جۇڭگو ئۇيغۇرچە رادىيو تورى 24-ئاۋغۇست بېيجىڭ خەۋىرى:

لىۋىيەدىكى ئۆكتىچى قوراللىق كۈچلەر تۈنۈگۈن پايتەخت تىرىپولىدا كازافى ھاكىمىيىتىنىڭ سىمۋولى بولغان ئەزىزىيە لاگىرىغا شىددەتلىك ھۇجۇم قىلدى. خەۋەرلەرگە قارىغاندا ئۆكتىچىلەر كازافىنىڭ لاگىرى ئىچىدىكى تۇرالغۇسىغا بۆسۈپ كىرگەن. شۇ كۈنى خەلقئارا شاھمات بىرلەشمىسىنىڭ رەئىسى تاراتقۇلارغا مۇنداق دېدى: كازافى شۇ كۈنى مەن بىلەن تېلېفونلاشقاندا ئۆزىنىڭ تىرىپولىدا تۇرۇۋاتقانلىقىنى ھەمدە لىۋىيەدىن ئايرىلمايدىغانلىقىنى بىلدۈردى.

تۈنۈگۈن سەھەردە كازافىنىڭ ئىككىنچى ئوغلى سەيىپ ئىسلام كازافى ئەزىزىيە لاگىرىدا مۇخبىرلار يىغىنى ئۆتكۈزۈپ كازافىنىڭ ۋە ئۇنىڭ ئائىلىسىدىكىلەرنىڭ تىرىپولىدا تۇرۇۋاتقانلىقىنى ئېيتتى. بىراق ئۇ ئائىلىسىدىكىلەر تۇرۇۋاتقان كونكرېت ئورۇننى ئاشكارىلاشنى رەت قىلدى.

لىۋىيە دۆلەتلىك تېلېۋىزىيە ئىستانسىسىنىڭ سىگنالى شۇ كۈنى ئۈزۈلدى، بىراق ئىنتېرنېت تورى بىلەن تېلېفون خەۋەرلىشىشى يەنىلا نورمال بولماقتا. ھۆكۈمەتكە قارشى قوراللىق كۈچلەر پايتەخت ۋە شەھەر ئەتراپىدىكى كۆپ قىسىم رايونلارنى كونترول قىلدى. يوللارغا توساق قۇردى، يولدىن ئۆتكەنلەرنىڭ كىملىكىنى تەكشۈردى. نۆۋەتتە شەھەر ئىچىدىكى ماي قاچىلاش پونكىتلىرىدە ماي كەمچىل بولغانلىقتىن، كۆپ ساندىكى كىشىلەر ئىمكان قەدەر ئۆيدە تۇرماقتا.