سائادەت ساتتار ئايتۇغ ئەسەرلىرى

版权声明：转载时请以超链接形式标明文章原始出处和作者信息及本声明
http://www.blogbus.com/saadat-logs/234015281.html

ئالما ساتقۇچى بوۋاي

سائادەت ساتتار ئايتۇغ

 

ئۈرۈمچىنىڭ كەچكۈز ئاخشىمى،

جاندىن ئۆتەر بۇ ئاچچىق سوغۇق.

بىرى بىزار ئىسسىق ئۆيىدىن،

بىرلىرىگە كىرەرگە ئۆي يوق.

 

ئەڭ ئاخىرقى بىر تال يوپۇرماق،

ئۇچۇپ چۈشتى قارنىڭ ئۈستىگە.

ھارۋىسىنى سۆرەپ يۈرىدۇ،

باققال بوۋاي كونا رەستىدە.

 

خېرىدارسىز ئۈششۈگەن ئالما،

ئىگىسىدەك تۇرىدۇ مىسكىن.

ئالدىراشلا ئۆتكەن كىشىلەر،

پەرۋا قىلماس ئۇلارغا لېكىن.

 

بوۋاي قولى تىترەپ تۇرسىمۇ،

ئالمىلارنى تىزىدۇ تاللاپ.

مارارى يوق، يەتمەيدۇ ئۈنى،

ئالمىلارنى سېتىشقا توۋلاپ.

 

قاراپ قويسا بىرلىرى ناگان،

نۇرلىنىدۇ بوۋاينىڭ كۆزى.

-تاللىۋېلىڭ، غۇلجا ئالمىسى...

تەكرارلىنار شۇ كونا سۆزى.

***

ئۈرۈمچىنىڭ كەچكۈز ئاخشىمى،

جاندىن ئۆتەر بۇ ئاچچىق سوغۇق.

يەنە شۇنداق توۋلىدى بوۋاي،

ئەڭ ئاخىرقى ئاۋازدا بوغۇق...

 

2012-11-14