ئۈرۈمچى شەھەر گېزىتى خەۋىرى: ئۈرۈمچىدىكى ئاپتوموبىل ئىگىلىرى 1-ئاپرېلدىن باشلاپ ساي يولى، تاشقى ئايلانما يولى يۈرۈش ھەققىنى قايتۇرۇشقا مۇناسىۋەتلىك ئىشلارنى بېجىرسە بولىدۇ.
ئۈرۈمچى شەھەرلىك ھۆكۈمەت 2015-يىلى 1-ئاينىڭ 1-كۈنىدىن باشلاپ ئۈرۈمچى شەھىرىدىكى ئاپتوموبىللار ۋە سىرتتىن كەلگەن ئاپتوموبىللارنىڭ ساي يولى، تاشقى ئايلانما يولى يۈرۈش ھەققىنى ئەمەلدىن قالدۇردى. ئىلگىرى ئاپتوموبىل ئىگىلىرى تاپشۇرغان ساي يولى ۋە تاشقى ئايلانما يولى ھەققى 2015-يىلى 1-يانۋارنى ئۆلچەم قىلىپ ئارتۇق تۆلەنگەن قىسمى قايتۇرۇلىدىغانلىقىدەك يېڭى سىياسەتتىن كېيىن، كەڭ ئاپتوموبىل ئىگىلىرى ئىزچىل تۈردە بۇ ئىشنىڭ تەرەققىياتىغا كۆڭۈل بۆلۈپ كەلدى. قاچان قايتۇرىدىكەن ؟ قانداق رەسىمىيەتلەرنى ئۆتەش كېرەككەن ؟ ھەممىنى بىر قېتىمدىلا ئالغىلى بولامدىكەن ؟ ھەقنى قەيەردە قايتۇرىدىكەن ؟ دېگەندەك سوئاللار توختىماي چىقتى. 17-مارت ئۈندىدار دوستلار چەمبىرىكىدە تارقالغان ‹‹ ئاپتوموبىللارنىڭ يۈرۈش ھەققىنى قايتۇرۇش ئۇقتۇرۇشى ›› ئاپتوموبىل ئىگىلىرىنى تېخىمۇ جىددىيلەشتۈردى.
مۇشۇ مۇناسىۋەت بىلەن مۇخبىر ئۈرۈمچىدىكى مۇناسىۋەتلىك تارماقلاردىن بۇ ئۇچۇرنىڭ راست-يالغانلىقىنى ئېنىقلىماقچى بولغاندا، قارشى تەرەپ 1-فېۋرالدىن باشلاپ يول يۈرۈش ھەققىنىڭ قايتۇرۇلىدىغانلىقىنى ئاشكارلىغان. مۇناسىۋەتلىك تەرەپلەر: ھەق قايتۇرۇلىدىغانلار كۆپ بولغاچقا، ئاپتوموبىل ئىگىلىرىنىڭ قولىدىكى ھۆججەتنىڭ تولۇق ياكى ئەمەسلىكىگە قارىتا تۈركۈمگە بۆلۈپ ھەق قايتۇرۇش رەسمىيىتى بېجىرىمىز، كونكرېت تەپسىلاتلار ئۇقتۇرۇش شەكىلىدە جامائەتچىلىككە ئېلان قىلىنىدۇ، كەڭ ئاپتوموبىل ئىگىلىرىنىڭ ئالدىراپ كەتمەسلىكىنى ئۈمىد قىلىمىز، دېگەن.
شەخسىي ئاپتوموبىل ئىگىسى ۋاڭ يۈ مۇنداق دېدى: ھەق قايتۇرۇش نۇقتىلىرىنىڭ قاتنىشىنىڭ قولايلىق، ھەق قايتۇرۇش كۆزنەكلىرىنىڭ كۆپ بولۇشىنى، ھەق قايتۇرۇش رەسمىيەتلىرىنىڭ ئاددىي بولۇشىنى ئۈمىد قىلىمەن. مەن ئىككى يىللىق ساي يولى، تاشقى ئايلانما يولى يۈرۈش ھەققىنى بىر قېتىمدىلا تاپشۇرغان، بىر قېتىمدىلا بەلكىم 2000 يۈەن قايتۇرۇلۇشى مۇمكىن، بۇنىڭدىن بەك خوش بولدۇم، لېكىن ۋاقتى كەلگەندە ئادەم كۆپ بولۇپ كېتىپ، ئۇزۇن ئۆچرەتتە تۇرۇپ، خىزمەتكە دەخلى يېتىپ قالارمۇ دەپ ئەندىشىمۇ قىلىۋاتىمەن، ھۆكۈمەتنىڭ بۇ جەھەتتىكى خىزمەتلەرنى تېخىمۇ ياخشى ئىشلىشىنى ئۈمىد قىلىمەن.