ئابدۇرېھىم زۇنۇن: ئۇيغۇر قىزى

ئابدۇرېھىم زۇنۇ · ۋاقتى: 2012-4-4 12:49:19


	بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2012-5-11 15:59

ئابدۇرېھىم زۇنۇ · ۋاقتى: 2012-4-5 00:55:09


	ئانا تىلىم ئانا تىل ــ گۆھەر تىلىم، ھەسەل ــ تىلىم، قەدرىڭگە ئەجەب بالدۇر يەتمەپتىمەن. بىلمىگەچ نادانلىقتا قىممىتىڭنى، ئۆمۈرلۈك تىلتۇمارىم ئەتمەپتىمەن! ئۆرتەنگەن چاغدا يۈرەك «ئاھ، ئىسىت!» دەپ، پۇشايمان يەپ، چىشلىدىم بارمىقىمنى. سۆزلىدىم قۇش تىلىدا، سېنى تاشلاپ، ئۇنتۇماق بولدۇم ئۇلۇس، ئايمىقىمنى... نەپرەتكە كۆمدى كىملەر، قارغىش ئالدىم، ئەركىمنى بوغقاندا بۇ گاجگۇن پەلەك. باغلىدى «ئۆيگە...» دېگەن تىلىمغا ئات، تىتىلىپ تىلىم-تىلىم بولدى يۈرەك. قىسمىتىڭ ياكى شۇنداق تەتۈرمىدى، يا مېنىڭ قۇت-تەلەيىم شورلۇقمۇ بەك؟! دەيتۇققۇ: «ئىپادىلىك تىل بۇ» سېنى، نە ئۈچۈن بۈگۈن ساڭا قويۇلدى چەك؟ ※ ※ ※ ※ ※ خىيالىم تىزگىنىنى قويۇپ بەردىم، تارىخنىڭ سەمەرىلىك بەتلىرىگە. پۈتۈلدى ئىزىم قۇرغا شان-ئۇتۇقتىن، سىن بەردى ئۇنىڭ ئورۇق ئەتلىرىگە. شۇ قۇرلار بەردى ماڭا قۇدرەت، كامال، ئاڭلىدىم بوۋايلاردىن لەۋزى ھېكمەت. تەختىمدە بىر ئۆزۈڭ شاھ سەلتەنەتلىك، سەن بىلەن تاپتىم يۈكسەك قەدىر-قىممەت. تۈگۈچلەر تېپىپ سەندە تەبىر-يەشمە، ھېكمەتلەر دىل قېتىمغا ئويۇلدى چىڭ. رەقىپلەر يۈرىكىدىن تېشىپ تەشمە، يەتكۈزدۈڭ قېرىنداشقا ھىممەت مىڭ-مىڭ. ھىممىتىڭ، قۇدرىتىڭدىن قىممەت تېپىپ، ياماشتىم شان-زەپەرلەر داۋانىغا. كۈنسېرى چىڭىپ باردى قانات-بازىم، شۇڭغۇدۇم يىتۈكلىكنىڭ پايانىغا. قېنىم سەن، تومۇرۇمدا ئېقىۋاتقان، سۆيگۈمدۇر ئۆركەشلىگەن سەل-قىيانى. ئويۇلدى سەندە قەلبىم بەتلىرىگە، ئەل-يۇرتنىڭ قان-ياشلىق ھەر دەرد-پىغانى. ھەر ئۈگە، ھۈجەيرەمگە سىڭىپ كەتتىڭ، قىلمايمەن بىر سېنى تەڭ ھېچنېمىگە. سەن كېپەك ئالتۇن كەبى چېچىلغاننى جەم قىلدىڭ ھەم چىقاردىڭ بىر كېمىگە... قەدرىڭگە يەتتىم قەدرىڭ ئۆتۈلگەندە، ھەممىدىن تىلىم ــ مۈلكىم يۈكسەك،-دېدىم. ئۇلايدۇ دىلنى دىلغا تۇتاشتۇرۇپ، كۆڭۈللەر قېتىغا چىڭ پۈكسەك،-دېدىم. بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2012-6-4 23:47

