«ئاپتونوم رايوننىڭ 2016- يىللىق ئادەتتىكى ئالىي مەكتەپلەرگە ئوقۇغۇچى قوبۇل قىلىش خىزمىتى بەلگىلىمىسى» ئېلان قىلىندى

«ئاپتونوم رايوننىڭ 2016- يىللىق ئادەتتىكى ئالىي مەكتەپلەرگە ئوقۇغۇچى قوبۇل قىلىش خىزمىتى بەلگىلىمىسى» يېقىندا ئېلان قىلىنىپ، بۇ يىلقى ئادەتتىكى ئالىي مەكتەپلەرگە ئوقۇغۇچى قوبۇل قىلىش بويىچە ئارزۇ تولدۇرۇشتىكى ھەر قايسى تۈركۈمدىكى كەسىپلەرنى تەسىس قىلىش، جەنۇبىي شىنجاڭدا ئايرىم ئوقۇغۇچى قوبۇل قىلىش پىلانى قاتارلىق مەزمۇنلار ئېنىق كۆرسىتىلدى، تەڭشەلدى ۋە مۇكەممەللەشتۈرۈلدى. 
بەلگىلىمىدە كۆرسىتىلىشىچە، بۇ يىل ئاپتونوم رايونىمىزنىڭ ئالىي مەكتەپ ئىمتىھانىدا سىياسەت جەھەتتىن نومۇر قوشۇپ بېرىش دائىرىسى بۇلتۇرقى بىلەن ئوخشاش بولۇپ، جەنۇبىي شىنجاڭدىكى 3 ۋىلايەت، 1 ئوبلاستتىكى ھەر مىللەت ئوقۇغۇچىلىرىغا سىياسەت جەھەتتىن نومۇر قوشۇپ بېرىش يەنىمۇ ئايدىڭلاشتۇرۇلغان. خەنزۇ تىلىدا ئىمتىھان بەرگەن ئوقۇغۇچىلار ئىچىدە ئاز سانلىق مىللەت ئوقۇغۇچىلىرىغا نومۇر قوشۇپ بېرىشتىن بەھرىمان بولمىغانلارغا 10 نومۇر قوشۇپ بېرىلىدىكەن؛ خەنزۇ تىلىدا ئوقۇغان ئاز سانلىق مىللەت ئوقۇغۇچىلىرى، قوش تىللىق سىنىپ ئوقۇغۇچىلىرى، ئۇيغۇر تىلىدا ئوقۇغان خەنزۇ ئوقوغۇچىلارنىڭ ئاتا- ئانىلىرى ئىچىدە بىر تەرەپ ئۇيغۇر، قازاق، موڭغۇل، قىرغىز، تاجىك، شىبە، ئۆزبېك، تاتار، داغۇر، زاڭزۇ، رۇس قاتارلىق 11 مىللەتتىن بولغان ئوقۇغۇچىغا قوشۇپ بېرىلىدىغان نومۇر بۇرۇنقى 10 نومۇردىن 50 نومۇرغا كۆپەيتىلگەن. ئالىي مەكتەپ ئىمتىھانىغا سىياسەت خاراكتېرلىك نومۇر قوشۇپ بېرىش تۈرلىرى ئىچىدە، ئاز سانلىق مىللەت سالاھىيىتىدىكى ئوقۇغۇچىلارنىڭ تىل ئايرىمىسى ۋە جەنۇبىي شىنجاڭدىكى 3 ۋىلايەت، 1 ئوبلاستتىكى ئوقۇغۇچىلارغا قارىتىلغان ئالاھىدە ئېتىبار بېرىش سىياسىتىدىن سىرت، باشقا نومۇر قوشۇپ بېرىش شەرتىگە ئۇيغۇن كېلىدىغان ئوقۇغۇچىلارغا قوشۇپ بېرىدىغان جەمئىي نومۇر 20 نومۇردىن ئېشىپ كەتمەيدىكەن.
بۇ يىلقى ئالىي مەكتەپلەرگە ئوقۇغۇچى قوبۇل قىلىشتا، يەنە ئالىي مەكتەپلەرنى تاللاشتىكى ئارزۇ سانى كۆپەيتىلىدىغان بولۇپ، تولۇق كۇرسنىڭ 1-، 2-، 3- تۈركۈمىدىكى ئالىي مەكتەپلەرنى تاللاپ ئارزۇ تولدۇرۇشتا، بىر تۇتاش ھالدا 9 دىن تەڭداش ئالىي مەكتەپ بولىدىكەن؛ شۇنىڭ بىلەن بىرگە، ئالىي كەسپىي تېخنىكوم مەكتەپلىرىنىڭ 1-، 2- تۈركۈملىرى قوشۇۋېتىلىپ، ئالىي كەسپىي تېخنىكوم تۈركۈمى قىلىنىپ، ئارزۇ تولدۇرۇشتا 9 تەڭداش ئالىي مەكتەپ بولىدىكەن.

تەرجىمان: مۇھەممەد ئەۋەل

ئەلدىيار تورى ئۈندىدار سالونى : eldiyar99