يېقىندا بىر قانچە تونۇشۇمنىڭ كومپيۇتېرىنى ئوڭشاش جەريانىدا ئۇلاردىن ياخشىراق بىرەر كىنو قويغۇچ تەۋسىيە قىلىش توغرىلىق پاراڭلىشىپ قالدىم. گەرچە ئىلگىرى تۆۋەن سەپلىمىلىك كومپيۇتېرلار ئۈچۈن 迅雷看看 نى تونۇشتۇرۇپ ئۆتكەن بولساممۇ، يەنىلا بىر قىسىم دوستلارنىڭ تېخىمۇ ياخشى، پاكىز، ئېلاندىن خالىي، ھەتتا 3D كىنو كۆرۈش ئىقتىدارى بار بىر قويغۇچغا ئېھتىياجلىق ھەققىدىكى تەلەپلىرىنى ئاڭلاپ تۇردۇم. ھەقىقەتەن، ھازىر قويغۇچلارنىڭ كۆپلىگىدىن، ھەر بىر كومپيۇتېرغا قارىسا ئاز دېگەندە 2~3 خىل ئۇنىۋېرسال قويغۇچ قاچىلىنىپ قالغانلىقىنى كۆرۈۋېلىش تەس ئەمەس.

بۈگۈن كۆپچىلىككە تەۋسىيە قىلىدىغىنىم بولسا، 腾讯 نىڭ كۆپچىلىككە تونۇش يەنە بىر مەھسۇلاتى QQ影音. باشقا ئۇنىۋېرسال ھەممىباب قويغۇچلارغا ئوخشاشلا، بارلىق ئۈن-سىن ھۆججەتلىرىنى قويالايدىغان قويغۇچ. سىز پەقەت كومپيۇتېرغا QQ影音 نى قاچىلاپ قويسىڭىزلا، ئىشقىلىپ توردىن چۈشۈرگەن بارلىق كىنو-فىلىم ھۆججىتىنى قويالايسىز، ئۇنىڭ ئۈستىگە، QQ影音 نىڭ كۆرۈنمە يۈزى پاكىز، ئېلاندىن خالىي بولۇپلا قالماي، يەنە باشقا قويغۇچلاردىن ئۆزگىچە نۇرغۇن ئىقتىدارلار تەمىنلەنگەن.

QQ影音 بىلەن بۇرۇن تەۋسىيە قىلغان 迅雷看看 نىڭ نېمە پەرقى بار؟

بەزىلەر بەلكىم، سىز ئىلگىرى 迅雷看看 نى تەۋسىيە قىلغانغۇ، ئەمدى نېمىشقا بۇنى تەۋسىيە قىلىپ قالدىڭىز دەپ سورىشى مۇمكىن. 迅雷看看 مۇ ھەقىقەتەن ياخشى بىر قويغۇچ، بولۇپمۇ بىر قەدەر تۆۋەن سەپلىمىلىك كومپيۇتېرلاردا يۇقىرى ئېنىقلىقتىكى كىنولارنى راۋان كۆرۈشتە ئۈنۈمى ئىنتايىن ياخشى. بىراق كۆپچىلىك شۇنى ئېتىراپ قىلىش كېرەككى، شۇ ئېنىقلىقتىكى سۈزۈك فىلىملەرنى راۋان قويۇپ بېرىش ئۈچۈن، 迅雷看看 فىلىمنىڭ ئەسلى سۈزۈكلىگە نىسبەتەن مەلۇم دەرىجىدە پرىسلاش ئېلىپ بېرىش، شۇ ئارقىلىق CPU نىڭ خىزمەت ھالىتىنى تېخىمۇ تۆۋەن چەككە چۈشۈرۈش بەدىلىگە مۇشۇنداق ئۈنۈمگە يېتىدۇ. QQ影音 بولسا فىلىمنىڭ ئەسلى ئېنىقلىقىغا نىسبەتەن ھېچقانداق پرىسلاش ئېلىپ بارمايدىغان بولۇپ، ناۋادا بىر قەدەر كونا سەپلىمىلىك كومپيۇتېرلاردا 1080P لىك ئېنىقلىقتىكى كىنولارنى كۆرسىڭىز، QQ影音 بەلكىم كومپيۇتېرىڭىزنى ئازراق ھالسىرىتىپ قويۇشى مۇمكىن. بىراق سەپلىمە شارائىتى يار بەرگەن ئەھۋال ئاستىدا، QQ影音 نىڭ ئۈنۈمىنى ئىنتايىن قالتىس دېيىشكە بولىدۇ! ناۋادا كومپيۇتېرىڭىزنىڭ سەپلىمىسى بەك كونا بولمىسا، ئۇنداقتا ئىككىلەنمەي QQ影音 نى قاچىلىشىڭىزنى تەۋسىيە قىلىمەن.

