بۈگۈن، پۈتۈن دۇنيا مىقياسىدىكى سامسۇڭ شىركىتى ئەقلىي ئىقتىدارلىق يانفونلىرى، تاختا كومپىيوتېرلىرى شۇنداقلا ئەقلىي ئىقتىدارلىق تېلىۋىزورلىرىنىڭ ھەممىسىدە بىر ئاز خاتا ئۇچۇرلار كۆرۈلگەن بولۇپ، پۈتۈن دۇنيادىكى سامسۇڭ مەھسۇلاتى ئابونتلىرى بۈگۈن سامسۇڭ قوللىنىش ئەپ پىروگرامما سۇپىسىنى زىيارەت قىلالماي قالدى. بۇنداق بولۇشىنىڭ سەۋەبى بولسا بۈگۈن سامسۇڭ گوچۇەندىكى سامسۇڭ SDS سانلىق مەلۇمات مەركىزىدە ئوت ئاپىتى يۈز بەرگەنلىكتىن بولغان بولۇپ، بۇ قېتىمقى ئوت ئاپىتى دەسلىپىدە مەزكۇر بىنانىڭ 4-قەۋىتىدە يۈز بەرگەن، كېيى ئوت ئاپىتى تېز سۈرئەتتە يامراپ ناھايىتى تېزلا بىنانىڭ ئەڭ ئۈستۈنكى قەۋىتىگىچە يامراپ كەتكەن. بىنا سىرتىغا جايلاشقان تورۇبىلارغا ئوت كېتىش بۇ قېتىملىق ئوت ئاپىتىنى كەلتۈرۈپ چىقارغان بولۇشى مۇمكىن ئىكەن. بۇ قېتىملىق ئوت ئاپىتى سامسۇڭ شىركىتىنىڭ سانلىق مەلۇمات ئامبىرىدا نەچچە سائەتلىك تور توختاپ قېلىشنى كەلتۈرۈپ چىقارغان بولغاچقا، بۇ ئەھۋال پۈتۈن دۇنيادىكى سامسۇڭ مەھسۇلاتلىرى ئابونتلىرىنىڭ ئەپ پىروگرامما سۇپىسىنى زىيارەت قىلالماسلىقىنى كەلتۈرۈپ چىقارغانىكەن. ئۇنىڭدىن باشقا بۈگۈنكى ئوت ئاپىتى يەنە سامسۇڭ شىركىتى تەرەپ تور بېكىتىنىمۇ ۋاقىتلىق زىيارەت قىلغىلى بولماسلىقتەك ئەھۋالنى پەيدا قىلغان. لېكىن بۈگۈن كەچ سائەت 6 دىن 15 مىنۇتلار ئۆتكەن چاغدا، سامسۇڭ شىركىتى سانلىق مەلۇمات ئامبىرىنىڭ توك بىلەن تەمىنلەش خىزمىتى ئەسلىگە كەلتۈرۈلگەن بولۇپ، ئارقىدىنلا سامسۇڭ تور بېكىتى ۋە ئەپ پىروگرامما سۇپىسىنى زىيارەت قىلغىلى بولماسلىق كاشىلىسىمۇ ھەل قىلىنغان. تۆۋەندىكى رەسىملەر بولسا بۇ سانلىق مەلۇمات ئامبىرىغا ئوت كەتكەن نەقمەيداندىن تارتىلغان رەسىملەر.