چايقىلار ئەينەكتە كېچىنىڭ كۆزى
1
چايقىلار ئەينەكتە كېچىنىڭ كۆزى،
كۆزۈمگە بىر ئايال قاراۋاتقاندەك.
تېنىمدە شاخلايدۇ بىر تۈپ ھاياجان،
يارىدەك ئېچىشىپ قانايدۇ يۈرەك.
خىياللار توپ قىلىپ ئوينار جېنىمنى،
ئىچىمنى تىڭشايمەن جىمجىت ئولتۇرۇپ.
بۇ كېچە ئۆرۈلۈپ چۈشمەيدۇ تاملار،
سۇ قاچسا چۆللەرگە چېچىنى يۇلۇپ.
يوتقاننىڭ مېھرىدەك ئىسسىقتۇر ھايات،
ئىككى لەۋ ئارىسى مىڭ يىللىق ئۇرۇش.
بۇلۇتتەك يۇمشاق ھەم يامغۇردەك قاتتىق
يېنىمدا پۇشۇلداپ ئۇخلايدۇ تۇرمۇش.
سىيلايمەن تۇرمۇشنىڭ زەڭگەر تېنىنى،
گۈللەرنى سۆيگەندەك تاڭدا نۇر-زىيا.
تاقالغان ئىشىكلەر ئېچىلغان بىلەن،
يېپىلماس ئىشىكتۇر سۆيۈملۈك دۇنيا!
2
كېچىنىڭ كۆزىدە كۆڭۈل قەلەندەر،
بىر كونا كىتاب ھەم كەتكەن يىرتىلىپ.
قاچىدۇ چۆللەرگە جۇل-جۇل مۇقاملار،
ساتارنىڭ تارىدىن چۈشسە سىيرىلىپ.
ئەڭ لەزىز كۈيلەرگە ئوخشاتقۇم كېلەر،
دىلبەرنىڭ سۈپسۈزۈك پىچىرلىشىنى.
كۆڭۈلدۇر جاراڭلاپ تۇرغان پىيالە،
ئاھ، قۇيۇپ ئىچەرمەن كىمنىڭ يېشىنى؟!
كۆكسۈمدە لاۋۇلداپ كۆيگەن باياۋان،
بىر غېرىپ ئايالنىڭ كۆينىكى ئىدى.
مەن ئۇنى سۆيگەنتىم، بىراق ۋەتەننىڭ
لېۋىدە قىپقىزىل گۈللەر ئېچىلدى.
يىقىلدىم گۈللەرنىڭ ئالتۇن بويىغا،
ئۇ ئايال قاچاتتى ئۆلۈپ كەتكىلى.
مۇھەببەت دەشتىنى كەزدىم پىيادە،
جېنىدىن جېنىمغا قوغلاپ يەتكىلى!
3
قەي قىلار تىكەندەك يالغۇزلۇقۇمنى،
ئەينەكنىڭ ئىچىدىن قوپقاندا كېچە.
ئەڭ ئۇلۇغ خەلقتۇر قاراڭغۇ ئورمان،
تېنىنى داپ قىلىپ چالغان تاڭغىچە.
ھىسلىرىم ئۇسسىغان بىر ئەزىم دەريا،
قېنى سۇ؟ قانغۇدەك ئىچسەم دۈم يېتىپ.
كۆزلەرگە قارايمەن جىمجىت پەرىشان،
بىر غېرىچ ئاسماننى يېپىنچا قىلىپ.
بىر دانە ئاناردەك پىشقان يېرىلىپ،
چېچىلغان يۇلتۇزلار تولدى ئىچىمگە.
سۆيگۈدەك يار نەدە؟ ئېسىلغۇدەك دار!
مەن يىغلاپ دەردىمنى ئېيتىمەن كىمگە؟!
4
چايقىلار ئەينەكتە كېچىنىڭ كۆزى،
كۆزۈمگە مىڭ ئايال قاراۋاتقاندەك.
يامغۇرنىڭ پۇرىقى تۇپراققا ھوزۇر،
چۆمۈلە تېنىدە ئاھ،ئاچچىق تىترەك.
تۇرمۇش بىر دەرەختۇر ياكى بىر تال گۈل،
مەن ئاڭا سۈكۈتتە قارايمەن ئۇدۇل.
تامدىكى سائەتنى يۇلۇپ ئالىمەن،
ۋاقىتنىڭ تېشىدا چاققىلى چۇل-چۇل.
كىرپىكىم تورۇسقا سانجىلغان مىختەك،
ياستۇقنىڭ قېتىدىن ئۆرلەيدۇ پىغان.
چاشقاندۇر ۋە ياكى بىر تال ئۆمۈچۈك،
دەردىمگە يۆلىنىپ
ناخشا ئوقۇغان.
قىستىلىپ كىرىمەن ئۆزۈمگە-ئۆزۈم،
لاۋۇلداپ ئوت كۆيەر ئىستەكلىرىمدە.
كېچىنىڭ كۆزىنى ئوقۇپ بولالماي،
تاڭ ئېتىپ كېتىدۇ سۆڭەكلىرىمدە...!
2012.4.13
ئىناۋەت
تەڭگە
بايلىق
تۆھپە
IP كارتىسى
ۋاقتى: 2014-9-30 13:01:36
كۆتۈرۈش كارتىسى
چوققىلاش كارتىسى
变色卡
ۋاقتى: 2014-9-30 18:16:48
ۋاقتى: 2014-10-1 18:05:40
ۋاقتى: 2014-10-1 20:24:17
/1 
