ھەر ئىشتىن ئۆزىڭىزنى قاچۇرماي مەسئۇلىيەتچان بولۇڭ.. تۇرمۇشتىكى قىيىنچىلىق ۋە خاتالىقلارغا نىسبەتەن ئۆزىڭىزنى قاچۇرماي مەسئۇلىيەتچان بولۇڭ. چۈنكى مەسئۇلىيەتنى ئۈستىگە ئېلىش تەسەۋۋۇرىڭىزدىكىدەك ئۇنداق قورقۇنچلۇق ئەمەس. ئىقتىدارلىق ئادەملەرلا مەسئۇلىيەتنى ئۈستىگە ئېلىشقا جۈرئەت قىلالايدۇ، ئۇنداق ئادەملەر چوڭ ئىشلارنى قىلالايدىغان، دوست بولۇشقا ئەرزىيدىغان، ھەر زامان خۇشال يۈرىدىغان ئادەملەردۇر. مەسئۇلىيەتسىز ئادەملەردە ئۆزىگە نىسبەتەن قىلچە تەلەپ بولمايدۇ، ئۇنداق ئادەملەرنىڭ بىر مەھەللىلىك ئۆز بېشىمچىلىقى ئۆزىگە ئۆمۈرلۈك ئازاب ئېلىپ كېلىدۇ.

    باشقىلارنى ئاز ئەيىبلەپ، كەڭ قورساق بولۇڭ. كەڭ قورساقلىقنىڭ ئېسىل ئەخلاق ئىكەنلىكىنى ھەممەيلەن بىلىدۇ، ئەمما ئۇنىڭ ئۆزىگە ھەم باشقىلارغا پايدىلىق ئىكەنلىكىنى بىلىپ كەتمەيدۇ. ئەگەر سىز باشقىلارغا كەڭ قورساقلىق قىلسىڭىز، جاھانمۇ شۇنىڭغا بېقىپ سىزگە كەڭچىلىك قىلىدۇ، ئاداۋەت ساقلاش سىزنىمۇ خۇددى دوزاخ ئوتىدەك ئازابلايدۇ. ئەگەر سىز باشقىلارنى ئەيىبلىگەن چاغدا، ئۆزىڭىزگىمۇ مەندىمۇ سەۋەنلىك ئۆتمىگەنمىدۇ؟ دەپ سوئال قويالامسىز؟ باشقىلارنى ئەيىبلەش ئاسان، ئەمما ئېسىڭىزدە بولسۇنكى، ئالتۇن بىلەن ئېلىپ بولماس قالغان كۆڭۈلنى.

     باشقىلارغا سوغۇق پوزىتسىيەدە بولماي قىزغىن بولۇڭ. ھەممە ئادەم بىر بىرىگە قىزغىن بولۇپ، كۈلكە-چاقچاق بىلەن ئۆتسە، تۇرمۇش نەقەدەر گۈزەللىككە تولغان بولار ئىدى.  قىزغىنلىق بىر بىرىگە تەسىر كۆرسەتكەندەك، سوغۇقلۇقمۇ ئۆزئارا تەسىر قىلىدۇ، ئەگەر ئاراڭلاردا ئاشۇنداق مۇز تەلەت ئادەم بولۇپ قالسا، ھەممەيلەن بىرخىل ئوڭايسىزلىقتا ئۆتەر. سوغۇق تەلەت شەخسىيەتچى ئادەمنى ھېچكىمنىڭمۇ ئارىسىغا ئالغۇسى كەلمەيدۇ، ئاخىرىدا ئۇنىڭ ئۆزىمۇ «ئۆزۈم تاپقان بالاغا نەگە باراي دەۋاغا» دېگەن ئاقىۋەتكە قالىدۇ.

ئۆزىڭىزنى بىلىپ، گۇمانخورلۇقتىن يىراق بولۇڭ. تەربىيە كۆرگەن ئادەم ئەخلاقلىق بولىدۇ، ئەخلاقلىق ئادەم چىقىشقاق كېلىدۇ، ئەخلاقسىز گۇمانخور ئادەمنىڭ دوستى بولمايدۇ، ئۆزىمۇ ھەرخىل ھەسەتخورلۇقتىن پۇچۇلىنىپش رەشىك ئوتىدا ئازابلىنىپ ياشايدۇ. شۇنداق بولغاچقا، گۇمانخورلۇقتىن قۇتۇلۇپ ئۆزىڭىزنى تەربىيىلەپ، دوستلىرىڭىز ئارىسىدا خۇشال خۇرام ياشاڭ.

