باغرىمنى ئەزگۈدەك،
       ئازاپلىقمۇ گەپ-سۆزىڭىز؟

       مەن كۆرمىگەندە  قارايسىز،
       قارىسام قاراپ قويمايسىز.
       يەر تېگىدىن غەمكىن قاراپ
       يۈتكەن كىيىككە ئوخشايسىز.

       قارايسىز نىچۈن ھەسرەتلىك؟
       شۇنچە چوڭقۇر مۇھەبەتلىك؟
       ئېرىگە سىماپ  يۈرىكىم،
       تۇيغۇم  ئەجەپمۇ لەززەتلىك.

       تاشمۇ  ئېرىيدۇ  باقسىڭىز،
       مەن سىماپ قاراپ  قالسىڭىز.
       چىدىمىدىم مۇڭىڭىزغا،
       مەن تەييار جاننى  ئالسىڭىز.