بارخاندىن ئاۋاز _ ئەزىز ھېيت [ئۇلانما كۆچۈرۈش]

         لىۋىڭىزدە  جەزمەن شىرىن ھەسەل بار

               ئەزىز ھېيت كۈن

         دىيەلمەيمەن مەندە سەۋدا-كېسەل بار،
         لىكىن دائىم كۆڭلۈمدە سىز گۈزەل بار،
         دىل قېتىمدا سىزگە ئېيتقان غەزەل بار،
         لىۋىڭىزدە جەزمەن شىرىن ھەسەل بار.

         ئەشۇ چاغنى ئۇنتالمىدىم پەقەتلا،
         سىزگە ھېسسىم ئۇرغۇپ تۇرار قەۋەتلا،
         تەشنالىغىم  باسار ئەشۇ شەربەتلا
         لىۋىڭىزدە جەزمەن شىرىن ھەسەل بار.

         يوقالدىڭىز بىر  قېتىملا سۆيدۈرۈپ،
         يۈرىكىمنى پەقەت بىر رەت  كۈلدۈرۈپ،
         ئۆتۈۋەرمەڭ مېنى قىيناپ كۆيدۈرۈپ،
         لىۋىڭىزدە جەزمەن شىرىن ھەسەل بار.

         كۈلگەن چاغدا ناز-خۇلقىڭىز بۆلەكچە،
          سىزنى ئويلاپ ئۇخلالمىدىم  ھەر كېچە،
         كۆرىشەيلى كۆڭۈل راسا  قانغىچە،
         لىۋىڭىزدە جەزمەن شىرىن ھەسەل بار.

          ئازدىم ،لىكىن ئەسلى يولدىن ئازمىدىم

             ئەزىز ھېيت كۈن



           سىزگە قايتا قارىماي دەپ  قارىدىم،
           مەن ئۆزۈمنى بىلىپ تۇرۇپ ئالدىدىم.
           توغرا بولغاچ ئالدىنىشتىن يانمىدىم،
           ئازدىم، لىكىن ئەسلى يولدىن ئازمىدىم!

           نىمە بوپتۇ ئوتلۇق  كۆزگە  ئازغانغا؟
           مېھرى ئىسسىق تۇلۇن يۈزگە ئازغانغا؟
           ئەڭ يىگانە قىزىل گۈلگە  ئازغانغا؟
           ئازدىم، لىكىن  ئەسلى يولدىن ئازمىدىم!

           نىمە بوپتۇ ئېزىپ قېلىپ  كۆيگەنگە؟
           كۆيۈش ئۈچۈن تۇغۇلدۇققۇ بىز يەرگە؟
           ئەيىپ يوققۇ قۇربان بېرىپ ئۆلگەنگە؟
           ئازدىم ،لىكىن ئەسلى يولدىن ئازمىدىم!

            بەك توغرىدۇر پەيتى كەلسە ئېزىشمۇ،
            ئۆز كۆڭلىنىڭ چىن مەيلىنى  بىلىشمۇ.
            چىن سۆيۈشكە تېگىشلىكنى سۆيۈشمۇ،
            ئازدىم ،لىكىن ئەسلى يولدىن  ئازمىدىم!
                       

               ئەسەبى  سۆيگۈ

              ئەزىز ھېيت كۈن

        غايىپ بولدى جۇدالىق چۆلى،
        تەڭ تەلپۈنگەچ ئىككىمىزدە جان.
        ئايرىلمىدى كۆڭلىمىز قىل-قىل،
        ئايرىلمىغاندەك ئەت-گۆش بىلەن قان.