      شان شەرەپ كۆپەيسۇن، شۆھرەتپەرەسلىك ئازايسۇن. ئەنگلىيىلىك پەيلاسوپ بېكون: «شۆھرەتپەرەسلەرنى ئەقىللىق ئادەملەر كۆزگە ئىلمايدۇ، ھاماقەتلەر قوللايدۇ، خۇشامەتچىلەر بولسا چوڭ كۆرىدۇ، ئۆزى بولسا ئاشۇ شۆھرەتپەرەسلىكنىڭ قۇلى بولۇپ ياشايدۇ» دېگەنىكەن. قەلبىدە شان-شەرەپ تۇيغۇسى بار ئادەم ھامان ئالغا ئىنتىلىش روھىدا بولىدۇ، ئەمما ئۆزىنىڭ شۆھرەتپەرەسلىكىنى قاندۇرۇش كويىدا بولغانلار بولسا ھەرخىل پۇرسەتپەرەسلىك ۋاستىلىرى بىلەن شان-شەرەپكە ئېرىشمەكچى بولىدۇ. بۇلارنىڭ ئاشۇ ساختا شەرىپى خەلقى ئالەم ئالدىدا ئۆز ئەپتىنى ئاشكارىلىغاندىن كېيىن، ئۇلارغا ئېلىپ كېلىدىغىنى باشقىلارغا دېيەلمەيدىغان دەرتلىك ئازابلا بولىدۇ.

      تۇرمۇشىڭىزدىكى ئۆكۈنۈشنى ئازايتىپ، جەسۇرانە ئىلگىرىلەڭ. ھايات يولى گويا كېمىنى سۇنىڭ ئېقىنغا قارشى ھەيدىگەندەك ئىش. ئالغا ئىلگىرىلىيەلمىسەڭ كەينىگە چېكىنىپ كېتىسەن، ھازىرقى زامان ئىلىم پەن ئۇچقاندەك تەرەققىي قىلىۋاتقان زامان، بۇرۇنقى ئۆگەنگەن بىلىمنى بىر ئۆمۈر ئىشلىتىمەن دېيىش رېئاللىققا ماسلاشمايدىغان ئىش بولۇپ قالدى. داۋاملىق ئۆگىنىپ جەسۇرانە ئىلگىرىلىگەندىل،ا ئادەم پۇشايماندا قالمايدۇ، ئۆتۈپ كېتىۋاتقان ۋاقىتقا قاراپ قۇرۇق ئۆكۈنۈش خۇددى بىھۇدە ئۆتكۈزسە ۋاقىتنى كىشى، قالىدۇ ھامان پۇشايمان بىلەن دېگەندەك ئىش.

        ھەممىنى زىغىرلاپ كەتمەي، مەرترەك بولۇڭ. كونىلار بەزىنى بىلمەسكە سال دەپتىكەن. بۇ راستلا بىپەرۋا بول دېگەنلىكمۇ؟ ياق. بۇ ھەممە ئىشنى زىغىرلاپ كەتمەي، مەردرەك بول دېگەنلىك. مەرت ئادەم ھەممە ئىشنى يىپىدىن يىڭنىسىغىچە زىغىرىلاپ كەتمەيدۇ، دوست-يارەنلىرى بىلەن ئىناق ئۆتەلەيدۇ، بۇنداق ئادەم ھەر جەھەتتىن ساغلام كېلىدۇ. ئەكسىچە بولغانلار باشقىلارنىڭ ھەر بىر سۆز ھەرىكىتى بىلەن ھېسابلىشىپ ئولتۇرىدۇ، نەتىجىدە ئۆزىگە ئۆزى ئىش تېپىۋالىدۇ. شۇڭا مۇنداق زىغىرلاشنى ئاز قىلىپ، كەڭ قورساقلىق بىلەن ياشىغان ياخشى، شۇ چاغدىلا سىز بۇ جاھاندا مۇنداق تۇتامى يوق كۆڭۈلسىزلىكلەرنىڭ كۆپ ئەمەسلىكىنى ھېس قىلىسىز.

   باشقىلارنى ماختاپ، ھەسەتخورلۇق قىلماڭ. باشقىلارنى چىن كۆڭلىڭىزدىن ماختاڭ. چۈنكى سىز باشقىلارنى ماختاش بىلەن بىرگە ئۆزىڭىزنىمۇ ماختىغان بولىسىز. ھەربىر ئادەم ئۆز ئىشىنىڭ ئۇتۇقلۇق بولۇشنى خالايدۇ، باشقىلارغا ئۇتۇق قازانغاندا ئۇنى ماختاش كېرەك، ھەرگىز ئىچى تارلىق قىلماسلىق كېرەك، ئەنە شۇ چاغدىلا خەقنىڭ ئۇتۇقى تېخىمۇ گەۋدىلىك بولىدۇ.

«ھاياتلىق» ژۇرنىلىدىن ئېلىندى.