2010-يىللىق دۇنيا لوڭقىسىنىڭ دەسلەپكى 2 مەيدان 8 كۈچلۈككە كىرىش مۇسابىقىسى تۈنۈگۈن كەچ جەنۇبىي ئافرىقىنىڭ ئېلزابېت پورتى ۋە لېستىنبۇرگ شەھىرىدە كەينى-كەينىدىن باشلاندى . ئىككى مەيدان مۇسابىقىدە ئۇرۇگۋاي ۋە گانا كوماندىلىرى ئوخشاشلا 2-1 نومۇر بىلەن كورىيە ۋە ئامېرىكا كوماندىسىنى مەغلۇب قىلىپ ، بۇ نۆۋەتلىك دۇنيا لوڭقىسىدىكى 8 كۈچلۈك كوماندا قاتارىغا كىردى .
ئۇرۇگۋاي كوماندىسى A گۇرۇپپىدىن 1-بولۇپ چىققان بولۇپ ، ئاساسلىق ھۇجۇمچى سۇئارېسنىڭ 2 توپ كىرگۈزۈشى بىلەن 2-1 نەتىجىدە B گۇرۇپپىدىن 2-بولۇپ چىققان كورىيە كوماندىسىنى شاللىۋەتتى ھەمدە 40 يىلدىن بۇيان تۇنجى قېتىم دۇنيا لوڭقىسى 8 كۈچلۈك كوماندا قاتارىغا كىردى .
ئامېرىكا كوماندىسى بولسا بۇ نۆۋەتلىك دۇنيا لوڭقىسىدا گۇرۇپپىدىن چىقالىغان بىردىنبىر ئافرىقا ۋەكىلى بولغان گانا كوماندىسى بىلەن 90 مىنۇت ئىچىدە 1-1 تەڭلىشىپ قالغان بولۇپ ، ئۇزارتىلغان ۋاقىتنىڭ 3-مىنۇتىدا گانا كوماندىسىنىڭ ھۇجۇمچىسى جىئەن ھالقىلىق بىر توپ ئۇرۇپ ئاخىرى ئامېرىكا كوماندىسىنى شاللىۋېتىپ ، تارىختا تۇنجى قېتىم 8 كۈچلۈك كوماندا قاتارىغا كىردى .
بۇ مۇسابىقىنى ئامېرىكىنىڭ سابىق زۇڭتۇڭى كلىنتون ۋە داڭلىق ۋاسكېتبول چولپىنى كوبى براينت قاتارلىقلار نەق مەيدانغا بېرىپ كۆرگەن بولۇپ ، كانادا تورونتودا 20 دۆلەت باشلىقلار يىغىنىغا قاتنىشىۋاتقان زۇڭتۇڭ ئوباما تېلىۋېزوردىن بىۋاستە ئاڭلىتىشىنى كۆرگەندىن كېيىن ئامېرىكا كوماندىسىنىڭ شاللىنىپ كەتكەنلىكىدىن تولىمۇ ئەپسۇسلانغانلىقىنى بىلدۈردى .