        ئۇچىرشىدىغان مۇشۇ  ئەسنادا،
       چوغ قىلماقتا  بىزنى ھاياجان.
       سۆيىشەرمىزمۇ ئىچ-ئىچىمىزدىن
       قېپ قالغىچە قۇرۇق ئۇستىخان؟

       قۇچاقلاشساق ئەمدى ئىككىمىز
       يوقىلارمۇ ھۇشىمىز پۈتۈن؟
       ئاڭلانماسمۇ  ئاسمان ئۆرۈلۈپ-
       چۈشسە،بىزگە  ھىچقانداق بىر ئۈن؟

       قۇچاقلاشساق ئەمدى ئىككىمىز،
       كېتىمىز بىر جان-تەنگە ئايلىنىپ.
       ئاجىرىتالماس  ھەتتا ئەزرائىل،
       سۈرلۈك ئەجەل قىلچىنى شىلتىپ.

                    شوخ  ئالما

                  ئەزىز ھېيت كۈن


           يۇمران شاختا كۈلگەن سۈزۈك ئالمىدەك-
           كۆرىنىدۇ ئاي يۈزىڭىز- ئاق ئالما.
           يوپ-يۇمىلاق يەرمۇ گويا  بىر ئالما،
           جۇپ ئالمىڭىز ئاستىدا بار شوخ ئالما.

           شاختىن ئۈزۈپ سىزگە سۇنسام ئالمىنى،
           ياقارسىزمۇ ماڭا ئاي يۈز-ئالمىنى؟
           جۇپ ئالمىڭىز ئاستىدىكى شوخ ئالما،
          دەيدۇ ماڭا « تەشنادۇرمەن، ئال مېنى!»

          قولۇمدا بىر ئالما،كۆكتە  ئاي  ئالما،
          سايىسىدۇر  ئاي يۈزىڭىز-ئالمىڭىز.
          جۇپ ئالمىڭىز ئاستىدىكى شوخ  ئالما،
          دەيدۇ  ماڭا« مېنى  تىزراق  ئالسىڭىز.»

          كۆكتە ئۈزەر ئاق نۇر بېرىپ  ئاي ئالما،
          ئايلىنىدۇ توختىماستىن  يەر  ئالما.
          قولۇمدا  بار سۇنغان يۈرەك-نەق ئالما،
          جۇپ ئالمىڭىز ئاستىدا  بار چوغ ئالما.
                     

                    كۆڭۈل قالمىسۇن

                   ئەزىز ھېيت كۈن


            سۇغا سالسا  سۇ كۆتەرمەس مىسقال تۆمۈرنى،
            ئالتۇن بېرىپ  ئېلىپ بولماس قالغان  كۆڭۈلنى.
                                       - ئۇيغۇر خەلق قوشىغى


          ئوقيا بىلەن ئاتماق بولساڭمۇ
          قىلىچ بىلەن چاپماق بولساڭمۇ
          سۆيگىنىڭگە « سۆيمەيمەن» دىمە.
           سەندىن ئۇنىڭ كۆڭلى قالماسۇن.

           ئەشۇ بىر سۆز ئۆلۈمدىن يامان،
           قان چىقارماي ئېپ قويىدۇ جان،
           سۆيگىنىڭگە  شۇ سۆزنى دىمە،
           سەندىن ئۇنىڭ  كۆڭلى قالماسۇن.

           بەك ياماندۇر  كۆڭۈل  يارىسى
            كەمدىن-كەمدۇر ئۇنىڭ دورىسى.
            سۆيگىنىڭگە  « سۆيمەيمەن»  دىمە،
            سەندىن ئۇنىڭ  كۆڭلى  قالمىسۇن.

           شوخلىغىڭىزدىن  ئايلىناي

                ئەزىز ھېيت كۈن

            بېقىشىڭىز گۈللەردەك،
             مېڭىشىڭىز كەپتەردەك،
             قامىتىڭىز  سەبدەدەك،
             شوخلىغىڭىزدىن ئايلىناي.

             بەكمۇ نازلىق جىلۋىڭىز،
              بۇلاق گويا كۈلكىڭىز.
              شامال گويا شەپىڭىز،
              شوخلىغىڭىزدىن ئايلىناي.

