تارىم بلوگى

ئۆزۈمنىڭ ئوقۇش ۋە ئوقۇتۇش جەريانىدا ھىس قىلغانلىرىمغا ئاساسلانغاندا، ماتېماتىكىنى ياخشى ئۆگۈنۈشنىڭ ئۇسۇلى ----- كىتابنى كۆپ كۆرۈش، كۆپ مەشق ئىشلەش، نەزىرىيىۋىي بىلىملەرگە كۆپ ئەھمىيەت بېرىش، ئۆگۈنۈپ بولغان بىلىملەرنى ۋاقتى ۋاقتىدا تەكرارلاپ تۇرۇش، ھەتتا بىر نەچچە يىلنىڭ ئالدىدا ئۆگۈنۈپ بولغان دەرسلىك ماتېرىياللارنىمۇ ۋاقىت چىقسىلا كۆرۈپ تەكرارلاپ تۇرۇش، ئۆگەنگەن ئېنىقلىما، فورمۇلا، قائىدە-قانۇنىيەتلەرنى چوقۇم ئەستە ساقلىۋېلىش، باشقا فورمۇلا ۋە تېئورېمىلارنى كەلتۈرۈپ چىقىرىشتا ئاساس بولىدىغان فورمۇلا ياكى تېئورېمىلارنىڭ ئىسپاتىنى ياكى كەلتۈرۈپ چىقىرىلىش جەريانىنى پۇختا ئىگىلىۋېلىش كېرەك.
مەسىلەن، سىز ئىككى بۇلۇڭ يىغىندىسىنىڭ سىنۇسى ياكى كوسىنۇسى فورمۇلىسىنى پىششىق ئىگىلىۋالسىڭىز، ئۇ چاغدا ئىككى بۇلۇڭ يىغىندىسى ياكى ئايرىمىسىنىڭ باشقا ترىگونومېترىك فۇنكىتسىيىلىرى فورمۇلىلىرىنى، ھەسسىلەنگەن بۇلۇڭ ۋە يېرىم بۇلۇڭنىڭ ترىگونومېتىرىك فۇنكىتسىيىلىرى فورمۇلىلىرىنى، ترىگونومېترىك فۇنكىتسىيىلەرنىڭ يىغىندىسى ياكى ئايرىمىسىنى ترىگونومېتىرىك فۇنكىتسىيىلەرنىڭ كۆپەيتمىسىگە ئايلاندۇرۇش فورمۇلىلىرى ..... قاتارلىق بارلىق فورمۇلىلارنى ناھايىتى ئاسانلا كەلتۈرۈپ چىقىرالايسىز. دەسلەپكى 1 فورمۇلىنى يادا بىلسىڭىزلا، قالغان فورمۇلىلارنى يادلىۋېلىشىڭىزنىڭ ھاجىتى يوق.
يەنە بىرى سىز يادا بىلىدىغان قائىدە -قانۇنىيەتلەر قانچە كۆپ بولسا، ھەرقانداق بىر مەسىلە ئالدىڭىزغا قويۇلسا، ئۇنى قايسى قائىدىدىن پايدىلىنىپ ھەل قىلىش كېرەكلىكى دەرھاللا ئېسىڭىزگە كېلىدۇ، بولمىسا كىتاپ كۆرمىگىچە ياكى باشقىلارنىڭ ياردىمىگە تايانمىغۇچە مەسىلىنى ھەل قىلالمايسىز. شۇڭا ھەرقانداق بىر نەرسە ئۆگەنگەندە مۇناسىۋەتلىك قائىدە قانۇنىيەتلەرنى ئۇزۇن مەزگىلگىچە ئەستىن چىقمىغۇدەك دەرىجىدە ئەستە ساقلىۋېلىشقا تىرىشىش كېرەك.
مۇستەقىل پىكىر قىلىشقا، ئۆزلىكىدىن ئۆگىنىشكە ئادەتلىنىڭ. ھە دىگەندىلا ئوقۇتقۇچى ياكى ساۋاغداشلىرىڭىزغا تايىنىۋالماڭ. بىر ئىشنى قىلغاندا پۈتۈن ۋۇجۇدىڭىز بىلەن بېرىلىپ قىلىڭ، زىھنىڭىزنى باشقا ئىشلارغا چاچماڭ. شۇنداق قىلسىڭىز چوقۇم ماتېماتىكىنى ياخشى ئۆگۈنۈپ كېتەلەيسىز.
ھازىرچە سۇئالىڭىزغا مۇشۇنچىلىكرەك جاۋاب بېرىپ تۇراي، كېيىن مۇشۇ جاۋاپنى يەنە داۋاملاشتۇرۇپ تېخىمۇ كۆپرەك يول كۆرسىتىشىم مۇمكىن. يۇقۇرقىلار ئۆزۈمنىڭ تەجىربىلىرى. ئەلۋەتتە ھەركىمنىڭ مىجەز خاراكتىرى ۋە ئەتراپىدىكى مۇھىت ئوخشىمىغاچقا، ماڭا ماس كەلگەن ئۆگۈنۈش ئۇسۇلى سىزگە ماس كېلىشى ناتايىن. شۇنداقتىمۇ سىناپ باقسىڭىز بولىدۇ. يەنە تۆۋەندىكى تېمىلارنىمۇ كۆرۈپ بېقىڭ، بەلكىم پايدىسى تىگىپ قالار:
logs/29197875.html

logs/28928192.html