ئىففىمىزىمسىز ماقال – تەمسىللەر توغرىسىدا
ئىففىمىزىمسىز ماقال – تەمسىللەر توغرىسىدا
ئابدۇخېلىل مىرخېلىل
(توققۇزتار ناھىيە دۆڭمەھەللە يېزا مويۇنگۈزەر مەكتەپ )
ئۇزاق مۇددەتلىك تارىخىي تەرەققىيات جەريانىدا تارىخنىڭ ۋە ئىجدىمائىي
ئەمەلىيەتنىڭ توختاۋسىز ئېقىنلىرىدا ئۆزىنىڭ يۈكسەك ئەقىل – پاراسىتى ،
ئەمگەكچان ، باتۇر ، ئىگىلمەس – سۈنماس كۈرەشچانلىق روھىنى ئىزچىل جارى
قىلدۇرۇپ ، جاھان مەدەنىيەت غەزىنىسىنى ئالتۇن كەبىي جۇلالىق ئەقىل
دۇردانىلىرى بىلەن بىزەپ كېلىۋاتقان مەزمۇنى مول ، شەكلى ھەر خىل ئۇيغۇر
خەلق ئېغىز ئەدەبىياتىنىڭ بىر تۈرى بولغان ماقال – تەمسىللەر خەلق ئىچىگە
كەڭ تارقىلىش، چوڭقۇر ئەقىل كۆرسۈتۈش خارەكتىرى ۋە ئۇزۇن تارىققا ئىگە
بولۇش ئالاھىدىلىدىكى بىلەن ئالاھىدە سەمەرىلىكتۇر .
ئۇيغۇر خەلق ئېغىز ئىجادىتىيىتىدە سالماق ئورۇنغا ئىگە ئۇيغۇر خەلق ماقال –
تەمسىللىرى ئەمگەكچان ، باتۇر ، ۋە ئەقىل پاراسەتلىك ئەجداتلىرىمىز
دانىشمەنلىكىنىڭ نەمۇنىسى سۈپىتىدە تارىخىي ھاياتىمىزنى يورۇتۇپ ،گۈزەللىك
بىلەن رەزىللىك ، مۇھەببەت بىلەن – نەپرەت ، توغرىسىدىكى پەلسەپىۋى،
ئەخلاقىي قاراشلىرىمىزنى خاتاسىز ۋە دەل جايىدا خۇلاسىلاپ كەلمەكتە
.مەلۇمكى بىر مىللەتنىڭ ماقال – تامسىللىرى شۇ مىللەتنىڭ ئۇزاق دەۋىرلىك
تۇرمۇش كەچۈرمىشلىرى ئەمەلىيىتىدە شەكىللەنگەن بولۇپ ، ئۇ ئىجدىمائىي
ئەمەلىيەت سەرگۈزەشتىلىرىنى بېشىدىن ئەڭ كۆپ ئۆتكۈزگەن ، تارىخنىڭ تالاي
تۈگۈمەس سىناقلىرىغا دۇچ كېلىپ ، ئۇنىڭدىن توغرا ۋە ئىلمىي خۇلاسە چىقىرىش
ئېڭى كۈچلۈك بولغان خەلق ئەقىل – پاراسىتىنىڭ جەۋھىرى ھېساپلىنىدۇ . ماقال –
تەمسىللەر نۇتۇق ۋە يېزىقلىرىمىزدا قېلىپلاشقان ، مۇقىملاشقان ، ھېكمەتلىك
، ئىبرەتلىك سۆزلەر قاتارىدا تىل ۋە يېزىقىمىزغا ئالاھىدە ئېنىقلىق ،
ئىخچاملىق ، توغرىلىق بېغىشلاپ نۇتۇق ۋە يېزىق جۈلاسىنى ئاشۇرۇش رولىنى
ئوينايدۇ .
