كىلىنتوننىڭ بالىلىقتىكى تۇرالغۇسىغا روژدېستۋو بايرىمىدا ئوت قويۇۋېتىلدى، ساقچىلار قەستەن ئوت قويۇۋەتتى دەپ قىياس قىلدى

     «ئوربىتا تورى ئۇنىۋېرسال خەۋىرى» ئەنگلىيە «كۈندىلىك تېلېگرامما گېزىتى»نىڭ 26-دېكابىردىكى خەۋىرىگە قارىغاندا، ئامېرىكىنىڭ سابىق ئەلباشى بېل كىلىنتوننىڭ بالىلىقتىكى تۇرالغۇسىغا روژدېستۋو بايرىمى كۈنى سەھەردە ئوت قويۇۋېتىلگەن. شۇ جايدىكى ساقچىلارنىڭ گۇمان قىلىشىچە، نامەلۇم كىشى قەستەن ئوت قويۇۋەتكەن بولۇشى مۇمكىنكەن.

     ئىگىلىنىشىچە، كىلىنتوننىڭ بالىلىقتىكى تۇرالغۇسى ئاركىنزاس ئىشتاتىدىكى كىچىك بازار ھوپتا بولۇپ، ھازىر مۇزېيغا قىلىنغان، كىلىنتون تۆت ياشقا كىرگۈچە شۇ يەردە تۇرغان. شۇ جاي ۋاقتى 25-دېكابىر سەھەردە، بۇ يەردىن ماشىنىلىق كېتىۋاتقان بىر كىشى ئۆي ئىچىدىن ئىس چىقىۋاتقانلىقىنى كۆرگەن، شۇنىڭ بىلەن دەرھال ساقچىغا مەلۇم قىلغان.

     شۇ جايدىكى ساقچى ئىدارىسىنىڭ باشلىقى ۋېرسوننىڭ بىلدۈرۈشىچە، ساقچى ئىدارىسى سەھەر سائەت ئۈچتىن ئازاق ئۆتكەندە قۇتقۇزۇش تېلېفونى قوبۇل قىلغان، ئوت ئۆچۈرگۈچىلەر دەرھال نەق مەيدانغا يېتىپ بارغان، ئۇلار نەق مەيدانغا بارغان ۋاقىتتا ئۆينىڭ بىر تەرىپىدىن سەككىز فۇت ئېگىزلىكتە ئوت يالقۇنى كۆتۈرۈلگەنلىكىنى كۆرگەن. ئوت بىردەمدىلا ئۆچۈرۈۋېلىنغان، بىراق ئۆينىڭ ئارقىسى بۇزۇلۇپ كەتكەن. ئارقىدىنلا يەرلىك دائىرىلەر ئوت كەتكەن نەق مەيداندىن ئىسپات توپلىغان. ۋېروسوننىڭ بىلدۈرۈشىچە، ئوت مەنبەسىدە كۈچلۈك بېنزىن پۇرىقى باركەن.

     ئىگىلىنىشىچە، بۇ بىر يۈرۈش تۇرالغۇدا كىلىنتوننىڭ بوۋا - مومىسى تۇرغان بولۇپ، ئۆي ئىچىنىڭ بېزەكچىلىكىدە ئالدىنقى ئەسىرنىڭ 40-،50- يىللىرىدىكى ئۇسلۇب ساقلانغان. كىلىنتون ئىلگىرى:«مەن بۇ ئۆيدە مېڭىشنى، سۆزلەشنى، دۇئا قىلىشنى، كىتاب ئوقۇشنى ئۆگەنگەن، بوۋا- مومامدىن ئاشخانىنىڭ دېرىزىسىگە قەغەز مىخلاشنى ئۆگىنىۋالغان»دېگەن.