شىنخۇا تورىنىڭ 23- مارت خېلسىنكىدىن ئەۋەتكەن تېلېگراممىسى: فىنلاندىيە ئاخبارات ۋاسىتىسىنىڭ 23- مارتتىكى خەۋىرىگە ئاساسلانغاندا، فىنلاندىيەدىكى ئەڭ چوڭ شامال كۈچى گېنېراتورى يېقىندا فىنلاندىيەنىڭ غەربىي قىسمىدىكى ۋاسا شەھىرىدە تاماملاندى.

فىنلاندىيە شامال كۈچى پىرقىرىغۇچى ياساش شىركىتى ـــــ مېلۋىنتو شىركىتى ياسىغان بۇ شامال كۈچى گېنېراتورىنىڭ ئىگىزلىكى 125 مېتىر بولۇپ، مەخسۇس سوغۇق ۋە ئوتتۇرىھال شامال كۈچى شارائىتىگە قارىتا لايىھەلەنگەن، سېكۇنتىغا تۆت مېتىردىن 25 مېتىرغىچە بولغان شامال سۈرئىتىدە توك چىقىرىدۇ. بۇ گېنېراتورنىڭ قوراشتۇرۇلغان سىغىمچانلىقى 3.6 مېگاۋات بولۇپ، 600 دىن كۆپ ئولتۇراق بىنانىڭ توك كۈچى ۋە ئىسسىنىش ئېھتىياجىنى قاندۇرالايدۇ، مۆلچەرلىنىشچە 4- ئاينىڭ ئاخىرى ۋاسا شامال ئېلېكتر شىركىتىدە توك چىقىرىشقا تاپشۇرۇلۇشى مۆلچەرلەنمەكتە.

2011- يىلىغا قەدەر، دۇنيادىكى ئەڭ چوڭ شامال كۈچى گېنېراتورىنى گېرمانىيەدىكى ئېيكنېر شىركىتى ياسىغان بولۇپ، قوراشتۇرۇلغان سىغىمچانلىقى ئالتە مېگاۋات كېلىدۇ، ئەمما جۇڭگو، ئامېرىكا قاتارلىق كۆپلىگەن دۆلەتلەرنىڭ كارخانىلىرى بەس- بەستە تېخىمۇ چوڭ شامال كۈچى گېنېراتورى ياساشقا باشلىدى.

نۆۋەتتە فىنلاندىيەدە مەملىكەت بويىچە 130 شامال ئېلېكتر ئىستانسىسى بولۇپ، ئومۇمىي قوراشتۇرۇلغان سىغىمچانلىقى 200 مېگاۋاتقا يېتىدۇ. فىنلاندىيە ھۆكۈمىتىنىڭ كېلىمات ۋە ئېنېرگىيە ئىستراتېگىيەسىنىڭ نىشانى: 2020- يىلىغا بارغاندا، شامال كۈچى ئارقىلىق توك چىقىرىشنىڭ قوراشتۇرۇلغان سىغىمچانلىقى 2000 دىن 2500 كىچە مېگاۋاتقا يەتكۈزۈشتىن ئىبارەت. بۇنىڭدىن فىنلاندىيەدىكى مەملىكەت بويىچە ئومۇمى ئېلېكتر كۈچىنىڭ %6 تىنىڭ شامال كۈچى ئارقىلىق چىقىرىلغان توكتىن كېلىدىغانلىقى نامايان بولدى.