روشەنكى ماقال – تەمسىللەردە ئەمگەكچى خەلق ئاممىسىنىڭ گۈزەل ئارزۇ –
ئارمانلىرى ، تاتلىق تىلەك – خاھىشلىرى ، ئىجىدىمائىي تۇرمۇشقا بولغان
تۈرلۈك قاراش – نۇقتىنەزەرلىرى ، ئىلىم – پەن ، ھۈنەر – كەسىپنىڭ ئىنسان
ھاياتىدىكى مۇرەسسەسىز ئەھمىيىتى ۋە ئۇنى قەدىرلەش ئېڭى ، ئەمگەكنىڭ ماددى
ۋە مەنىۋى بايلىق يارىتىشتىكى تەخىرسىز كۈچ ئىكەنلىكى ، ئۇنى سۆيۈش روھى
ئەكس ئەتتۈرۈلىدۇ . غايەت چوڭقۇر ، ئوبرازلىق سۆزلەر ئارقىلىق كىشىلەرگە
ئىبرەتلىك ساۋاق ، قىممەتلىك مەسلىھەتلەر بېرىلىدۇ . شۇنداقلا كىشىلەر
نومۇس ، ۋىجدان ، ئىنسانى خىسلەت ۋە ئادىمىلىك پەزىلەت بىلەن ياشاشقا
ئۈندىلىپ ، ئەمگەكچان ، ئەقىل – پاراسەتلىك ، چىدام – غەيرەتلىك ، ئىنساپ –
دىيانەتلىك ، ئەخلاقى – پەزىلەتلىك ، راستچىل كىشىلەردىن بولۇش ، بىلىم –
ھۆنەرنى چىن دىلىدىن سۆيۈپ ئۆگىنىدىغان ھەقىقى كىشىلەردىن بولۇش تەشەببۇس
قىلىنىدۇ.
ماقال – تەمسىللەردە ئومۇمەن مەزمۇن جەھەتتىن پەلسەپىۋى ئەقلىيىلىك قاراش –
ھۆكۈملەر بىلىم كۆزقاراشلىرى ، ئاۋام خەلقىمىزنىڭ ئەخلاقى ساپاسىنى يۇقىرى
كۆتۈرۈشكە ، دەۋىرگە ماسلاشتۇرۇپ ئىلگىرى سۈرۈشكە ئوخشاش تەرەپلەر ئاساسىي
سالماقنى ئىگىلەيدۇ . نۆۋىتىدە شۇنىمۇ قىستۇرۇپ ئۆتۈشكە ھەقلىقمىزكى ،
ماقال – تەمسىلەرنىڭ تىلى گۈزەل ، ئويناق ۋە ئوبرازلىق بولۇپ ، ئېسىل
ئىستىلىستىكىلىك ۋاستىلەرنىڭ ياردىمىدە ئوي – پىكىرنى دەل ۋە توغرا
ئىپادىلەپ ، كىشىلەرگە ھايات ھەقىقەتلىرىنى تونۇتۇش بىلەن بىرگە ، يەنە
ئىستىتىك تۇيغۇمۇ ئاتا قىلىدۇ .
بىز ئۇيغۇر خەلق ماقال – تەمسىللىرىنى تەپسىلى تەكشۈرىدىغان بولساق ، بىر
قىسىم ماقال – تەمسىللەرنىڭ ئۇيغۇر تىل – يېزىقىدا ئاشكارە دىيىلىش ياكى
يېزىلىش پەرھىز قىلىنغان سۆزلەرنىڭ ئارىلىشىشى بىلەن تۈزۈلگەنلىكىنى
بايقايمىز .
مەن بۇ ماقالەمدە نوقتىلىق ھالدا ئۇيغۇر خەلق ماقال – تەمسىللىرى ئىچىدە
نۇتىقىمىز ۋە يېزىقىمىزدا ئاشكارە دىيىلىش ۋە يېزىلىش پەرھىز قىلىنغان
سۆزلەرنىڭ ئارىلىشىشى بىلەن تۈزۈلگەن ماقال – تەمسىللەر توغرىسىدىكى يۈزەكى
قاراشلىرىمنى ئوتتۇرىغا قويۇپ ، ئوقۇرمەنلەر بىلەن ئورتاقلىشىشنى لايىق
كۆردۈم .
