Salam URUMQI :: سالام ئۈرۈمچى :: 乌鲁木齐综合娱乐网 :: 维吾尔综合门户网:: 新疆维吾尔文化::

             شىنخۇا تورى ئۈرۈمچى 11-مارت تېلگىراممىسى: 11-مارت سائەت 10 دىن ئاشقاندا، شىنجاڭ-شىزاڭ تاشيولىدا ئېغىر قاتناش ۋەقەسى يۈز بەردى، تەخمىنەن 40 ئادەم ئولتۇرغان بىر ئۇزۇن يوللۇق يولۇچىلار ئاپتۇبۇسى يولدا تېيلىپ كېتىپ، جىلغىغا چۈشۈپ كەتكەن. مۇخبىرنىڭ سائەت 15:00 تە بەرگەن خەۋىرىگە ئاساسلانغاندا ۋەقەدە 20 ئادەم قازا قىلىپ، 11 ئادەم ئېغىر ، 5 ئادەم يىنىك يارلانغان، باشقا ئادەملەرنىڭ ئەھۋالى تېخى ئېنىق ئەمەس.
شىنجاڭ ئۇيغۇر ئاپتۇنۇم رايونلۇق ھۆكۈمەت بەنگۇڭتىڭىنىڭ مۇئاۋىن مۇدىرى، شىنجاڭ جىددىي ئەھۋالدىن قۇتقۇزۇش باش ئەترىتىنىڭ مۇئاۋىن ئەتىرەت باشلىقى ئېلى ئىسمايىلنىڭ دېيىشىچە، ئاپتۇبۇس شىنجاڭ قاغىلىقتىن شىزاڭ (219-نۇمۇرلۇق دۆلەت تاشيولىنىڭ 220 كىلومېتىر بۆلىكى) غا قاراپ كېتىۋاتقان بولۇپ، بۇ ئۇزۇن يوللۇق ئاپتۇبۇس شىزاڭدىكى بۆكەن يولۇچى توشۇش شىركىتىگە تەۋە ئىكەن. نۆۋەتتە، شىنجاڭ ھەربىي رايونى، قەشقەر ۋىلايەتلىك پارتكوم ۋە مەمۇرىي مەھكىمىسى، قاتناش، جامائەت خەۋىپسىزلىك قاتارلىق تارماقلار ئادەم تەشكىللەپ قۇتقۇزۇش خىزمىتىنى ئېلىپ بارماقتا ئىكەن.
ھازىر بېيجىڭدا مەملىكەتلىك ئىككى يىغىنغا قاتنىشىۋاتقان ئاپتۇنۇم رايونلۇق پارتىكومنىڭ مۇئاۋىن شۇجىسى، ئاپتۇنۇم رايوننىڭ رەئىسى نۇر بەكرى ۋەقەدىن خەۋەر تاپقاندىن كېيىن، ئاپتۇنۇم رايونلۇق مۇناسىۋەتلىك تارماقلار ۋە قەشقەر ۋىلايەتلىك پارتىكوم، مەمۇرىي مەھكىمىدىكىلەردىن پۈتۈن كۈچ بىلەن قۇتقۇزۇشقا ئاتلىنىپ، يارىلانغانلارنىڭ ھاياتىغا كىپىللىك قىلىشىنى تەلەپ قىلدى.
مۇخبىر خەۋەر بېرىۋاتقان ۋاقىتتا، قۇتقۇزۇش خىزمىتى ئېلىپ بېرىلىۋاتقان بولۇپ، قۇتقۇزۇش خىزمىتى بىر قەدەر قىيىن بولغاچقا، يولۇچىلارنىڭ سانىنى ھازىرچە ئېىنىقلىغىلى بولمىغان.
219-دۆلەت تاشيولى يەنە شىنجاڭ-شىزاڭ تاشيولى (شىنجاڭ قەشقەر قاغىلىق - شىزاڭ شىچۈن كۆلى) دەپ ئاتىلىدىغان بولۇپ، ئومۇمىي ئۇزۇنلىقى 1455 كىلومېتىر، دۇنيادىكى دېڭىز يۈزىدىن ئەڭ ئېگىز تاشيول، سەپەردە 5000 مېتىر ئىگىزلىكتى بەش تاغدىن ئۆتىدۇ، بۇنىڭ ئىچىدە دېڭىز يۈزىدىن ئەڭ ئېگىز بولغىنى 6200 مېتىردىن ئېگىز بولۇپ، بىر قانچە يول بۆلىكى ئىچىدىكى ئەڭ خەتەرلىك لىنىيە بولۇپ ھېسابلىنىدۇ.