جۇڭگو خەۋەر تورى 19-نويابىر خەۋىرى: روسىيە تاراتقۇلىرىنىڭ خەۋىرىگە قارىغاندا، روسىيە ئارمىيەسى قوماندانلىق باش ئىشتابىنىڭ جەڭ قىلىشقا مەسئۇل ئەمەلدارى ئەندىل كارتابولوف گېنىرال مۇنۇلارنى بىلدۈرۈپ: روسىيە كۈرەشچى ئايروپىلانلىرى سۈرىيەنىڭ لاككا، دىزۇر، ھەلەب ۋە ئىدىلىب قاتارلىق ئۆلكىلىرىدە 2-نۆۋەتلىك زور كۆلەملىك بومباردىمان قىلىش ھەرىكىتى ئېلىپ باردى، دېگەن. كارتابولوف مۇخبىرلارنى كۈتۈۋېلىش يىغىنىدا مۇنداق دېدى: موسكۋا ۋاقتى ئەتىگەن سائەت بەشتە، روسىيە ھاۋا ئارمىيەسى سۈرىيە چېگرىسى ئىچىدىكى رادىكال تەشكىلات قوراللىق كۈچلىرىگە قارىتا 2-قېتىملىق زور كۆلەملىك زەربە بېرىش ھەرىكىتىنى باشلىۋەتتى.

   روسىيە ھاۋا ئارمىيەسى تەخمىنەن 500 دانە سۈرىيە تېررورچى كۈچلىرىنىڭ ماي توشۇش ماشىنىسىنى پاچاقلاپ تاشلىغان. سائەت بەشتىن باشلاپ بەشتىن 50 مىنۇت ئۆتكىچە روسىيەنىڭ تۇ-22MS بەلگىلىك يىراق مۇساپىلىك بومباردىمان قىلىش ئايروپىلانىدىن تۈزۈلگەن ئاۋىياتسىيە قىسمى چوڭ ئەترىتى لاككا ئۆلكىسى ۋە دىزۇر ئۆلكىسىدىكى ئالتە جايدىكى رادىكال تەشكىلات «شام ئىسلام دۆلىتى» قوراللىق كۈچلىرىنىڭ ئەسلىھەلىرىگە ھۇجۇم قىلغان. ھۇجۇم قىلىش نىشانى قورال-ياراق، ئۇق-دورا ئىسكىلاتى، ھەربىي ماددىي ئەشيالىرىنى ساقلاش ئامبىرى، قوراللىق كۈچلەرنىڭ مەشىق قىلىش بازىسى ۋە پارتلاتقۇچ ياساش نۇقتىسى قاتارلىق جايلار بولغان.