| شىنجاڭ يۇقىرى سۈرئەتلىك تاشيولىدا 9 بال بوران چىقتى |
ئاسىيا كىندىكى تورى خەۋىرى:
ئالدىنقى ھەپتىنىڭ ئاخىرىدا، لىيەنخۇ يۇقىرى سۈرئەتلىك تاشيولى 3463 كىلومىتىرلىق يول بۆلىكىدە 9 بالدىن يۇقىرى قاتتىق بوران چىقىپ، سەككىز نەپەر بېيجىڭلىق ساياھەتچى، ئىككى نەپەركورىيىلىك ساياھەتچى قاتارلىق ئەن نەچچە كىشى تالاپەتكە ئۇچىرىدى. يۇقىرى سۈرئەتلىك تاشيول ساقچىلىرى كىچىنى كۈندۈزگە ئۇلاپ بۇ كىشىلەرنى قۇتقۇزدى.
ئىگىلىشىمىزچە، ئالدىنقى ھەپتىنىڭ جۈمە كۈنى سائەت 20:00 دە، شىياۋساۋخۇ 30 كىلومىتىرلىق رايوندا شامال كۈچى 9 بالغان يەتكەندىن كېيىن، ساقچىلار مۇشۇ يولدىن ئۆتىدىغان چوڭ يۈك ماشىنىلىرى ۋە ساندۇقلۇق ماشىنىلارنىڭ يولدىن ئۆتۈشىنى توسىغان . ئارقىدىنلا بوران رايونىغا بېرىپ چارلاش ئېلىپ بارغان.
بىر خەلق ساقچىسى مۇنداق دېدى:« بىز يول بويىغا بىر ماشىنىنىڭ توختىتىپ قويۇلغانلىقىنى، ماشىنىنىڭ ئەتراپىدا بىر قانچە ئادەمنىڭ تۇرغانلىقىنى كۆردۇق. بوراننىڭ كۈچلۈكلىكىدىن ئادەملەر ئورنىدا تۇرالمايۋاتاتتى. كېيىن بىز سۈرۈشتۈرۈش ئارقىلىق بۇ ماشىنىنىڭ بېيجىڭدىن ھەيدەپ كېلىنگەن، سەككىز نەپەر ساياھەتچى ئولتۇرغان ماشىنا ئىكەنلىكىنى بىلدۇق. ئۇلار تۇرپاندىن ئۈرۈمچىگە كېلىپ بىرقانچە كۈن ئوينىغاندىن كېيىن، قاناس كۆلىگە بارماقچى بولۇپ يولغا چىقىپتىكەن. ئويلىمىغان يەردىن ماشىنىنىڭ چاقى ئېتىلىپ كىتىپ، چاقنى ئالماشتۇرىۋاتقاندا قاتتىق بوران چىقىپ كەتكەن ئىكەن».
بېيجىڭدىن كەلگەن جاڭ ئەپەندىم تېلفۇندا مۇخبىرغا مۇنداق دېدى:« ماشىنىنى توختىتىشىمىزغا قاتتىق بوران ئېلىپ كەلگەنقۇم-شېغىللار ماشىنا ئەينىكىنىمۇ چېقىۋەتتى. بىز ئالدىراپ -تىنەپ تېلفۇن قىلدۇق. بىراق بوران بەك كۈچلۈك بولغاچقا ئاغزىمىزنى ئاچساقلا، ئاغزىمىز قۇم بىلەن توشۇپ كىتەتتى. گەپ قىلغىلى بولمايتتى. تەلىيىمىزگە ھېلىمۇ ياخشى ساقچىلار كەپ قالدى». جاڭ ئەپەندىم يەنە ئۆزىنىڭ ئەزەلدىن بۇنداق قاتتىق بوراننى كۆرۈپ باقمىغانلىقىنى، بۇ كۈندىكى ئىشنى ھەرگىز ئۇنتۇپ قالمايدىغانلىقىنى ئېيتتى.
شۇ كۈنى سائەت 22:00 دە، خەلق ساقچىلىرى بۇ سەككىز نەپەر ساياھەتچىنى ئۈرۈمچى شەھىرىگە ئەكىلىپ قويغاندىن كېيىن، ساياھەتچىلەرنىڭ ماشىنىسىنىمۇ رېمونىت قىلدۇرۇشقا بېرىپ قويدى. خەلق ساقچىلىرى يەنە بوران رايونىغا قايتىپ كەلگەندە ، يەنە ئىككى نەپەر ۋېلىسپىت مىنگەن كورىيىلىك ساياھەتچىنى بايقىدى. ئۇلار ۋېلىسپىتلىرىنى يولغا توختىتىپ قويۇپ، ئۆزلىرى بولسا بېشىنى ئورىغىنىچە زوڭزۇيۇپ ئولتۇراتتى. خەلق ساقچىلىرى بۇ ئىككى نەپەر ساياھەتچىنى بىخەتەر ئاپىرىپ قويغاندىن كېيىن، يەنە باشقا بۇراندا قالغانلارنى قۇتقۇزدى.
تۇرپان ۋىلايەتلىك قاتناش ساقچى چوڭ ئەتىرىتى ئەسكەرتىشى:
يېقىندىن بويان تۇرپان شەھىرىنڭ ھاۋارايى ئەھۋالى بىر قەدەر ئۆزگىرىشچان. بوران رايونىدا بوران چىقىش قېتىم سانى بىرقەدەر كۆپىرەك. شۇڭا بىز يولوچىلارنىڭ يولغا چىقىشتىن بۇرۇن رادىئو ئاڭلاپ ياكى تۇرپان ۋىلايەتلىك قاتناش ساقچى چوڭ ئەتىرىتىگە تېلفۇن قىلىپ، ھاۋارايى ئەھۋالىنى سۈرۈشتۈرىشىنى ئۈمۈد قىلىمىز. ئەگەر يولدا قاتتىق بۇرانغا ئۇچىراپ قالساڭلار، بوراندىن پاناھلىنىش رايونىدا توختىساڭلار بولىدۇ. ماشىنىلارنى توختىتىدىغان چاغدا چۇقۇم شامال يۆنىلىشىنى بويلاپ توختىتىڭلار. مۇشۇنداق قىلساڭلار، شامال دېرىزە ئەينەكلىرىنى چېقىپ، سىلەرگە زەخمە يەتكۈزەلمەيدۇ. ماشىنىنى توختاتقان ۋاقىتتا چىراقلىرىنى يېقىپ قويۇڭلار. ئەگەر كېچىسى بولۇپ قالسا، ماشىنا كەينىدىكى چىراقلىرىنى يېقىپ قويۇڭلار. ماشىنىنى توختاتقاندىن كېيىن، ماشىنىنىڭ ئىشىك-دېرىزىلىرنى ئېچىشقا بولمايدۇ. ماشىنىدىكى پۇل قاتارلىق قىممەتلىك نەرسە-كېرەكلىرىڭلارنى بۇراننىڭ ئۇچۇرۇپ كەتمەسلىكى ئۈچۈن ياخشى ئورۇنلاشتۇرۇڭلار. ھەمدە دەل ۋاقتىدا 0995-882211 غا تېلفۇن قىلىپ، ياردەم تەلەپ قىلساڭلار، خەلق ساقچىلىرى دەل ۋاقتىدا يىتىپ كېلىپ، سىلەرنى قۇتقۇزۇشقا تىرىشىدۇ.
| [ئاپتورى: مەنبەسى: ۋاقتى: 2011-7-18 14:59:11 ئۇقۇلۇشى: 413 قېتىم] |
|