تارىختىن بۇيان تۆت پەسلى ئېنىق ئايرىلىدىغان مەركىزى ئاسىيانى ئۆزىنىڭ
ياشاش مۇھىتى قىلىپ كەلگەن ئۇيغۇر خەلقىنىڭ ئۆزى ياشاپ كەلگەن مۇھىتقا
ئىجابىي نوقتىدىن ماسلىشىپ ، ئۆزىدە ناھايىتى تۈز ، ساددا ، ئوچۇق – يۇرۇق ،
مۇھەببەت – نەپرىتى ئېنىق ، ھەم مېھىرلىك ھەم قەھىرلىك ، سەمىمى ، راستچىل
، كۆڭلىدىكىنى ئېغىز ۋە ئەمەلدە ئىپادىلەشكە ماھىر ، ئەمىلى ئىشلاردا
تۇرگۈن ، چۈس ، بولۇپمۇ تەلىم – تەربىيە ئىشلىرىدا مادارا قىلىپ
ئولتۇرمايدىغان تەبىي خارەكتىرگە ئىگە ئىكەنلىكى مۇنازىرە تەلەپ
قىلمايدىغان پاكىتتۇر . ئەلۋەتتە بىر مىللەت باغرىدىن باغجانلىغان
مەدەنىيەت تىندۇرمىلىرىغا شۇ مىللەت كىشىلىرىنىڭ تۇرمۇش تەلقىنلىرى ، ھايات
ھەقىقەتلىرى ھەققىدىقى ئاكتىپ قاراشلىرى ، ئىجدىمائىي مۇناسىۋەتلىرىنىڭ
تۈرلۈك – تۈمەن كەچمىش – كەچۈرمىش ئامىللىرىنىڭ سىڭىشى مۇقەرەردۇر .
جۈملىدىن ماقال – تەمسىللەرمۇ بۇ نوقتىدىن مۇستەسنا بولغان ئەمەس .
خەلقىمىز ئەزەلدىن ئەدەپ – ئەخلاق ، قائىيدە – يۇسۇن ، تەلىم – تەربىيە ،
ئەمگەكنى سۆيۈش ، ھۈنەر – كەسىپ ئىگىلەشكە ، ھەققانىيەتنى ياقلاش ،
رەزىللىككە قارشى تۇرۇش ، ئاياللار ئەخلاقىغا ئىتىۋار بىلەن قاراش ،
راستچىل ، سەمىمى بولۇش جەھەتلەرگە ئالاھىدە ئىتىۋار بىلەن قاراپ كەلگەچكە ،
خەلقىمىزنىڭ يۇقىرىقى خەرەكتىر ئالاھىدىلىكى ئۇلار ئۆزلىرى ياراتقان ماقال
–تەمسىللەردىمۇ روشەن ھالدا ئۆز ئىپادىسىنى تاپقان دىيەلەيمىز، ماقال
–تەمسىللەردە ئاۋام خەلىقنىڭ سۈپەت– ساپاسىنى يۇقىرى كۆتۈرۈش ئاساسىي
مەزمۇن قىلىنغاچقا ، نۇرغۇنلىغان ماقال –تەمسىللەرنىڭ تەلىم –تەربىيە
خارەكتىرى سالماقلىق ئورۇندا تۇرغان .
تەلىم - تەرنىيە تەسىر كۆرسىتىش ئارقىلىق توغرىلىققا يېتەكلەيدىغان ئۇزاق
مۇددەتلىك پائاليەت جەريانى بولۇپ ، بۇ تەربىيىلەنگۈچىلەرنىڭ مۇئايەن قوبۇل
قىلىش ساپاسى بىلەنمۇ مۇناسىۋەتلىك بولىدۇ . دىمەك ئەجداتلىرىمىز دەل مۇشۇ
نوقتىنىمۇ نەزەردىن ساقىت قىلماي ، ئاۋام خەلقنىڭ ئەخلاقى ساپاسى ۋە
تۈرلۈك ئىشلاردىكى ناچار ئىللەتلىرىنى تۈزۈتۈشىگە ياردەم بېرىش مەخسىتىدە ،
ئاشكارە دىيىلىش ۋە يېزىلىش پەرھىز قىلىنغان سۆزلەر ئارىلاشقان ،
ئىففىمىزىمسىز (سىلاقلاشتۇرۇلمىغان ) بىر قىسىم ماقال – تەمسىللەرنىمۇ
رورياپقا چىقىرىپ ، ماقال – تەمسىللەرنىڭ ئەقىل كۆرسۈتۈش ۋە تەلىم –
تەربىيە بېرىش رولىنى تېخىمۇ كۈچەيتىش مەخسىتىگە يەتكەن بولىشى مۈمكىن .