              چىن نازۈكسىز رەنادەك،
             تۇتىلىسىز  ھاۋادەك،
              ئېچىلىسىز  ئاپتاپتەك،
               شوخلىغىڭىزدىن ئايلىناي.

                قوشمىڭىزنىڭ سۈررى بار،
                تۇتىلىشىڭىز  سىرى بار،
                قېچىشىڭىز  سېھرى بار.
                شوخلىغىڭىزدىن ئايلىناي.

               سىز كۈلىسىز  لەيلىدەك،

              كۈلىۋەرسىڭىز  مەيلىدەك،

              نازىڭىز كۆپ،پەرىدەك،

              شوخلىغىڭىزدىن  ئايلىناي.

              سىز قاچىسىز كىيىكتەك ،

              تۇتۇق بەرمەس بېلىقتەك،

              سېھىرلىكسىز  ماگنتتەك،

              شوخلىغىڭىزدىن  ئايلىناي.

بۇ يازمىنى ئاخىرىدا   ئەزىز ھېيت كۈن تەھرىرلىگەن. ۋاقتى  2012-4-17 00:59  

            سىزنى كۈندە كۆرگۈم  كېلىدۇ

                ئەزىز ھېيت كۈن


            سىزنى  كۈندە  كۆرگۈم  كېلىدۇ.
            سۆزلىرىمنى  دىگۈم  كېلىدۇ.
            ئەڭ  يېقىملىق  سۈزۈك نۇر بولۇپ،
            كۆزىڭىزدىن  كىرگۈم  كېلىدۇ.

            سىزنى كۈندە كۆرگۈم  كېلىدۇ.
            سىرىڭىزنى  بىلگۈم    كېلىدۇ.
            بولمىسىڭىز  جان كېرەك ئەمەس،
            بىر  سىزنىلا  سۆيگۈم  كېلىدۇ.

            سىزنى  كۈندە  كۆرگۈم كېلىدۇ.
            بىر سىزگىلا   كۆيگۈم  كېلىدۇ.
            بۇلبۇلىڭىز بولۇپ مەڭگۈلۈك،
            كۆكسىڭىزگە  قونغۇم  كېلىدۇ.

           سىزنى كۈندە كۆرگۈم  كېلىدۇ.
           قېنىپ-قېنىپ سۆيگۈم  كېلىدۇ.
           بولمىسىڭىز  جان كېرەك ئەمەس،
            سىزنى سۆيۈپ ئۆتكۈم كېلىدۇ.

        كۆزۈم چۈشتى  شوخ  قىزغا

             ئەزىز ھېيت كۈن


         كۆزۈم چۈشتى شوخ قىزغا،
         قاش-كىرپىكى ئوق قىزغا.
         ئەسىر بولدۇم تۇيۇقسىز،
         كۆزى ئاتەش - چوغ قىزغا.

          خۇشلۇق تارار يۈزىدىن،
           ناز تارايدۇ  سۆزىدىن.
           سېھىرلىدى قەلبىمنى،
           مەستەك  ماڭدىم  ئىزىدىن.

          ئەگىم ئايدەك قايرىلدى.
          ھوشۇم  تەندىن ئايرىلدى.
          توشقان بولۇپ مۆككەندە،
          پۇرسەت مەندىن قايرىلدى.

           يېقىنلىسام يىراقلاپ،
           يىراقلىسام  يېقىنلاپ،
           تۇتاي دىسەم بېلىقتەك
           قېچىپ كەتتى پىلتىڭلاپ.
               



         نازى كۆپكەن ئەسلىدە،
         ناز  گۈزەلنىڭ  سېھرىدە.
         ئېرىپ كەتتىم  سىماپتەك،
          شۇ گۈزەلنىڭ  مېھرىدە.