ئابدۇرېھىم زۇنۇ · ۋاقتى: 2012-4-5 12:30:32


	تىل ئۈزۈندىلىرى ئادەمىي ئادەم پەزىلەت، تىل بىلەن، ئەل ئارا تەرغىبى ھېكمەت تىل بىلەن. تىلنى جارى قىلغۇلۇق ھەق-راست ئۈچۈن، ئەكسى ھالدا ھەممە ئىللەت تىل بىلەن. ※ ※ ※ ※ تېگىشمەيمەن ئانا تىلنى ئالتۇنغا، مەن ــ پەرۋانە، ئامراق شۇ ئوت-يالقۇنغا. پۈتمەس بايلىق ھەر كىشىگە ئۆز تىلى، ئۇ ئوخشايدۇ مۇزىكىغا، شاۋقۇنغا... ※ ※ ※ ※ نەق كېكەچ، گاچا مەن، تىلىم بار تۇرۇپ، پۇساپىر-غېرىب مەن، ئېلىم بار تۇرۇپ. ياتلارغا كۆز تىكسەم كور بولسۇن كۆزۈم، مېھرىبان ئانامدەك ئېلىم بار تۇرۇپ. ※ ※ ※ ※ تەڭداشسىز ـــ بىباھا بايلىقتۇر بىلىم، «بىلىم» دەپ يۈرىكىم بولدى مىڭ تىلىم. مەن ئۈچۈن ئەڭ كاتتا بىلىم شۇ ھامان، ھەممىنى تونۇتقان بۇ ئانا تىلىم. بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2013-5-11 19:36

مېھرىگىياھ · ۋاقتى: 2012-4-5 14:22:18


	ئۇيغۇر تىلى ھەققىدىكى شېئىردىن بەكمۇ سۆيۈندۈم .ئۇيغۇر قىزىنىمۇ شۇنداق يۈكسەكلىكتە كۆردۈم .ئۇستازغا تەشەككۈرلەر بولسۇن .

مۆلجەرى · ۋاقتى: 2012-4-5 14:35:47


	سۆيۈندۈم. ئەپسۇس، سەرلەۋھىگە كىرىشتۈرۈلگۈن سۈرەتتىكى ئۇيغۇر قىزى بېشىغا چىمەن دوپپا، ئۇچىسىغا ئەتلەس كۆينەك كىيىۋالغان بولسا يەنە قانچە سۆيۈملۈك بولار ئىدى-ھە؟! بۇ قىز تېگى-تېگىدىن دىيانەت، شەرمى-ھايا ۋە مېھىر-مۇھەببەت تۆكۈلۈپ تۇرىدىغان ئىشچان، ئاقكۆڭۈل ئۇيغۇر قىزىغا ئەمەس، 21-ئەسىردىكى ئارتىسلىرىمىزغا ۋەكىللىك قىلىدىغاندەك تۇيغۇ بېرىدىكەن. مۇشۇنداق تېمىلار پۈتۈن دۇنياغا تارقلىلاتتى، ئەتتەڭ...

ئابدۇرېھىم زۇنۇ · ۋاقتى: 2012-4-6 12:13:57


	سۆيۈندۈم. ئەپسۇس، سەرلەۋھىگە كىرىشتۈرۈلگۈن سۈرەتتىكى ئۇيغۇر قىزى بېشىغا چىمەن دوپپا، ئۇچىسىغا ئەتلەس كۆينەك كىيىۋالغان بولسا يەنە قانچە سۆيۈملۈك بولار ئىدى-ھە؟! بۇ قىز تېگى-تېگىدىن دىيانەت، شەرمى-ھايا ۋە مېھىر-مۇھەببەت تۆكۈلۈپ تۇرىدىغان ئىشچان، ئاقكۆڭۈل ئۇيغۇر قىزىغا ئەمەس، 21-ئەسىردىكى ئارتىسلىرىمىزغا ۋەكىللىك قىلىدىغاندەك تۇيغۇ بېرىدىكەن. مۇشۇنداق تېمىلار پۈتۈن دۇنياغا تارقلىلاتتى، ئەتتەڭ... ـــــ-----------------------ـــــــــــــــــــــــــــــــ ئىنىم مۆلچەرى، ئالدى بىلەن سىزگە ئېھتىرامىم يېتىپ بارغاي! بۇ شېئىرلىرىمنىڭ سىزنى سۆيۈندۈرگىنىدىن مەنمۇ سۆيۈندۈم. ئەمدىكى گەپ، بىزنىڭ ئەنئەنىۋى كىيىم-كېچەكلىرىمىز پەقەت سەھنىلەردىلا قالدى. شۇڭا، كۆپىنچە ھاللاردا شۇ سەھنە كىيىمى كىيگەنلەرنى كۆرگەندە، ھە مۇنداق كىيىملىرىمىز بار ئىكەن-دە، دەپ ئېغىزىمىزنى ئېچىلپ قېلىش بىلەن كۇپايىلەنمەكتەمىز... بۇ سۈرەتنى ئىنىمىز يانغىن يوللاپ قولۇپتۇ. ئۇنىڭغا رەھمەت! سىز دېگەندەك، بۇ قىزنىڭ بېشىدا دوپپا بولغان بولسا تېخىمۇ گۈلىگۈلىگە كەنگەن بولاتتى. ئەپسۇس، مىڭ ئەپسۇس...!