بۇ خىلدىكى ماقال –تەمسىللەر ئاڭلىماققا قوپال ، تومتاق بولغىنى بىلەن
يەنىلا تۇرمۇشىمىزدىكى ناچار ئىللەت ، بەد قىلىقلارنى تەنقىد قىلىش ۋە ئۇنى
تۈزۈتۈشكە يېتەكلەش جەھەتلەردە نۇرغۇن ئاكتىۋال قىممەتلەرگە ئىگە .
مەسىلەن ؛ ‹‹ ئىنساپ قالمىدى چوڭدا ، ئىشتان قالمىدى قوڭدا ›› ،‹‹ ئېشەك
ئۆلۈۋاتسا قوڭى غىجەك تارتىپتۇ ›› ، ‹‹ ھېيتتا قويمىغان خىنەڭنى ، ھېيتتىن
كېيىن قوڭاڭغا قوي ›› ، ‹‹ ۋەسلىڭ يەتسە گۈل قىس ، بولمىسا قوڭاڭنى قىس ›› ،
‹‹ يىتىم قىز قوڭاڭنى قىس ›› ، ‹‹ ئاتقا مىنگەشمە ، مىنگەشكەندىن كېيىن
كۆتۈم ئاغرىدى دېمە ›› ، ‹‹ بوزەكنى تاپسام ، قوڭىغا يىپنى ساپسام ›› ، ‹‹
تولا يىگەن بۆرىنىڭ قوڭى كامار ›› ، ‹‹ چوڭ باشنى ئاچسا كىچىك قوڭنى ئاچىدۇ
›› ، ‹‹ ساراڭنىڭ ئوڭى يوق ، پاشىنىڭ قوڭى يوق ›› ، ‹‹ ساۋاپنىڭ قوڭى
تۆشۈك ›› ، ‹‹ بېتى ئەدەپ كۆرمىگەن ، كۆتى تەرەت كۆرمىگەن ›› ، ‹‹ باجا
باجىنى كۆرسە قوڭى قىچىشار ›› ، ‹‹ باي ، قوڭى بەش پاتمان لاي ›› ، ‹‹ ئىچى
كۆيمىگەننىڭ كۆتى قىچىشماس ›› ، ‹‹ ھىجىقىز توۋا قىلماس ، توۋا قىلسا قوڭى
قويماس ›› ، ‹‹ ئۆزۈڭ قىلمىساڭ غېمىڭنى،قاغا چوقار ئىمىڭنى ›› ، ‹‹
قوناقلىققا ئوغرى كىرسە ئاتقۇچىنىڭ بىرنېمىسىنى كەس ›› ، ‹‹ كۆتۈڭدىن چىقىپ
كۆزۈڭگە ئۇراي ›› ، ‹‹ئاتىسى باشلىمىغاننىڭ پودىقى چوڭ،ئانىسى
باشلىمىغاننىڭ ئەمچىكى چوڭ ›› ، ‹‹ مىڭ مادا توققان بىلەن ، بىر ھاڭگىنىڭ
كۆتى ئاغرىماس ›› ، ‹‹ چۈچىنىڭ شۇملىقىدىن ئانىسىنىڭ ئەمچىكى يوق ›› ،‹‹
باي بولاي دېسەڭ بورداقچى بول ، ئەمەل تۇتاي دېسەڭ پوداقچى بول ›› ، ‹‹
بوقىنى ھۆكۈرەتكەن ئىككى تاشىقى ›› ، ‹‹ كۆت بەر كۆتۈرۈپ بەر ، ئىسسىقى
چىقمىسا يۆتۈلۈپ بەر ›› ، دېگەنگە ئوخشاش ماقال – تەمسىللەر ئادەم ۋە
ھايۋانلارنىڭ ئاشكارە دىيش ۋە يېزىش پەرھىز قىلىنغان تاناسىل ئەزا ۋە باشقا
ئەزالىرىنى ئىپادىلەيدىغان سۆزلەر ئارىلاشقان ئاساستا تۈزۈلگەن بولسىمۇ ،
يەنىلا ئۆزىنىڭ يارقىن جۇلاسى بىلەن خەلق ماقال – تەمسىللىرىگە خاس
پۇرىقىنى نامايەن قىلغان . ئۇنىڭدىن باشقا ‹‹ بىر شاتىراق موزاي پادىنى
بۇلغار ›› ،‹‹ ئىشتانغا چىققان كۆڭۈلگە تايىن ›› ، ‹‹ پوققا چالما ئاتساڭ ،
يۈزۈڭگە چاچرايدۇ ›› ، ‹‹ پوقنى ئوسۇرۇقتا ياپقىلى بولماس ›› ، ‹‹ پو
ئاتقىنى يات يەر ياخشى،شاتراق ئۇرغىنى داق يەر ياخشى ›› ، ‹‹ سېخى ساخاۋەت