          سىز  شەيتامۇ؟ پەرىشتە؟

               ئەزىز ھېيت كۈن


           كېتىۋېتىپ رەستىدە،
           باققانتىڭىز  لەپپىدە،
           يۈرىكىم توك سوققاندەك،
           قىلدى  شۇئان  جىغغىدە.

            ئەقلىم  يوقاپ مەس بولدۇم،
            كەينىڭىزدىن  تەلپۈندۈم.
             سىز يۈتتىڭىز  بەك  تىزلا،
            ئۆز-ئۆزۈمگە   بوغۇلدۇم.

           ئايلار ئۆتۈپ  ئاي  كەلدى.
           جاھان گۈلگە  پۈركەندى.
           كۆرۈپ سىزنى مەن  يەنە،
           يۈرىكىمگە  ئوق  تەگدى.

            كۈلىۋىدىڭىز ھەس بولدۇم.
           سىزگە قاراپ مەس بولدۇم.
            كەلگەن چاغدا  ئېسىمگە،
             تەنھالىققا   بوغۇلدۇم.
                       


          ئېپ كەتمىدىڭىز  مېنىمۇ،
          سىز تۇرامسىز ئەرىشتە؟
          سىرىڭىزنى  بىلمىدىم،
          سىز شەيتانمۇ؟ پەرىشتە؟

       قارلىغاچنىڭ قاناتىدەك  قېشىڭىز

            ئەزىز ھېيت كۈن

         قالىغاچنىڭ  قاناتىدەك  قېشىڭىز،
         يۈرىكىمگە چوڭقۇر پاتتى ئوق  بولۇپ.
         يۈرىكىڭىز  يۈرىكىمگە كۆچكەندەك،
         ياندى پۈتكۈل تەن-ۋۇجۇدۇم ئوت بولۇپ.

          قالىغاچنىڭ  قاناتىدەك قېشىڭىز،
          مېنىڭ ئۈچۈن بەتلەپ قويغان  ئوقيامۇ؟
          پارە-پارە بولۇپ  كەتتى يۈرىكىم،
          سىزگە ئەسىر-ئولجا  بولۇش گۇناھمۇ؟

          قالىغاچنىڭ  قاناتىدەك  قېشىڭىز،
          ئايرىۋەتتى تەن-جانىمدىن ھۇشۇمنى.
          ساقايتىدۇ  ئىللىق، ،يۇمشاق باغرىڭىز-
          ئىشقىڭىزدا بىتاپ  بولغان  كۆڭلۈمنى.

           قارلىغاچنىڭ قاناتىدەك  قېشىڭىز،
           تەنگە پاتسۇن،ساپ كۆڭلۈمگە پاتمىسۇن.
           مېنى سۆيۈش  ئىرادىڭىز  قاتسۇنكى،
           ئىللىق، يۇمشاق شۇ باغرىڭىز  قاتمىسۇن.
                                      

             سىزنى دىسەم

               ئەزىز ھېيت كۈن

         سىزنى دىسەم گۈل كۆرىنەر كۆزۈمگە،
        شادلىق سىغماس دەۋرەپ تۇرغان كۆڭلۈمگە.
        سىزنى دىسەم چاپقۇم كېلەر تاي بولۇپ،
        سىز كۆرۈنگەچ كۆزلىرىمگە ئاي بولۇپ.

         سىزنى دىسەم تاغدەك ئاشار غەيرىتىم،
         جاسارىتىم،شىجائىتىم، ھەيۋىتىم.
         سىزنى دىسەم  شىر چاغلايمەن ئۆزۈمنى،
         ئوت يانىدۇ  شۇئان  ئاچسام  كۆزۈمنى.

          سىزنى دىسەم بەخت-ئامەت قوش كېلەر،
          بىزنى قۇتلاپ قانات قېقىپ  قۇش كېلەر.
          سىزنى دىسەم  تۈنمۇ كۈندۈز تۇيىلار،
          قەلبىم مېھىر دېڭىزىدا يۇيىلار.