ئابدۇرېھىم زۇنۇ · ۋاقتى: 2012-4-6 20:11:33


	گۆھەر سازىم گۆھەر سازىمنى ئىلكىمگە ئېلىپ چالسام، كېتەر بۇلبۇل كەبى سايراپ، ئىلىپ چالسام؛ ئۇنى مەيلى ئۇرۇپ، سىيرىپ، چېكىپ چالسام، بېرەر زوق دىلغا گەر ئىشتىن كېلىپ چالسام، داۋا دەردكە يۈرەكنى مىڭ تىلىپ چالسام. دىلىمدىن ئۇرغىسا ئىشق، ساز بولۇر تەييار، ماڭا شاد ياندىشار يارىم بولۇپ خۇشتار، غەزەل-كۈي بېغىدا ئوغلۇم-قىزىم يايرار، قولۇمدا ساز كىرىپ تىلغا، خۇشال سايرار، گۈزەل گۈلزاردا شوخ سەيلە قىلىپ چالسام. جاراڭلار ناخشا، ساز ئىش قاينىغان يەردە، ئاڭا سۆيگۈ - مۇھەببەت بار ئايال- ئەردە، دېمە: قىممەت پەقەت گۆھەر بىلەن زەر...دە، شۇ قىممەت بىل، تۆكۈلگەن چىن ھالال تەردە، چىقار ھاردۇق، شۇ تەر قەدرىن بىلىپ چالسام. بوۋام چەككەندە زەرتارنى بولۇپ ھەيران، پىراقىدا پىغان چەككەن ئىدىم ھەر ئان؛ خۇشال بولغان، ئەلەم تارتقاندىمۇ چالغان، كۆڭۈل سۆيگەچ ئۇنى كۆپ تاللىغان، ئالغان، خۇشالمەن، بىر ئۆمۈر ھەمراھ قىلىپ چالسام. ماڭا سازىم بېغىشلاپ كەلدى كۈچ، غەيرەت، ئاڭا كۆيگەچكە مەن، بەردى جاھان رىغبەت، دېدى ئابدۇرېھىم ئەلدىن تېپىپ ھۆرمەت : تىلە دوستلارغا چىن دىلدىن ۋىسال، شۆھرەت، تىلەكلەر بەھرىدە مەڭگۈ ئېقىپ، چالسام. بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2013-5-11 19:37