قىلسا،بېخىل قان چىچىپتۇ ›› ، ‹‹ قارغا بىلەن دوست بولساڭ،يىيىشىڭ پوق ›› ،
‹‹ نوچى ئوق يەيدۇ،بالىسى پوق يەيدۇ ›› ، ‹‹ بولىدىغان بالا پوقىدىن ،
بولىدىغان زىرائەت كۆكىدىن ›› ، ‹‹بەگ يالاقچىغا ئامراق ، ئىت
شاتراقچىغا ئامراق ›› ، ‹‹ بېخىلنىڭ پوقىنى يىگەن قاغىنىڭ قورسىقى
ئاغرىيدۇ ›› ، ‹‹ پۈتمىگەن قەرىزگە پوق ئال ›› ، ‹‹ ئىككى قاغا پوق تالاشسا
، ئوۋچىغا پايدا ›› ، ‹‹ داڭلىغان قىز تويىدا چىچىپتۇ ›› ، ‹‹ دوستۇڭنىڭ
پوقى پۇرىماس ›› ، ‹‹ بار چاغدا توق يەپتۇ ، يوق چاغدا پوق يەپتۇ ›› ، ‹‹
بالاڭنى قويۇپ بەرسەڭ بېشىڭغا چىچار ،چىۋىننى قويۇپ بەرسەڭ ئېشىڭغا چىچار
›› ، ‹‹ بالاڭنى ئەركە ئۆگەتسەڭ كۆرپىگە سىيەر ›› ، ‹‹ ئارقامدىن دېگەنلەر ،
تېزىكىمنى يىگەنلەر ›› ، ‹‹ ئېشەكنى ئوتقا ھەيدىسە پوققا يۈگۈرەر ›› ، ‹‹
ۋاقتى ئۆتكەندە قىلىچىڭنى پوققا چاپ ›› ، ‹‹ ئورۇق ئۇينىڭ پوقى يوغان ›› ،
‹‹ گەپنى تەگىسە گەپ چىقار ، كالىنى قوغلىسا پوق چىقار ›› ، ‹‹ گەپنىڭ
يامىنى كۇس – كۇس ، ئوسۇرۇقنىڭ يامىنى پۇس – پۇس ›› ، ‹‹ كەپسىز ، كەپتەر
پوقى يەمسىز ›› ، ‹‹ شاخىنىچى كالا خاماننى بۇلغايدۇ ، بۇزۇق ئادەم جاھاننى
بۇلغايدۇ ›› ، ‹‹ ئارپا نېنى ئوسۇرغاققا بانا بوپتۇ ›› ، ‹‹ ئاتالماس
ئوقىدىن كۆرىدۇ ، چىچالماس پوقىدىن كۆرىدۇ ›› قاتارلىق ماقال –تەمسىلەر
ئەدەم ۋە باشقا جانلىقلاردىكى نورمال فىزولوگىيىلىك ھادىسىلەرنى
ئىپادىلەيدىغان ، ئەمما ئاشكارە دىيىش ۋە يېزىش پەرھىز قىلىنغان سۆزلەرنىڭ
ئارىلىشىشى بىلەن تۈزۈلۈپ ، تۇرمۇشىمىزدىكى خىلمۇ – خىل چىركىنلىكلەرنى
يارقىن ئىپادە قىلىپ بەرگەن . شۇنداقلا ‹‹ ئوغرى قېرىسا موللا بولار ،
جالاپ قېرىسا بۈۋى بولار ›› ،‹‹ تام قېرىسا توپا بولار ، ھىجىقىز قېرىسا
سوپا بولار ›› ، ‹‹ ئارىچىغا ئالتە تاياق ، شوۋىچىغا يەتتە تاياق ›› ، ‹‹
دوستتۇمنىڭ كۆڭلىنى دەپ ، ئالتە ئايلىق بويۇمدا قالدى ›› ، ‹‹ ئاشناڭغا
ئىشىنىپ ، ئەرسىز قالما ›› ، ‹‹ دۈشمەننىڭ سۆزى يامان ، جالاپنىڭ كۆزى
يامان ›› ، ‹‹ سامان ئوتۇن بولماس ، جالاپ خوتۇن بولماس ›› ، ‹‹ تۆگىدە تىز
يوق ، جالاپتا يۈز يوق ›› ، ‹‹ ھارۋا ماڭغان يول تار بولمايدۇ ، جالاپقا
گەپ ھار بولمايدۇ ›› ، ‹‹ ئەرسىز خوتۇن - يۈگەنسىز بايتال ›› دېگەنگە
