شىنجاڭ «ئىنتىل» تىل ۋە كەسپى تېخنىكا تەربىيىلەش مەكتىپىنىڭ قاراقاش تارماق مەكتىپى ئەدەبىيات-سەنئەت كېچىلىكى ئۆتكۈزۈپ قاراقاش خەلقىگە مىننەتدارلىق

تۈرى : شىنجاڭ يوللىغۇچى : ئابلەت نۇرمۇھاممەد ۋاقتى : 2016-07-20 17:33:04

جۇڭگو مېھىر-شەپقەت يەتكۈزۈش جەمئىيىتىنىڭ ھەيئەت ئەزاسى ،شىنجاڭ ساخاۋەتچى ئاتىلار كوللىكتىپىنىڭ غوللۇق ئەزاسى ، دۆلەتلىك 2-دەرىجىلىك پىسخىكا مەسلىھەتچىسى ، شىنجاڭ «ئىنتىل» تىل ۋە كەسپى تېخنىكا تەربىيىلەش مەكتىپىنىڭ قۇرغۇچىسى ، ئەل سۆيگەن پەخىرلىك ئوغلانىمىز ئابلەت ئابدۇللا مۇئەللىم ئانا يۇرتى بولغان قاراقاش دىيارىدىكى« ئىنتىل» مەكتىپىنى قوللاپ –قۇۋۋەتلەپ بەرگەن قېرىنداشلارغا جاۋاپ قايتۇرۇش مەقسىتىدە 7-ئاينىڭ 19-كۈنى چۈشتىن كىيىن قاراقاش خەلق مەيدانىدا بىر قېتىملىق چوڭ تىپتىكى خەيرى-ساخاۋەت ئەدەبىيات –سەنئەت پائالىيىتى ئۆتكۈزدى .

ۋىلايەتلىك پارتكومنىڭ ئەزاسى،ناھىيەلىك پارتكومنىڭ شۇجىسى خې جۈن،ناھىيەلىك پارتكومنىڭ دائىمىي ھەيئىتى،تەشۋىقات بۆلۈمىنىڭ باشلىقى گۈلجەننەت مەخسۇت،مۇئاۋىن ھاكىم شى خەي قاتارلىق رەھبەرلەر پائالىيەتكە قاتناشتى.

شىنجاڭ تېلېۋىزىيە ئىستانسىسىنىڭ داڭلىق رىياسەتچىسى شەمسىيە ئەبەيدۇللا،ئۈرۈمچى تېلېۋىزىيە ئىستانسىسىنىڭ داڭلىق رىياسەتچىسى ئىسھاق سۇلايمان بۇ قېتىمقى پائالىيەتكە رىياسەتچىلىك قىلدى، پائالىيەت شىنجاڭ «ئىنتىل» تىل ۋە كەسپى تېخنىكا تەربىيىلەش مەكتىپى قاراقاش تارماق مەكتىپىدىكى ئوقۇتقۇچىلار ئورۇندىغان ‹‹ئىنتىل مارشى›› بىلەن باشلاندى.«ئىنتىل»مەكتىپىدىكى ئوقۇتقۇچىلار ئۆزلىرى تەييارلىغان نادىر ئەدەبى-سەنئەت نومۇرلىرىنى ئورۇنداپ، كەڭ خەلق ئاممىسىنىڭ قىزغىن ئالقىشىغا ئېرىشتى.
پائالىيەتكە يەنە بالىلارنىڭ ياخشى دوستى،تالانتلىق ناخشىچى ئابلاجان ئاۋۇت ئايۇپ ،.داڭلىق ناخشىچى ئىبراھىم قۇربان ،كىچىك ناخشىچى مەھلىيا خۇشتار قاتارلىق چولپانلار قاتنىشىپ نادىر ناخشا –ئۇسسۇل نومۇرلىرىنى كۆسىتىپ مەيدانغا كەلگەن ئون مىڭغا يېقىن ھەر مىللەت خەلق ئاممىسىغا مول مەنىۋى ئۇزۇق بەخىش ئەتتى،
قاراقاش ناھىيەسىدىكى كەڭ خەلق ئاممىسى شىنجاڭ «ئىنتىل» تىل ۋە كەسپى تېخنىكا تەربىيىلەش مەكتىپىنىڭ قۇرغۇچىسى ، قاراقاش خەلقىنىڭ پەخىرلىك ئوغلانى ئابلەت ئابدۇللا مۇئەللىمگە لەۋھە ،گۈل ۋە گۈل چەمبىرەكلەرنى تەقدىم قىلىپ ئۆزىنىڭ بۇ شىجائەتلىك ئوغلانىغا بولغان ھۆرمىتىنى ئىپادىلىدى، پائالىيەت داۋامىدا ئابلەت مۇئەللىم ئۆزىنىڭ بۈگۈنكى كۈنگە يىتىشىگە زور ياردەم بەرگەن ئاتا-ئانىسىغا،ئۇرۇق-تۇغقانلىرىغا ھەمدە پائالىيەتكە قاتناشقان رەھبەرلەرگە دوپپا تەقدىم قىلىپ ئۇلارغا بولغان چوڭقۇر مىننەتدارلىقىنى بىلدۈردى .