شىنخۇا تورى، ئۈرۈمچى 18-ماي تېلېگراممىسى: شىنجاڭ سەنئەت يۇرتى ناخشا-ئۇسسۇل ئۆمىكىنىڭ «تۆت بىر تۈركۈم» مەدەنىيەت ئارقىلىق ئاممىغا نەپ يەتكۈزۈش ئويۇن قويۇش ئەترىتى 16-ماي قەشقەر يېڭى شەھەر ناھىيەسىنىڭ ھەر قايسى يېزا-كەنتلىرىدە ئويۇن قويدى، ئاممىنىڭ ئوتتەك قىزغىن كەيپىياتى ۋە تەلەپلىرى ئاستىدا ئۆمەكتىكى داڭلىق كومپوزىتور ۋە ناخشىچى مەھمۇد سۇلايمان ئارقا-ئارقىدىن تۆت-بەش ناخشا ئېيتىۋەتتى. بۇ كۈنى بۇ ناھىيەدىكى 10 مىڭغا يېقىن كادىر-ئامما ئويۇن كۆرۈپ، ئۇزاققىچە ئالقىش سادالىرىنى ياڭراتتى.
بۇ ناھىيەنىڭ تازغۇن يېزىسىدىكى كەنت ئاھالىسى ئاتىگۈل مۇھەممەد مۇنداق دېدى: بۇ قېتىم ئاساسەن دېگۈدەك داڭلىق ئارتىسلىرىمىز كەپتۇ، بىز ئىلگىرى ئۇلارنى تېلېۋېزوردىلا كۆرەتتۇق، بۇنداق ئۇدۇلمۇئۇدۇل تۇرۇپ ئۇلارنىڭ نادىر سەنئەت نومۇرلىرىدىن ھۇزۇرلىنىشىمىزنى ئويلاپمۇ باقماپتىكەنمەن، ھەقىقەتەن بەك ھاياجانلاندىم.
شىنجاڭ سەنئەت يۇرتى ناخشا-ئۇسسۇل ئۆمىكىنىڭ دۆلەتلىك 1-دەرىجىلىك ئارتىسى ئايتۇرسۇن نىياز مۇنداق دېدى: ئۆمىكىمىزنىڭ بۇ قېتىم يېڭىشەھەر ناھىيەسىدە قويىدىغان ئويۇنلىرى ناھايىتى زىچ ئورۇنلاشتۇرۇلدى، بەزى كۈنلىرى ئىككى مەيدان ئويۇن قويىمىز، قىزغىن، ئاقكۆڭۈل كەنت ئاھالىلىرىنى كۆرگەندە جاپالىرىمىزنىڭ ئەرزىيدىغانلىقىنى ھېس قىلىمىز».
ئىگىلىنىشىچە، شىنجاڭ سەنئەت يۇرتى ناخشا-ئۇسسۇل ئۆمىكىنىڭ مەدەنىيەت ئارقىلىق ئاممىغا نەپ يەتكۈزۈش ئۆمىكى يېڭىشەھەر ناھىيەسىدە ئىككى كىچىك ئەترەتكە بۆلۈنگەن بولۇپ، ھەر قايسى يېزا-بازارلاردا جەمئىي 20 مەيداندىن ئارتۇق ئويۇن قويىدىكەن.