ھۆسنخەت نۇسخىلىرى: تۈز خەت نۇسخىسى

ھۆسنخەت نۇسخىلىرى: تۈز خەت نۇسخىسى

ھۆسنخەت نۇسخىلىرى: تۈز خەت نۇسخىسى

ۋاقتى: 2015-05-11 ئاۋاتلىقى: 5080 قېتىم

يانفوندا كۆرۈش

تۈز خەت نۇسخىسى

ئۇيغۇر خەتتاتلىقىدا ھۆسىنخەت نۇسخىلىرى ناھايىتى كۆپ. بولۇپمۇ ھازىر قوللىنىۋاتقان ئەرەب يېزىقى ئاساسىدىكى ئۇيغۇر يېزىقىنىڭ نۇسخىلىرى ئالاھىدە كۆپ. بىراق، ھەر خىل تارىخىي سەۋەبلەر تۈپەيلىدىن بىر قىسىم نۇسخىلار بىزگىچە يېتىپ كىلەلمىگەن، يەنە بىر قىسىم نۇسخىلار قوللىنىش دائىرىسى تولىمۇ تار، كىشىلەر قوبۇل قىلالمىغان بولغانلىقتىن، ئۆزلىكىدىن قېپقېلىپ يوقالغان. ھازىر قايتا رەتلەپ، ئاساسەن تۇراقلاشتۇرۇلغان، كۆپرەك قوللىنىلىدىغان نۇسخا 12 خىل ۋە بىر قانچە شەكىل بولۇپ، ھەر بىر نۇسخا ۋە شەكىلىنىڭ يېزىلىش ئۇسۇلىدا، ھەرپ ئۆلچىمىدە ئۆزىگە خاس روشەن ئالاھىدىلىكلەر بار. بۇ ئالاھىدىلىكلەر نۇسخىنى شەكىللەندۈرۈپ تۇرىدۇ.

تۈز خەت نۇسخىسى ئۇيغۇر خەتتاتلىقىدا يېڭى ھەمدە ئاساسلىق نۇسخىلارنىڭ بىرى بولۇپ، ئۇيغۇر يېزىقىدىكى مەتبۇئاتلاردا، خەت بېسىش ماشىنكىلىرى، ئېلىكتىرونلۇق ماشىنكىلاردا مەتبەئە شەكلى بىلەن ئۆز گۈزەللىكىنى نامايەن قىلسا، قوليازما شەكىللىرى ئېلىپبە ۋە بىر قىسىم باشلانغۇچ، ئوتتۇرا مەكتەپلەرنىڭ دەرسلىك كىتابلىرىدا ئالاھىدە كۆزگە چېلىقىدۇ ھەمدە بىر قىسىم ئىدارە–ئورگان، كان–كارخانىلارنىڭ ۋىۋىسىكىلىرى، يىغىن پىلاكاتلىرىدا، كۆرگەزمە، يەرمەنكە ۋە تەشۋىقات سورۇنلىرىدا چېلىقىپ تۇرىدۇ. بۇ نۇسخىنىڭ ئەمەلىي قوللىنىش قىممىتى يۇقىرى، قوللىنىلىدىغان ئورۇنلىرى كۆپ، بولۇپمۇ سىياسىي تۈس ئالغان يىغىن ۋە پائالىيەتلىرىنىڭ خەتلىرىنى يازسا ناھايىتى ھەيۋەتلىك كۆرۈنىدۇ.

تۈز خەت نۇسخىسىدا ھەرپلەرنىڭ قۇرۇلمىلىرى توق، ئۇستىخانلىق، ئېگىز–پەسلىكى، ئۇزۇن–قىسقىلىقى نورمال يېزىلىدۇ. ھەرپلەرنىڭ تىك قۇرۇلما سىزىقلىرى قەلەم توملۇقىنىڭ ئۈچتىن ئىككى قىسىمىغا تەڭ ھالدا تۈز تارتىلىدۇ. بۇ نۇسخىدا ھەرپلەر قىرسىز، سىيلىق ، كىرتىكلىرى توغرا سىزىقتىن بىر چېكىت ئېگىزلىكتە ئۇچلۇق، باش كىرتىكلىرى سەل ئېگىز، كەڭ يېزىلىدۇ.

تۈز خەت نۇسخىسى ئۇيغۇر خەتتاتلىقىدا ۋەكىل خارەكتېرلىك، ئۆلچەملىك، قېلىپلاشقان نۇسخا بولغاچقا، ئۇنى خالىغانچە ئۆزگەرتىپ يېزىشقا بولمايدۇ.ھۆسنىخەت يازغاندا ئورۇننىڭ ئۇزۇن–قىسقىلىقى، كەڭ–تارلىقىغا قاراپ خەتنى قورۇپ ياكى سوزۇپ، توم ياكى ئىنچىكە يازغاندىمۇ قۇرۇلما شەكىللىرىنى ئۆزگەرتىۋەتمەسلىك كېرەك.

تۈز خەت نۇسخىسى ئۆلچەملىك، قېلىپلاشقان ۋە ئاساسلىق نۇسخا بولغاچقا، ھەۋەسكارلار بۇ نۇسخىنى ئۆگىنىشتە خەتتاتلاردا بولۇشقا تېگىشلىك ئەستايىدىللىق ئىستىلىنى تۇرغۇزۇشى، زېرىكمەي ئۆگىنىش مىجەزىنى يېتىلدۈرۈشى، ھۆسنىخەتنى قائىدىلىك، ئىملاسى توغرا يېزىشنى ئۆگىنىشى كېرەك.

مەنبەسى: تەڭرىتاغ ئۇيغۇرچە تورى

تەييارلىغۇچى: توخنىياز ئىسمائىل نىدائىي

Tags:

بايانات

بۇ كەمىنە توخنىياز ئىسمائىل نىدائىينىڭ يانبىلوگى بولۇپ، يانبىلوگدا ئېلان قىلىنغان بارلىق يازمىلارنى قېرىنداشلىرىمنىڭ بەھىرلىنىشىگە سۇندۇم. يانفون نومۇرۇم: 18999832214 ئۈندىدار نومۇرۇم: otyurak001 ئەگەر يانبىلوگىم ھەققىدە ھەر قانداق تېخنىكىلىق مەسىلە بايقالسا يانبىلوگ ئورگان ئۈندىدار سۇپىسى yanbilog غا ئەگىشىپ مەسىلە مەلۇم قىلسىڭىز بولىدۇ!

تەلەي قاپىقىدىن چىققان يازمىلار

باھالار: ئىسمىڭىز:

باھالار رېتى