خەلقئارا لىنىيەسى مەخسۇس خەۋىرى: Bloomberg ئاگېنتلىقىنىڭ 10-مارت خەۋەر قىلىشىچە، ‹‹ ئالما ›› شىركىتى جۇڭگودىكى ئىستېمالچىلارغا ماس كېلىدىغان يانفون ئىشلەپچىقارغاندىن كېيىن، جۇڭگو بازارلىرىدا قىزغىن ئالقىشىغا ئېرىشىپ، 2015-يىلنىڭ 1-پەسلىدە جۇڭگو رايونىدىن قىلغان كىرىملا 16 مىليارد ئامېرىكا دوللىرىغا يەتكەن. بۈگۈنكى كۈندە، ‹‹ ئالما ›› شىركىتى جۇڭگو بازارلىرىنى تېخىمۇ ياخشى ئېچىش ئۈچۈن، ئۆزىنىڭ يېڭى مەھسۇلاتى بولغان ئەقلىي ئىقتىدارلىق قول سائىتى Apple Watch نى جۇڭگو بازارلىرىغا سالماقچى بولغان.

خەۋەر قىلىنىشىچە، سېرىق ئالتۇن نۇسخىسىدىكى ئالما قول سائىتى جۇڭگودىكى ئىستېمالچىلارنىڭ زىبۇ زىننەت بۇيۇملىرىغا بولغان ئېھتىياجىغا ماسلاشتۇرۇپ ياسالغان، بۇنىڭدىن باشقا يەنە، بۇ سائەتكە پاراڭلاشقىلى بولىدىغان ئەمەلىي قوللىنىشچان پروگرامما ــــ ئۇندىدار قاچىلانغان.

جۇڭگو بازار تەتقىقاتى گۇرۇھىنىڭ مۇدىرى لېي شياۋشەننىڭ ئېيتىشىچە، ئالما قول سائىتىنىڭ جۇڭگو بازىرىدا كۆپ سېتىلىشىغا ئۈمىد زور ئىكەن، چۈنكى ئالما مەھسۇلاتلىرى جۇڭگودىكى ئىستېمالچىلارنىڭ ئارزۇسىغا ماس كېلىدىكەن ھەمدە باھاسىمۇ ئۇنچە يۇقىرى ئەمەسكەن . ئىگىلىنىشىچە، ئالما قول سائىتىنىڭ سېتىلىش باھاسى 2588 يۈەن ئىكەن.