شېنخۇا ئاگېنىتلىقى بېيجىڭ 21- ئۆكتەبىر تېلگېراممىسى 19-ئۆكتەبىر، ئامىركىنىڭ بىر قانچە قۇياش ئېنىرگېيىلىك باتارىيە ۋە باتارىيە تاختىسى ئىشلەپچىقىرىش سودىگەرلىرى ئامىركا سودا مىنىستىرلىقىغا ۋە خەلقئارا سودا كومېتىتىغا ئىلتىماس سۇنۇپ، جۇڭگونىڭ ئامىركىغا چىقارغان قۇياش ئېنىرگېيىلىك باتارىيسى (تاختىسى) گە قارىتا قارشى تۆكمە قىلىپ سېتىش ۋە قارشى ياردەم بېرىشنى تەكشۈرۈشنى تەلەپ قىلدى. سودا مىنىستىرلىقىمىزنىڭ ئىمپورت-ئېكىسپورت ئادىل سودا باشقۇرۇش ئىدارىسىنىڭ مەسئۇلى 21- ئۆكتەبىر مۇشۇ مۇناسىۋەت بىلەن مۇخبىرنىڭ زىيارىتىنى قۇبۇل قىلغاندا مۇنۇلارنى بىلدۈردى :جۇڭگو ھۆكۈمىتى بۇ ئىشقا يۈكسەك دەرىجىدە دىققەت قىلىدۇ ۋە ئامىركا كارخانىلىرىنىڭ بۇ خىل قىلمىشىغا ئەپسۇسلىنىدۇ.
بۇ مەسئۇل خادىم مۇنداق دېدى: قۇياش ئېنېرگىيىسى كەسپىنى تەرەققىي قىلدۇرۇش جۇڭگو ھۆكۈمىتىنىڭ كېلىمات ئۆزگۈرۈشى ۋە ئېنىرگىيە بىخەتەرلىكى خىرىسىغا تاقابىل تۇرۇشتىكى مۇھىم تەدبىرى بولۇپ، مۇناسىۋەتلىك ساھەلەردىكى بىر قاتار ماكرولۇق سىياسەتلەر دۇنيا سودا تەشكىلاتىنىڭ پىرىنسىپىغا ئۇيغۇن. ئامىركا ئۆز دۆلىتىنىڭ پاكىز ئېنېرگىيەدىن پايدىلنىش ۋە تەرەققى قىلدۇرۇشنى ئىلگىرى سۈرۈش ئۈچۈن،يەنە ھاسىلىي ئېنېرگىيە كەسپىگە تارىختىن بۇيانقى ئەڭ زور كۆلەمدە مەبلەغ سالدى ھەم مۇناسىۋەتلىك ئىلگىرى سۈرۈش تەدبىرلىرى ۋە سىياسەتلىرىنى بېكىتىپ چىقتى. ئامىركا پارلامېنتىمۇ بۇنىڭغا قارىتا يېڭى ئېنىرگيە مەنبەسى ۋە كېلىمات قانۇن لايىھىسىنى ماقۇللىدى. ئامىركىنىڭ باشقا دۆلەتلەرنىڭ ئىنسانلارنىڭ تۇرمۇش مۇھىتىنى ياخشىلاش ئۈچۈن كۆرسەتكەن تىرىشچانلىقىنى ئەيىبلەش ھوقۇقى يوق، ئەكسىچە ئامىركا باشقا دۆلەتلەر بىلەن بىرلىكتە قۇياش ئېنېرگىيىسى ساھەسىدىكى ھەمكارلىقنى كۈچەيتىپ، كېلىمات ئۆزگۈرۈشى ۋە مۇھىت ناچارلىشىش خىرىسىغا ئورتاق تاقابىل تۇرۇشى كېرەك.
بۇ مەسئۇل خادىم مۇنۇلارنى بىلدۈردى، جۇڭگو –ئامىركا ئىككى دۆلەت يېڭى ئېنېرگىيە ساھەسىدە كەڭ ھەمكارلىقنى قانات يايدۇرۇپ، ئۆزئارا مەنپەئەت يەتكۈزۈشنى خالايدۇ. يىقىندا ئامىركا قۇياش ئېنېرگىيىسى كەسپى جەمئىيىتى مەبلەغ ياردىمى قىلغان بىر پارچە تەكشۈرۈش دوكلاتىدا كۆرسىتىلىشىچە، ئامىركىنىڭ جۇڭگوغا قىلغان قۇياش ئېنىرگېيىلىك باتارىيسى (تاختىسى) ئىشلەپچىقىرىش ئەسلىھەلىرى ۋە خام ماتېريال ئېكىسپورتىنىڭ سوممىسى، ئامىركىنىڭ جۇڭگودىن ئىمپورت قىلغان قۇياش ئېنىرگېيىلىك باتارىيسى (تاختىسى)نىڭ سوممىسىدىن خېلىلا ئارتۇق بولۇپ، 1مىليارد 880مىليون دوللار سودا ئوڭ پەرقىنى ئەمەلگە ئاشۇرغان. ئەگەر جۇڭگونىڭ قۇياش ئېنىرگېيىلىك باتارىيسى (تاختىسى) مەھسۇلاتلىرى ئامىركىنىڭ قوللانغان باج ئېلىش تەدبىرى سەۋەبىدىن ئامىركىغا داۋاملىق ئېكىسپورت قىلىنمىسا، شەك-شۈبھىسىزكى ئامىركىنىڭ مۇناسىۋەتلىك ئىشلەپچىقىرىش ئەسلىھەلىرى ۋە خام ماتېرياللىرىنىڭ جۇڭگوغا بولغان ئېكىسپورتىغا زور تەسىر يېتىدۇ. نەتىجىدە، ھەر ئىككىلا تەرەپ زىيان تارتىپ، بۇ ئىككى دۆلەتنىڭ ئىقتىسادى مەنپەئىتىگە بىردەك پايدىسىز تەسىر پەيدا قىلىدۇ.
بۇ مەسئۇل خادىم مۇنۇلارنى كۆرسەتتى: ئەگەر ئامىركا ھۆكۈمىتى ئەنزە تۇرغۇزۇپ تەكشۈرسە ھەم باج يىغىش تەدبىرى قوللانسا سىرتقى دۇنياغا سودا قورۇقچىلىقىنىڭ خاتا سېگنالىنى چالغان بولۇپ، دۇنيا ئىقتىسادىنىڭ ئەسلىگە كېلشىگە قارا سايە پەيدا قىلىدۇ. جۇڭگو ھۆكۈمىتى ئامىركا ھۆكۈمىتىنىڭ سودا قورۇقچىلىقىغا قارشى تۇرۇش ۋەدىسىگە ئەمەل قىلىپ، جۇڭگونىڭ قۇياش ئېنىرگېيىلىك باتارىيسى (تاختىسى) مەھسۇلاتلىرىغا قارىتا سودا قورۇقچىلىقى تەدبىرىنى قوللىنىشتىن ساقلىنىپ، بىرلىكتە ئەركىن،ئېچىۋېتىلگەن، ئادىل بولغان خەلقئارا سودا مۇھىتىنى قوغداپ، سودا سۈركىلىشىنى تېخىمۇ ئىلمىي ئۇسۇلدا بىر تەرەپ قىلىشىنى ئۈمۈد قىلىدۇ