سائادەت ساتتار ئايتۇغ ئەسەرلىرى

版权声明：转载时请以超链接形式标明文章原始出处和作者信息及本声明
http://www.blogbus.com/saadat-logs/241163859.html

 

قويۇۋېتىپ ياشاپ باققىن مەيلىڭنى

 

سائادەت ساتتار ئايتۇغ

 

ئابدۇلئەھەت داۋۇت تۈركزاتنىڭ ‹‹ئۈگىنەي،بەس، سەنسىز ياشاشنى››غا يانداشما.

 

 

يۇلتۇزلارغا ئېيتىپ يۈرمە ئەرزىڭنى،

مەندىن ئۆزگە تىڭشىمايدۇ دەردىڭنى،

ئۇنتۇغانلا بولساڭ مەيلى ئەھدىڭنى،

ھەمراھ قىلىپ ئاشۇ جايىل پەيلىڭنى،

قويۇۋېتىپ ياشاپ باققىن مەيلىڭنى،

كۆرگۈم يوقتۇر ئەمدى سۇلغۇن ئەپتىڭنى.

 

باغقا كىرسەڭ گۈللەر مىنى سورايدۇ،

يالغۇز دەرەخ دەردلىك بېقىپ قارايدۇ،

ئەتراپىڭنى مىڭلاپ  سۇئال ئورايدۇ،

كۆزۈڭ ھامان مىنى ئىزدەپ مارايدۇ،

قويۇۋېتىپ ياشاپ باققىن مەيلىڭنى،

كۆرگۈم يوقتۇر ئەمدى سۇلغۇن ئەپتىڭنى.

 

شامال ساڭا سىرلىرىنى بەرمەيدۇ،

گۈللەر ئەمدى قاناتىنى كەرمەيدۇ،

مەندىن ئۆزگە بېغىڭغا گۈل تەرمەيدۇ،

پىنھانىڭغا ئۆزگە يېقىن كەلمەيدۇ،

قويۇۋېتىپ ياشاپ باققىن مەيلىڭنى،

كۆرگۈم يوقتۇر ئەمدى سۇلغۇن ئەپتىڭنى.

 

بۇلاقلاردىن ئىزدەپ يۈرمە سائادەت،

تاش جىسمىدا مەۋھۇم بىلسەڭ جاسارەت،

ھەسرىتىڭدىن بەرمە ھەرگىز بىشارەت،

كەچمىشلەرگە دەپنىلەنگەن  ھارارەت،

قويۇۋېتىپ ياشاپ باققىن مەيلىڭنى،

كۆرگۈم يوقتۇر ئەمدى سۇلغۇن ئەپتىڭنى.

 

پىنھانلاردا تۆكۈپ يۈرمە يېشىڭنى،

ياۋلار تامان ئاتما تەنھا تېشىڭنى،

قىسمەتلەرگە ئىگىپ يۈرمە بېشىڭنى،

تۈرمە ھەرگىز قۇشۇماڭنى-قېشىڭنى،

قويۇۋېتىپ ياشاپ باققىن مەيلىڭنى،

كۆرگۈم يوقتۇر ئەمدى سۇلغۇن ئەپتىڭنى.