سنەپدراگون 820 سەپلىنىدىغان لېشى لې Max Pro يانفونى دۆلەت سىرتىدا رەسمىي ئېلان قىلىنغاندىن كىيىن، نۇرغۇنلىغان كىشىلەر ئوخشاشلا مۇشۇ خىل يېڭى بىر ئەۋلاد بىر تەرەپ قىلغۇچ سەپلىنىدىغان شىياۋمى 5 يانفونىنىڭ قاچان ئېلان قىلىنىدىغانلىقىغا تېخىمۇ بەك كۆڭۈل بۆلۈشكە باشلىغان. 6-يانۋار ئەتىگەندە، شىياۋمى شىركىتىدىكى بىر يۇقىرى دەرىجىلىك ئەمەلدار مىكرو بىلوگىدا ئۇچۇر تارقىتىپ، شىياۋمى 5 نىڭ باھار بايرىمىدىن كىيىن ئېلان قىلىنىدىغانلىقىنى ئېيتقان. ئەگەر بۇ ئۇچۇر ئىشەنچلىك بولسا، ئۇنداقتا شىياۋمى 5 دۆلەت ئىچىدىن سېتىۋالغىلى بولىدىغان سنەپدراگون 820 سەپلەنگەن تۇنجى يانفونغا ئايلىنىدىكەن. ئەمما بۇنىڭدىن بۇرۇن، يەنى 1-ئاي ئىچىدە شىياۋمى شىركىتى كۆپچىلىككە يەنە يېڭى بىر يانفونىنى تەييارلىغان، ئۇ بولسىمۇ خوڭمى 3.

    ئەمەلىيەتتە، خوڭمى 3 نىڭ ئۇچۇرى بۇلتۇر 12-ئايدىلا ئۇچۇرلاشتۇرۇش مىنىستىرلىقى تور بېكىتىدە ئاشكارىلانغان. بۇ يانفوننىڭ سىرتقى قېپى مېتالدىن ياسالغان، ئۆلچىمى 139.3×69.6×8.5 مىللىمېتىر بولۇپ، ئېغىرلىقى 143 گىرام كېلىدىكەن. كۈمۈش رەڭ، كۈلرەڭ ۋە ئالتۇن رەڭلىك نۇسخىلىرى بار ئىكەن، ئەمما ئادەمنى ئەپسۇسلاندۇرىدىغان يېرى، رەسىمدىن قارىغاندا، بارماق ئىزىنى تونۇش ئىقتىدارى قوشۇلمىغاندەك كۆرۈنىدىكەن.

    ئاساسلىق سەپلىمىسىگە كەلسەك، بۇ يانفونغا ئېنىقلىق دەرىجىسى بولغان 5.0 دىيۇملۇق ئېكران، 2GB لىق ئىچكى ساقلىغۇچ، 16GB لىق ئاساس ساقلىغۇچ، بەش مىليون ۋە 13 مىليون پىكسېللىق كامېرا قاتارلىقلار سەپلەنگەن. ئاندىرويىد 5.1.1 ئاساسىدىكى MIUI 7.1 سىستېمىسى ئالدىن قاچىلانغان. بۇندىن باشقا، بۇ يانفوننىڭ ئەڭ چوڭ ئالاھىدىلىكى قوش كارتىنى ۋە بارلىق تورنى قوللايدىغان بولۇپ، 4000 مىللىئامپىرلىق چوڭ سىغىملىق باتارىيە سەپلەنگەن.