ئوخشاش ماقال –تەمسىلەردىمۇ جىنسىيەت ، ئاياللار ئەخلاقى ، بەزىبىر
ئادەملەردىكى تۇترۇقسىزلىق ئالامەتلىرى نۇتۇقتا ئېيتىش ۋە يېزىقتا
ئىپادىلەش پەرھىز قىلىنغان سۆزلەرنىڭ بىرىكىشىدىن تۈزۈلگەن بولۇپ ، بىر
پۈتۈن ئۇيغۇر ئەخلاقىغا زىت بولغان ناچار ئىللەت ، خاتا خاھىشلارنى پاش
قىلىپ ، ئەخلاقى ساغلاملىقنى ئىشقا ئاشۇرۇشنىڭ يۈكسەك ئۈلگىسىنى تىكلەپ
بەرگەن .
دىمەك يۇقىرىدا تىلغا ئېلىنغان ئىففىمىزىمسىز (نۇتۇقتا ئېيتىش ۋە
يېزىقتا ئىپادىلەش پەرھىز قىلىنغان سۆزلەرنىڭ ئارىلىشىشى بىلەن تۈزۈلگەن )
ماقال – تەمسىللەر پەلسەپىۋىلىكىنىڭ ، مەزمۇنىنىڭ چوڭقۇرلىقى ، مەزمۇن
جەھەتتىن چېتىلىش دائىرىسىنىڭ كەڭلىكى بىلەن ئەھمىيەتلىك بولۇپلا قالماي ،
بەلكى ، تۇرمۇشىمىزدىكى بەزى ئىجدىمائىي ھادىسلەرنى ، جۈملىدىن خەلقىمىزنىڭ
ئىجدىمائىي ھاياتىدىكى تۈرلۈك مىللى ئۆرپ – ئادەت دېتاللىرىنى ، ئەخلاقىي
ساپاغا بولغان ئىلمىي قاراشلىرىنى ، ھەتتە بىر پۈتۈن روھى ھالىتىنىمۇ
چۈشۈنىشىمىزدە ناھايىتى ئەھمىيەتلىكتۇر .
ئومۇمەن بۇ ماقال – تەمسىللەرگە خەلقىمىزنىڭ ئۆزى ياشاپ كەلگەن مۇھىتقا
ئىجابىي نوقتىدىن ماسلىشىپ ، ئۆزىدە ناھايىتى تۈز ، ساددا ، ئوچۇق – يۇرۇق ،
مۇھەببەت – نەپرىتى ئېنىق ، ھەم مىھىرلىك ھەم قەھىرلىك ، سەمىمى ، راستچىل
، كۆڭلىدىكىنى ئېغىز ۋە ئەمەلدە ئىپادىلەشكە ماھىر ، ئەمىلى ئىشلاردا
تۇرگۈن ، چۈس ، بولۇپمۇ تەلىم – تەربىيە ئىشلىرىدا مادارا قىلىپ
ئولتۇرمايدىغان تەبىي خارەكتىرى سىڭگەن بولۇپ ، ئۇنىڭدا كىشىلەر ئەقىل –
پاراسەتلىك ، ئىنساپ – دىيانەتلىك ، خەيرى – ساخاۋەتلىك ، مېھرى –
شەپقەتلىك ، شەرىم – ھايالىق ، كىبىر – تەمەننادىن خالى ، سەبرى – تاقەتلىك
بولۇشقا دالالەت قىلىنىپ، ھەققانىيەتنى ياقلايدىغان ، ئەل ئۈمۈدىنى
ئاقلايدىغان ، بىر مەۋقايىدا تۇرىدىغان ، ھەرقانداق ئىشنى ئۆز ۋاقتىدا ۋە
ئەمىلى پۈتتۈرۈشكە ماھىر، پەرزەنت تەربىيىسىگە سەل قارىمايدىغان، ئەمىلى
ئەھۋالىغا قارىتا ئىش كۆرۈشكە ئىتىبار بېرىدىغان ، كىشى ھەققىگە كۆز
قىزارتمايدىغان ، كۆڭۈلنىڭ كەينىگە كىرىپ ، ئۆزىگە تۈگىمەس دىشۋارچىلىق
تېپىۋىلىشتىن ساقلىنىدىغان ، ئاساسسىز باھانالار بىلەن ئەسلى مەخسىتىنى
ئىشقا ئاشۇرۇشقا ئۇرۇنۇشتەك خاتا خاھىشلارغا بېرىلمەيدىغان گۈزەل ئەخلاقى
ساپا يېتىلدۈرۈشكە چاقىرىلغان .
