ئاقيول تورىنىڭ خەۋىرى:مۇخبىرىمىزنىڭ ئاپتونوم رايونلۇق ئوقۇغۇچى قوبۇل قىلىش ئىشخانىسىدىن ئۇقۇشىچە، ئالىي مەكتەپلەر ھازىر قوبۇل قىلىنغان ئوقۇغۇچىلارغا قوبۇل قىلىنىش ئۇقتۇرۇشىنى ئەۋەتىشنى باشلىغان، ئوقۇغۇچىلار قوبۇل قىلىنىش ئۇقتۇرۇشىنى تاپشۇرىۋالغاندىن كېيىن شىنجاڭ مائارىپ ئۇچۇر تورى، شىنجاڭ ئوقۇغۇچى قوبۇل قىلىش تورىغا چىقىپ ياكى ئۆز جايىدىكى ئوقۇغۇچى قوبۇل قىلىش ئىشخانىسىغا بېرىپ، قوبۇل قىلىنىش ئۇقتۇرۇشىنىڭ تەكشۈرتسە بولىدىكەن.
     ئۇقۇشىمچە، 8-ئاينىڭ 12-كۈنى سائەت 19 (بېيجىڭ ۋاقتى) غىچە ئاپتونوم رايونىمىز بويىچە 59 مىڭ 700 دىن ئارتۇق ئوقۇغۇچى ئالىي مەكتەپكە قوبۇل قىلىنغان. ئاپتونوم رايونلۇق ئوقۇغۇچى قوبۇل قىلىش كومىتېتى ئىشخانىسى ھازىرغىچە ئوقۇغۇچى ۋە ئاتا-ئانىلاردىن كەلگەن 20 مىڭ قېتىمدىن ئارتۇق مەسلىھەت سوراش تېلېفونىنى قوبۇل قىلغان، 3000 دىن ئارتۇق مەسلىھەت سوراپ كەلگەن ئوقۇغۇچى ۋە ئاتا- ئانىنى كۈتۈۋالغان.
     ئاپتونوم رايونلۇق ئوقۇغۇچى قوبۇل قىلىش ئىشخانىسىدىكىلەرنىڭ تونۇشتۇرۇشىچە، ئوقۇغۇچى ۋە ئاتا - ئانىلار قوبۇل قىلىنىش ئەھۋالىنى ۋىلايەت، ئوبلاست (شەھەر) لىق ئوقۇغۇچى قوبۇل قىلىش ئىشخانىلىرىدىن سۈرۈشتە قىلسا ياكى ئاپتونوم رايونلۇق ئوقۇغۇچى قوبۇل قىلىش كومىتېتى ئىشخانىسى بېكىتكەن تور بېكەتلىرىدىن كۆرسە بولىدىكەن. ئوقۇغۇچى ۋە ئاتا- ئانىلار ئوقۇغۇچى قوبۇل قىلىشقا ئالاقىدار قانۇنسىز قىلمىشلارغا يولۇققاندا ياكى ساختا قوبۇل قىلىنىش ئۇقتۇرۇشىنى تاپشۇرۇۋالغاندا ئاپتونوم رايونلۇق ئوقۇغۇچى قوبۇل قىلىش كومىتېتى ئىشخانىسىنىڭ پاش  قىلىش تېلېفونى (8758128-0991) غا تېلېفون بەرسە بولىدىكەن.