سائادەت ساتتار ئايتۇغ ئەسەرلىرى

版权声明：转载时请以超链接形式标明文章原始出处和作者信息及本声明
http://www.blogbus.com/saadat-logs/237174597.html

مۇڭدىشايلى كەل!

سائادەت ساتتار ئايتۇغ

سۇبھىيدىكى ئىزغىرىن شامال،

سالامىڭنى ئېلىپ كەلدى يار.

ئۇندا باردۇر چەكسىز سېغىنىش،

لېكىن مەۋھۇم مەن كۈتكەن باھار.

شۇنچە كۈتسەم تۇنجى مەكتۇپنى،

ھېچ كۆڭلۈڭنى قىلمىدىڭ ئىزھار.

شاماللاردىن ئەۋەتمە سالام،

پىنھانىڭدا سىرلىق پىچىرلاپ.

مەنزىل يىراق، ئۇلاغلار ئورۇق،

يۈرمىگەيسەن يەنە تېڭىرقاپ،

ئۆمۈر ئاتلىق كونا ھارۋىنىڭ،

چاقلىرىمۇ قالدى غىچىرلاپ.

مۇڭدىشايلى ئۇنتۇپ ھەممىنى،

نۇرغۇن سىرلار كەتسۇن يىشىلىپ.

مۇڭىمىزغا گۇۋاھ مەجنۇنتال،

يىغلاپ كەتسۇن بىزگە ئېسىلىپ.

كەچكۈزدىكى باغرى قان غۇنچە،

مۇرادىغا يەتسۇن ئېچىلىپ.