«ئىففىمىزىمسىز ماقال – تەمسىللەر توغرىسىدا»گە دائىر تېخىمۇ كۆپ ئۇچۇر
ئالدىنقىسى : ئېلان ئۇچۇرلىرىدىكى تىل-يېزىقلىرىمىزنىڭ بۇزۇلىشى
كېيىنكىسى : ماقال – تەمسىللەر تىل خەزىنىمىزدىكى دۇردانە
- ئۇيغۇرچە – خەنزۇچە ئۇيغۇر خەلق ماقال – تەمسىللىرى2012-06-12
- تىلغا دائىر ماقال-تەمسىل ۋە ھېكمەتلەر2012-06-12
- ئۇيغۇر خەلق ماقال-تەمسىللىرىدىكى تىلغا ئائىت پەلسەپىۋى پىكىرلەر توغرىسىدا2012-06-12
- ئۇيغۇر تىلىدىكى فرازىئولوگىيىلىك بىرىكمىلەر(ماقال،تەمسىل،ئىدىئوم..)2012-06-12
- كۆپ يېشىملىك ماقال-تەمسىلنىڭ ئوقۇپ چۈشىنىلىشى ۋە تەرجىمىسى توغرىسىدا2013-08-24
- ماقال – تەمسىللەر تىل خەزىنىمىزدىكى دۇردانە
- ئىففىمىزىمسىز ماقال – تەمسىللەر توغرىسىدا
- ئېلان ئۇچۇرلىرىدىكى تىل-يېزىقلىرىمىزنىڭ بۇزۇلىشى
- ئۇيغۇر تىلى گرامماتىكا بىلىملىرى-توپلانما
- گۇما شېۋىسىنىڭ گىرامماتىكىلىق ئالاھىدىلىكى
- گۇما شېۋىسىنىڭ لېكسىكىلىق ئالاھىدىلىكى
- جۈملە توغرىسىدا
- قىسقارتىلما سۆزلەرنىڭ ئىملاسى
- ياردەمچى سۆزلەرنىڭ تۈرلىرى
- بىر قىسىم سۆزلەرنىڭ ئىملاسى
- ماقال – تەمسىللەر تىل خەزىنىمىزدىكى دۇردانە
- ئۇيغۇر تىلى گرامماتىكا بىلىملىرى-توپلانما
- ئىففىمىزىمسىز ماقال – تەمسىللەر توغرىسىدا
- ئېلان ئۇچۇرلىرىدىكى تىل-يېزىقلىرىمىزنىڭ بۇزۇلىشى
- گۇما شېۋىسىنىڭ گىرامماتىكىلىق ئالاھىدىلىكى
- ئۇيغۇر كىشى ئىسىملىرى ۋە ئۇنىڭ تۈرگە ئايرىلىشى
- جۈملە توغرىسىدا
- ياردەمچى سۆزلەرنىڭ تۈرلىرى
- ئۇيغۇر تىلىدىكى سۆز ياساش ئۇسۇللىرى
- گۇما شېۋىسىنىڭ لېكسىكىلىق ئالاھىدىلىكى