سەرداھى: قەرزىم بار

سەرداھى

قەرزىم بار

سەرداھى

ئالەم ئىكەن تۆت كۈنلۈك، تۆت كۈن ياشار قەرزىم بار،
ئەر ئاتالدىم ئەل بىلەن، ئەلگە باقار قەرزىم بار،
ئۇسسىغاننىڭ چۆلىدە سۇدەك ئاقار قەرزىم بار،
مۇزلىغانغا چوغ بولۇپ باغرىم ياقار قەرزىم بار،
تۇزلىقىنى تۇزكورنىڭ ئۇرۇپ-چاقار قەرزىم بار.

بىرسى بايلىق-پۇلنى دەپ قېنىنىمۇ ساتاركەن،
بىرسى ئەمەل دەپ تۈندە ئۆي-ئۆيلەرگە چاپاركەن،
بىرسى تويماس گېلىنى كۈيىقاپتەك ئاچاركەن،
بىرسى چىقىپ قاۋاقتىن داق يەردىلا ياتاركەن،
پاسىقلارنى ئاشۇنداق دارغا ئاسار قەرزىم بار.

چاقى تەتۈر ئايلىنار ئىكەن گاھى پەلەكنىڭ،
شالاقشىيدۇ سۈيى ئاز بولغاچ شۇڭا چېلەكنىڭ،
ھىيلىسىگە ھەيرانمەن مال دوختۇرى ھېلەكنىڭ،＊
مۇتخەسسىس ئىكەن ئۇ كېسىلىگە يۈرەكنىڭ،
ئېتەك بولغان ياقىنىڭ ئەپتىن ئاچار قەرزىم بار.

بىرسى چىقىپ مۇنبەرگە ھەقىقەتنى سۆزلەيدۇ،
دىققەت قىلساڭ سۆزىگە دەل ئۆزىنى كۆزلەيدۇ،
بىرسى دىلى ئورغاقتەك يەنە تېخى تۈز دەيدۇ،
بادام قورساق، بېلىدىن يا قولىنى ئۈزمەيدۇ،
غادايغانلار بوينىنى ئېگىپ باسار قەرزىم بار.

بىرسى ياتار يالىڭاچ دەرپەردىنىڭ ئىچىدە،
بىرسى ئىتتەك قاۋايدۇ تىمىسقىلاپ كېچىدە،
ئەخلاق نەدە، بىز نەدە؟! كېسەلدۇرمىز غۇچچىدە،
يىلتىزىغا ئۇلارنىڭ پىچاق ئۇرۇپ گاچچىدە،
تالقان كەبى كۈلىنى سورۇپ چاچار قەرزىم بار.

نارسىدىگە تەڭلەيدۇ بىرسى قارا قولىنى،
ئېلىپ قېچىپ يىراققا تاپقۇزىدۇ ‹يولىنى›،
قان-ياش ئىچرە ئانىلار ئاختۇرار ئوڭ-سولىنى،
غۇلىتىدۇ ھېيىقماي مىللىتىنىڭ ھۇلىنى،
شۇنداقلارنىڭ پۇتىغا پالتا چاپار قەرزىم بار.

بىرلىرىدۇر سۇخەنچى، بىرلىرىدۇر زاتى پەس،
ئالغا كەتسەڭ بىر قەدەم ئەسلا سېنى كۆرەلمەس،
مىڭ يىل ئوتتا كۆيدۈرسەڭ، ئامالىڭ يوق! تۈزەلمەس،
بىر تال يىپنى ئونى تەڭ تارتىپ ياكى ئۈزەلمەس،
جانغا ئېكەك شۇلاردىن يىراق قاچار قەرزىم بار.

پۇل بولسا گەر قانچىلىك، ھوقۇق دېگەن شۇنچىلىك،
قارا قورساق بولسىمۇ چېنىپ قالماس قىلچىلىك،
ھاجەتمەننىڭ ئالدىدا كېرىلسىمۇ پىلچىلىك،
ئەلنىڭ كۆزى ئەللىكتۇر، قەدرى يوق ھەم ئىتچىلىك،
ئىت مىجەزلەر دەستىدىن قايناپ تاشار قەرزىم بار.

ئىشىكى بار بىرسىنىڭ كۈندۈزى ھېچ ئېچىلماس،
كۈن پاتسىلا غىچىرلاپ تاڭ ئاتقۇچە يېپىلماس،
بىدىكلىكتە بىرسىگە ھەرنە تەڭداش تېپىلماس،
چىراق تۈۋى قاراڭغۇ، بىر-بىرىگە كېلەر ماس،
چاۋىسىنى ئۇلارنىڭ چىتقا يايار قەرزىم بار.

بىرسى ئىدى ماراقچى، يەنە بىرسى پوداقچى،
بىرسى سېپى ئۆزىدىن خوشامەتچى-چوماقچى،
بىرسى راستنى يالغاندەك بويايدىغان بوياقچى،
بۇ تەرزدە ئەتىمىز يەنە قانداق بولماقچى،
ئىللەتلەرنى ئايىماي سۆكۈپ يازار قەرزىم بار!

＊ئادەم ئىسىمى.

2014.09.02

سارسان

ياخشى يىزىپسىز  تىخىمۇ  تىرىشىڭ

نۇرلان

شېئىر ياخشى يېزىلىپتۇ. يەنىمۇ بەرىكەتلىك بولۇڭ.

رىجال

ھارمىغايسىز،قوللىرىڭىزغا دەت كەلمىسۇن

بارى

ياخشى يېزىپسىز

توغراق520

تېخىمۇ تىرىشىڭ دوستۇم

توغراق520

تېخىمۇ تىرىشىڭ دوستۇم

پاسىل

رىياللىققا چۈمۈلۈپ تۇرغان، قامچىدەك ئاچچىق مىسرالىرىڭىزدىن ھاياجانلاندىم...بەك ياخشى يېزىپسىز...قەلىمىڭىزگە ئاپىرىن!

لوپجان

نىمىدىگەن ياخشى يېزىلغان ھە