گەرچە ياخۇ شىركىتىنىڭ كەلگۈسى بىر نەچچە يىل ئىچىدە كۆچمە ئۈسكۈنىلەرگە قارىتا مەشغۇلات سىستېمىسى ئېچىش پىلانى بولمىسىمۇ، بىراق، بۇ ئۇنىڭ بۇ جەھەتتىكى ئىشلارغا ئارىلاشمايدىغانلىقىنى چۈشەندۈرۈپ بەرمەيدۇ. Aviate Android نامىدىكى ئۈستەل يۈزى دېتاللىرىنى ئېچىش گۇرۇپپىسى بۇ يىل 1-ئايدا ياخۇ شىركىتىگە قوشۇلغان بولۇپ، ياخۇغا كەلگەندىن بۇيان ئۇلار ئىزچىل ھالدا Aviate Android نامىدا يېڭى نۇسخىدىكى ئۈستەل يۈزى دېتاللىرىنى تەتقىق قىلىپ كەلگەن.

بۈگۈن بۇلار ياخۇ شىركىتىنىڭ نامى بىلەن Yahoo Aviate دەپ ئاتىلىدىغان بىر خىل ئاندىرويىد يانفونلىرىغا ماس كىلىدىغان ئۈستەل يۈزى قىستۇرمىسىنى ئېلان قىلغان بولۇپ، ھازىرچە بۇ دېتال پەقەت ئىنگىلىزچىدىن ئىبارەت بىرلا خىل تىلنى قوللايدىكەن.

Yahoo Aviate مەھسۇلات گۇرۇپپىسىنىڭ مەسئۇلى مارك دەيسنىڭ دىيىشىچە، Yahoo Aviate نىڭ مەقسىتى ئەقلىي ئىقتىدارلىق يانفون مەشغۇلاتىنى ئاددىيلاشتۇرۇش ئىكەن. Yahoo Aviate نىڭ لايىھىسى ئىنتايىن ئاددىي بولۇپ، يانفوندىكى ئەپلەرنى ئابونتنىڭ ئىشلىتىش ئادىتى ۋە ياخشى كۆرۈشىگە ئاساسلىنىپ، ئاپتوماتىك رەتلەپ بېرىدىكەن، ئۇندىن باشقا، ئۇنىڭ ئەڭ مۇھىم بىر ئىقتىدارى يانفونلارنىڭ ئەقلىي ئىقتىدارىنى تېخىمۇ يۇقىرى كۆتۈرۈپ بېرەلەيدىكەن.

Yahoo Aviate دېتالىنىڭ تۈپكى نىشانى ئابونتلار ئۈچۈن بىر كۈننىڭ ئوخشىمىغان ۋاقتىدا، ئوخشاش بولمىغان، يەنى ئابونتلار شۇ ۋاقىتتا ئەڭ ئىھتىياجلىق بولغان ئەپ ۋە ئۇچۇرلارنى تەمىنلەپ بېرىش ئىكەن. نوكىيا شىركىتى يىقىندا Launcher Android نامىدىكى بىر خىل ئۈستەل يۈزى قىستۇرمىسىنى ئېلان قىلغان بولۇپ، Yahoo Aviate دەل مۇشۇنىڭغا ئوخشاپ قالىدىغان ئىقتىدارغا ئىگە ئىكەن.

ئىگەللىنىشىچە، Yahoo Aviate مەھسۇلاتىنى ئېچىش گۇرۇپپىسى يانفون سىستېمىسىغا ئۈگىنىش ۋە مۆلچەرلەش تېخنىكىسىنى كىرگۈزۈش ئارقىلىق، ئابونتلارغا كۈندىلىك ھاۋارايى ئۇچۇرلىرى، مەشغۇلات ۋاقتى ۋە تاكسى توسۇش قاتارلىق كۈندىلىك تۇرمۇشتا كىرەك بولىدىغان ھەرخىل ئۇچۇرلارنى تەمىنلەپ بېرىشنى ئىشقا ئاشۇرغان.

Yahoo Aviate قىستۇرمىسى يەنە ھەركۈنى ئىككى قېتىم مۇھىم خەۋەرلەرنى تەۋسىيەلىك ئورۇندا كۆرسىتىپ بېرىدىكەن، بۇلار ئابونتلار تۇرۇۋاتقان رايۇندىكى ئەڭ مۇھىم خەۋەرلەرنى ئاساس قىلىدىكەن. ئىگەللىنىشىچە، بۇ ئىقتىدار ياخۇ شىركىتىنىڭ مەخسۇس خەۋەر بىلەن تەمىنلەشنى ئاساس قىلغان Summary نامىدىكى ئەپ دېتالى بىلەن بىرلەشتۈرۈلگەن ئىكەن.