ئابدۇرېھىم زۇنۇ · ۋاقتى: 2012-4-7 17:06:47


	ئانا تىل ئانا تىل بىلگەن كىشىنىڭ ئىززىتىن قىلغۇم كېلۇر، ئانا تىلنى ئاغزىدىن ئالتۇن بېرىپ ئالغۇم كېلۇر. ـــ قۇتلۇق شەۋقى تاجۇ تەختىم، دۆلىتىم سەن ئانا تىل، كۈچ - مادارىم، سۆلىتىم سەن ئانا تىل، بار بىساتىم ـــ دەۋلىتىم سەن ئانا تىل، قوۋم- قېرىنداش – مىللىتىم سەن ئانا تىل، بارلىقىم، مەۋجۇتلىقىم سەن ئانا تىل. سەن بىلەن ھەل بار ئىشىم، تىكتۇر بېشىم، سەن بىلەن تاتلىق يېگەن نانۇ ئېشىم، سەن بىلەن ئاۋات بازار ئەتراپ- قېشىم، سەن بىلەن ئۆتتى خۇشال يازۇ قىشىم، شادلىقىم، شان- شەۋكىتىم سەن ئانا تىل. سەن ئىلىم ئالماشتۇرۇشتا كۆۋرۈكىم، سەن بېرىپ كۈچ، روھ كۆتۈرگەن تۈۋرۈكىم، سەن يۆلەك بولغاچ، سوقار شاد يۈرىكىم، سەن مېنى قىلغان ئۆرە قان، يىلىكىم، تەندە جانىم، رىغبىتىم سەن ئانا تىل. كۈلدى دىل، چىقتى ساۋاتىم سەن بىلەن، تاپتى مول مەنە ھاياتىم سەن بىلەن، قاتتى پەرۋازدا قاناتىم سەن بىلەن، ئارتتى كاللامدا بىساتىم سەن بىلەن، پەن- بىلىمگە دەۋىتىم سەن ئانا تىل. سەن غۇرۇرۇم، ئىپتىخارىم، جۈرئىتىم، سەن قورال تۇرمۇش جېڭىدە، شاش ئېتىم، سەن يۈرەك، روھىمغا سۇلتان، شىددىتىم، سەن گۆھەر، زەر خەزىنىسى، ئۇز زۇمرىتىم، بايلىقىم ھەم شۆھرىتىم سەن ئانا تىل. سەن بىلەن ئەل ئەيلىدى پەرۋاز داۋام، بولدى جارى سەن بىلەن ناخشا- مۇقام، سەن بىلەن تاپتى بىھەد شۆھرەت ئاۋام، سەن بىلەن سايرىدى ئۇز ھەقدار بالام، مەڭگۈ ئۆڭمەس ھۆججىتىم سەن ئانا تىل. بولغۇسى قەدرىم پاخال سەن بولمىساڭ، يەتكۈسى ئاپەت، ۋابال سەن بولمىساڭ، بولمىغاي دىللار خۇشال سەن بولمىساڭ، يوق ئەقىل، تەندە ماجال سەن بولمىساڭ، كۈچ-مادارىم، ھەيۋىتىم سەن ئانا تىل. بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2013-5-11 19:39

ئابدۇرېھىم زۇنۇ · ۋاقتى: 2012-4-8 18:24:19


	رىۋايەت شاماللارغا يەم بولدى ئۇچۇپ نۇرغۇن رىۋايەت، قالدى بىزگە جۇلالاپ ئەبەدىيلىك چىن مىراس. ئۇلۇغ ئەجداد روھىنىڭ جەۋھىرى دەپ بىل ھامان، ئۇ بوۋىلار يىلتىزى، لەۋھە قىلىپ تۆرگە ئاس! بىر ھەقىقەت ئاڭلىدىم، ھېكمەتلەرگە لىق تولغان، ھاياتلارغا ئۆمۈرلۈك ئاچچىق ساۋاق بولغىدەك؛ ياخشىلارنى ئۈندىسە ياخشىلىققا ھەر قاچان، يامانلارنىڭ ئۆرتىنىپ ئىچى دەردكە تولغىدەك. ئاڭلاپ قويۇڭ زەن سېلىپ، ئېيتىپ بېرەي، بۇرادەر، رىۋايەت بۇ، گاھ كۈلۈپ، گاھى قاپاق تۈرگىدەك. بىر كۈن گۇناھ–ساۋابى تەڭ بىر بەندە كۆز يۇمۇپ، ئاۋۋال كىرىپ دوزاخقا ماۋۇلارنى كۆرگىدەك: داش قازاندا ۋاراقشىپ گۆشلەر قايناپ تۇرغىدەك، باشلىرىدا مەي باغلاپ پىشقان مېۋە ساڭگىلاپ... ھەر بىرىنىڭ قولىدا سېپى ئۇزۇن بىر چۆمۈچ، يەتكۈزەلمەي ئاغزىغا يۈرەر ئىمىش گاڭگىراپ… گۆش يەپ، شورپا ئىچەلمەي يا بىر مېۋە ئۈزەلمەي، كېتىپتۇدەك كوركىراپ قورساق، چىراي سارغىيىپ. مېھىر-شەپقەت، ئۆم-بىرلىك بولمىغاننىڭ ئۈستىگە يۈرىشەرمىش بۇقىدەك بىر-بىرىگە ئالىيىپ… قەرەلىنى توشقۇزۇپ قايتىپ چىقىپ جەننەتكە، نەزەر سالسا، بۇ يەردە دوزاختىكى ھالەت يوق. قويغىدەكمىش يېگۈزۈپ بىر-بىرىگە گۆش، پولۇ…، ئەزگۈ نىيەت بەھرىدىن يايرار ھەممە خۇشال، توق. ھەسەتسىز، شاد يۆلىشىپ، مېۋە ئۈزۈپ يېگىدەك، ھەمكارلىشىپ ئۆزئارا تىكەنلەرنى يۇلغىدەك. شادلىق جىلۋە قىلارمىش چىرايلاردىن نۇر يېغىپ، بىر-بىرىگە چىن يۆلەك ھەم قول–قانات بولغىدەك. دوزاخ بىلەن جەننەتنىڭ پەرقى پەقەت شۇ ئىكەن: چىقارغان بىر يەڭدىن قول، بىر ياقىدىن باش ئۇلار. زىتلىق بىلەن ئارىغا تېرىپ جېدەل ــ شۇم تىكەن، قورسىقى ئاچ، ئاھ ئۇرۇپ چاينار ئىمىش تاش بۇلار. ئايان بولدى ئەينەكتەك بىر ھەقىقەت بۇنىڭدىن: ئاقىل بىلەن ياخشىغا ئىككى ئالەم ئاسايىش. قىتىغۇرلۇق، يامانلىق قىلغان رەزگىي ئەرۋاھلار، تەييارنىمۇ يېيەلمەي، ئىچەلمەي ئاھ ئۇرارمىش… بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2013-5-11 19:40