          سىزنى دىسەم كۆز ئالدىمغا ھۆر كېلەر،
          كۈندە يېڭى تۇيۇلغۇچى كۈن كېلەر.
          سىزنى دىسەم بەرگۈم كېلەر جەننەتنى،
          تا مەڭگۈگە  ئۇنتۇلغۇسىز لەززەتنى
                        


           سىزنى دىسەم رازىدۇرمەن ئۆلۈشكە،
           دەھشەت چاققان چېقىن بولۇپ ئۆچۈشكە.
           سىزنى دىسەم يانغۇم كېلەر نۇر بولۇپ،
           كەتكۈم كېلەر جېنىڭىزغا  قوشۇلۇپ...

            مەيىن دولقۇنلار

               ئەزىز ھېيت كۈن

        قارىماي دەپ سىزگە  يەنە قارىدىم،
         باغلىۋالدى مېنى  سۇمبۇل چېچىڭىز.
         مېنى ئىتتىك تارتىپ كەتتى ئۆزىگە،
         ماگنت بولۇپ ئوتلۇق شىرىن لىۋىڭىز.

         دەريا بويى ...ئۇنتۇلغۇسىز شۇ چاغلار،
         دولقۇنلارغا تەڭكەش ئىدى چېچىڭىز.
         كۆكسىڭىزدەك يېنىك-يېنىك تىترەيتى،
         قۇچاقلىسام بىر تۇتامچە بېلىڭىز.

         سىز ئالدىمدا چېچىڭىزنى يايغاندا،
         مەن كىرەتىم  قاراڭغۇ تۈن قوينىغا.
         قۇچىقىمدا ئېرىپ بىھۇش بولغاندا،
         بوش چىشلەپ ئىز سالغانتىڭىز بوينۇمغا.

         يەلپۈنىدۇ  نازغىپ سۇمبۇل چېچىڭىز،
         مەس بولىمەن  چېچىڭىزدا  يۆگەلسەم.
         باغلىۋالار  مېنى سۇمبۇل چېچىڭىز،
         بۇ دۇنياغا بەلكىم  قايتا   تۆرەلسەم.  
                             

قىيا  دېرىزە ناملىق
شېئرىڭىزنى ياقتۇردۇم.

ئايزىتنىڭ «قىيا دېرىزە » ناملىق شئېىرىمنى ياقتۇرغانلىقىغا رەخمەت.قىزىقىشنىڭ  ئوخشاش بولمىغانلىقىنى نەزەردە تۇتقاندا شئېىرلارنىڭ خىلمۇ-خىل يېزىلغىنى ياخشى .مەن شۇنىڭ ئۈچۈن تىرىشتىم.لىكىن يېتەرلىك بولدى دىيەلمەيمەن.

سىزنى شېئىر ۋە ئوبزورداتەڭ ھەم كەڭ غۇلاچ تاشلىغان ، لىرىكىلىرى بىلەن يېڭىچە يول ئېچىشقا باشلىغان بىر ئەدىب ئىكەن دەپ كەلگەن ئىدىم.بۈگۈن ئىلمىي ماقالىلىرىڭىزنى چېلىقتۇرۇپ ، كۆپ قىرلىق تالانت ئىگىسى ئىكەن دېگەن تونۇشقىمۇ كەلدىم.رۇس ئالىمى لومونوسوۋ شائىرلىقمۇ قىلغانىكەن .لېكىن ئاساسىي نۇختىنى فىزىكىغا قاراتقانىكەن. مېنىڭچە سىز ، خاتالاشمىسام، ئالتۇن ۋاقىتىڭىزنى ھەم ئاساسىي كۈچىڭىزنى ئەدەبىياتقا قارىتىسىزغۇ دەيمەن.مەن سىزنىڭ كۆپ ئىختىدار يېتىلدۈرۈشىڭىزگەھەم تىلەكداشمەن.ئىشلىرىڭىزغا ئۇتۇق يار بولسۇن. .