QQ影音 نىڭ بىر قىسىم ئىقتىدارلىرى:

ئەڭ يېڭى نەشىردىكى QQ影音 دا ھەممىباب ئۇنىۋېرسال قويغۇچلاردىكى بارلىق ئىقتىدارلار تەمىنلىپلا قالماستىن، يەنە سىننى ھەرخىل فورماتقا، مەسىلەن ھەرخىل تىپتىكى يانفونلاردا قويۇشقا بولىدىغان ھالەتكە ئايلاندۇرۇش، فىلىم پرىسلاش، 3D كىنولارنى قويۇش قاتارلىق ئىقتىدارلار تەمىنلەنگەن. كۆرۈنمە يۈز ۋە ئىقتىدار تىزىملىكلىرىمۇ يۈكسەك دەرىجىدە ئىخچام ۋە ئاددىيلاشتۇرۇلغان، ھەتتا يېڭى ئۆگەنگۈچىلەرمۇ ئىنتايىن ئاسانلا بۇ ئىقتىدارلاردىن پايدىلىنالايدۇ.

ھازىرقى ھەرخىل تىپتىكى ئۇنىۋېرسال قويغۇچلارغا سېلىشتۇرغاندا، QQ影音 مۇ شۇلارغا ئوخشاشلا تەمىنلەشكە تېگىشلىك نۇرغۇن ئىقتىدارلارنى تەمىنلىگەن. ھەتتا قويغۇچلارنىڭ جىقلىقىدىن، قايسىسىنىڭ ياخشى يامانلىقىنى ئايرىشمۇ تەس بولۇپ كەتتى. ئەمما QQ影音 ئىشلەتكۈچىلەرنىڭ مەشغۇلات ئۇسۇلى جەھەتتىن بولسۇن، ياكى فىلىم قويۇش تېخنىكىسى جەھەتلەردە بولسۇن، خېلى كۆپ ئەجىر سىڭدۈرگەن دېيىشكە بولىدۇ. ئوخشاش شارائىت ئاستىدا، زادى قايسى قويغۇچنى تاللاشنى بىلەلمەيۋاتقانلار ئۈچۈن، QQ影音 ھەر ھالدا ياخشى بىر تاللاش بولالايدۇ دەپ قارايمەن. ئۇنىڭ ئۈستىگە ھازىر QQ影音 نىڭ iPad/Android نۇسخىلىرىمۇ بار. ئۈستىدە كۆپچىلىككە بىر قىسىم ئالاھىدىلىكلەرنى مىسالغا ئېلىپ تۇرۇپ چۈشەندۈرۈپ ئۆتتۈم، QQ影音 نىڭ بۇنىڭدىن باشقا ئىقتىدارلىرىنى كۆپچىلىك ئىشلىتىش جەريانىدا ھېس قىلالايدۇ دەپ ئويلايمەن.

چۈشۈرۈش مەنزىلى:

QQ影音 نى چۈشۈرۈش     |     مەنبە: تورخۇمار