جاھان ئاگېنتلىقى 23-ئاپرېل خەۋىرى؛ لەگلەك تورى تەرجىمىسى: يەمەندە سەئۇدى ئەرەبىستان باشچىلىقىدىكى ھاۋا ھۇجۇمى ئاياغلاشقانلىقى جاكارلانغان بولسىمۇ ھاۋا ھۇجۇملىرى داۋاملاشماقتا. تۈنۈگۈن كەچتە بىرلەشمە ئارمىيە جەڭ ئايرۇپىلانلىرى ھۇسىيلەرگە ئائىت قىسىملارنىڭ نىشانلىرىغا ھاۋادىن زەربە بەردى. يەرلىك دائىرلەرنىڭ ئېيتشىچە، بىرلەشمە ئارمىيە قسىىملىرىغا ئائىت جەڭ ئايرۇپىلانلىرى تائىز ۋىلايىتى چېگرىسىغا يېقىن سەھۇل رايۇنى بىلەن يەرىم رايۇنىغا ھاۋادىن ھۇجۇم قوزغىدى. سەئۇدى ئەرەبىستان باشچىلىقىدىكى بىرلەشمە ئارمىيە قىسىملىرى ئىككى كۈن بۇرۇن يەمەنگە قارىتىلغان ھاۋا ھەرىكتىنىڭ ئاياغلاشقانلىقىنى ئېلان قىلغان ئىدى، ئەمما چارشەنبە كۈنى ھۇسىيلەرنىڭ كونتروللىقىدىكى تائىز رايۇنىنىڭ غەربىدىكى 35-ئەترەتنى ھاۋادىن بومباردىمان قىلغان ۋە ھۇسىيلەرگە تەۋە تانكىلارغا ۋەيران قىلغان. ئەدەننىڭ شىمالىدىكى لاھىج رايۇنىمۇ ھاۋا ھۇجۇمىغا ئۇچرىغان.
سەئۇدى ئەرەبىستان باشچىلىقىدىكى بىرلەشمە ئارمىيە باياناتچىسى ئەھمەد ئەسىرى، سەيشەنبە كۈنى يەمەندە ھۇسىيلەرگە قارىتىلغان «كەسكىن قارار بورىنى» ھەرىكتىنىڭ تاماملانغانلىقىنى جاكارلىغان ئىدى. سەئۇدى ئەرەبىستان مۇداپىئە مىنىستىرلىكى، بۇ قېتملىق ھەرىكەتنىڭ نىشانىغا يەتكەنلىكى ، ئەمدىلىكتە يېڭى بىر سىياسىي باسقۇچقا ئۆتىدىغانلىقىنى بىلدۈرگەن ئىدى. باياناتچى ئەسىرى، بۇ قېتىملىق ھەرىكەتنىڭ دىققەت قىلنغان ھالەتتە ئېلىپ بېرىلغانلىقى، ھۇسىيلەر ۋە سابق پرېزىدېنت سالىھنىڭ نىشانلىرىغا زەربە بەرگەنلىكى، شۇنداقلا بۇ ھەرىكەتلەرنىڭ يەمەن ھۆكۈمىتى ۋە پرېزىدېنتنىڭ تەلىپى بويىچە بولغانلىقىنى بىلدۈرگەن.
ئەسىرى يەنە، ئۈچ خىل ئەھۋالدا يەمەنگە قايتىدىن ھەربىي مۇداخىلە قىلىدىغانلىقىنى ئېيتىپ مۇنداق دىگەن؛ «ھۇسىيلەرنىڭ يەمەندە قايتىدىن ھەرىكەتكە كېلىشى، يەمەن خەلقى ئۈچۈن يېڭىدىن تەھدىت شەكىللەندۈرۈشى ۋە مۇقىملىققا زىيان يەتكۈزگەن ئەھۋالدا بىرلەشمە ئارمىيە قىسىملىرى قايتىدىن ھەرىكەتكە ئۆتىدۇ. بۇنىڭدىن باشقا ھۇسىيلەرنىڭ قوشنا دۆلەتلەر ئۈچۈن تەھدىت پەيدا قىلىشىمۇ قايتىدىن ھەربىي ھەرىكەت باشلاشنىڭ سەۋەبى دەپ قارىلىدۇ» دىگەن.