ئاپتونوم رايونلۇق پارتكومنىڭ مۇئاۋىن شۇجىسى، ئاپتونوم رايوننىڭ رەئىسى نۇر بەكرى 22 – سېنتەبىر كەچتە شىۋېتسىيەنىڭ جۇڭگودىكى باش ئەلچىسى لارس فرېدېن بىلەن كۆرۈشتى.

نۇر بەكرى لارس فرېدېن ۋە ئۇنىڭ ھەمراھلىرىنىڭ شىنجاڭغا زىيارەتكە كەلگەنلىكىنى قىزغىن قارشى ئالدى. ئۇ مۇنداق دېدى: شىنجاڭ جۇڭگونىڭ غەربكە ئېچىۋېتىشتىكى كۆۋرۈك بېشى ئىستىھكامى بولۇش سۈپىتى بىلەن روشەن رايون ئالاھىدىلىكىگە ئىگە. ھازىر، مەركىزىي ھۆكۈمەتنىڭ سەمىمىي كۆڭۈل بۆلۈشى، قېرىنداش ئۆلكە، شەھەرلەرنىڭ زور كۈچ بىلەن قوللىشى، شىنجاڭدىكى ھەر مىللەت خەلقنىڭ بىر نىيەت، بىر مەقسەتتە قول تۇتۇشۇپ ئىلگىرىلىشى نەتىجىسىدە، شىنجاڭدا ئالەمشۇمۇل ئۆزگىرىشلەر بارلىققا كەلدى.

باش شۇجى شى جىنپىڭ ئوتتۇرىغا قويغان يىپەك يولى ئىقتىساد بەلبېغىنى ئورتاق قۇرۇش تەسەۋۋۇرىدا شىنجاڭنىڭ يىپەك يولى ئىقتىساد بەلبېغىدىكى يادرولۇق رايون ئىكەنلىكىنى ئوتتۇرىغا قويۇلدى. ئاسىيا – ياۋروپا دۆلەتلىرىنىڭ ئومۇميۈزلۈك ھەمكارلىشىشىنى تەشەببۇس قىلىش ئاسىيا – ياۋروپا دۆلەتلىرىگە يېپيېڭى تەرەققىيات، ھەمكارلىق بوشلۇقى يارىتىپلا قالماستىن، شىنجاڭنىڭ ئىقتىسادىي تەرەققىياتىنى تېپىلغۇسىز پايدىلىق پۇرسەتكە ئىگە قىلىپ، شىنجاڭنىڭ جۇغراپىيە، بايلىق، رايون ئەۋزەللىكىنى ئىقتىسادىي ئەۋزەللىككە ئايلاندۇردى. شىنجاڭ شەرق بىلەن بىرلىشىپ، غەربكە چىقىرىشتىكى مۇھىم تۈگۈن بولۇپ، ئەتراپىدىكى ھەرقايسى دۆلەتلەر بىلەن ئىقتىسادىي جەھەتتە بىر – بىرىنى تولۇقلاشچانلىققا ئىگە. شىنجاڭ تۆت نۆۋەتلىك جۇڭگو ياۋروپا – ئاسىيا كۆرگەزمىسىنى مۇۋەپپەقىيەتلىك ئۆتكۈزدى، بۇ شىنجاڭنىڭ ئىقتىسادىي تەرەققىياتىدا غايەت زور تۈرتكىلىك رول ئوينىدى.

باش ئەلچى لارس فرېدېن ئەپەندىنىڭ جۇڭگو شىنجاڭدىكى بۇ قېتىمقى زىيارىتى ئارقىلىق شىۋېتسىيە بىلەن جۇڭگو شىنجاڭنىڭ كۆپ ساھەلەردىكى ھەمكارلىقى ۋە ئالاقىسىنى يەنىمۇ ئىلگىرى سۈرۈپ، شىۋېتسىيەلىك تېخىمۇ كۆپ كارخانىچىنىڭ جۇڭگو شىنجاڭنىڭ ئېچىش ۋە قۇرۇلۇش ئىشلىرىغا قاتنىشىپ، تەرەققىيات ئۈستىدە ئورتاق ئىزدىنىپ، ئۆزئارا مەنپەئەت يەتكۈزۈپ، ئورتاق تەرەققىي قىلىشىنى ئۈمىد قىلىمەن.

لارس فرېدېن مۇنداق دېدى: بۇ شىنجاڭغا ئىككىنچى قېتىم كېلىشىم. شىنجاڭنىڭ بايلىقى مول، يېقىنقى بىر قانچە يىلدىن بۇيان شىنجاڭنىڭ ئىقتىسادىي، ئىجتىمائىي ئىشلىرى ئۇچقاندەك تەرەققىي قىلىپتۇ، ئىككى تەرەپنىڭ ئۆزئارا مەنپەئەت يەتكۈزۈش ئاساسىدىكى ھەمكارلىقنى يەنىمۇ كۈچەيتىپ، ھەرقايسى ساھەلەردىكى ئالاقىنى ئىلگىرى سۈرۈشىنى ئۈمىد قىلىمەن.