ئابدۇرېھىم زۇنۇ · ۋاقتى: 2012-4-9 18:37:21


	قىرىق يىل چىن يۈرەكتىن بىر قىزنى سۆيۈپ كەلدىم قىرىق يىل، ھۆل چىۋىقتەك تولغىنىپ پۇچىلاندىم ئوتىدا. گاھ يۈز ئاچتى، گاھ مۆكتى بۇلۇت توسقان ئاي بولۇپ، پاك سۆيگۈمنى ساقلىدىم «كۆڭۈل» ئاتلىق قۇتىدا. بولغاچ ئاڭا قەلبىمدە چىن ئېتىقاد، ئەقىدە، رىغبىتىدە ياشىدىم ئۈمىد بىلەن ھەر قاچان. لەۋ جامىدا مەي ئوتلاش ئەمەس ئىكەن بىل، ئاسان، گاھ شادلاندىم، گاھىدا بولدى كۆڭلۈم پەرىشان. ئۇ ــ چىراغ، مەن ــ پەرۋانە بولۇپ ئوتتا پۇچۇلدۇم، ياشلىق گۈلۈم قىرچىلدى، ئېكەكلەندى ھەر دەم جان. ناۋا قىلدىم بۇلبۇلدەك كۈن ـ تۈن شۇ گۈل ئىشقىدا، ئۆكۈنمىدىم، بولسىمۇ بەدەل تۆلەپ باغرىم قان... باغلانغاچقا دىل رىشتىم ئاشۇ قىزغا چەمبەرچاس، ئۇ ئالدىمدا جىلمايسا، مەنمۇ تاتلىق كۈلىمەن. ئۇ ــ ئاي، مەن ــ كۈن، قوغلىدىم ۋىسال تىلەپ قىرىق يىل، قىز ــ شېئىر، مەن ھەر قاچان ئاڭا كۆڭۈل بۆلىمەن. بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2013-5-11 19:42

ئابدۇرېھىم زۇنۇ · ۋاقتى: 2012-4-11 00:04:28


	يادنامە ــ شائىر روزى سايىت ۋاپاتىنىڭ بەش يىللىقى مۇناسىۋىتى بىلەن روزانكا، نامىڭىز بار ئەل دىلىدا: «كاتتا شائىر...»، دەپ، «ئۇلۇغ دېھقاننى كۈيلەشكە ئىدى ئۇ بەكمۇ ماھىر»، دەپ. «نەزم ئىشقىدا پەرۋانە كەبى كۆيگەچ كېچە-كۈندۈز، ئۇنىڭدىن قالدى يادنامە بولۇپ يەتتە جاۋاھىر»، دەپ. قەلەم تۇلپارىڭىز چاپچىپ تۇراتتى، سىز دېۋىتكەچكە: «شېئىر – زۆھرە، مانا مەن دەل ئۇنىڭ ئىشقىدا تاھىر»، دەپ. قىزىيتتى ئەنجۈمەن، سورۇن، چىقىپ ئەۋجىگە شاد كۈلكە، ئالاتتۇق سىزنى ئەلقىسسە «ھەزىل- چاقچاققا ماھىر»، دەپ. ئېچىلسا ئاغزىڭىز، ھاڭ-تاڭ قالاتتى ئەھلى سورۇن، راست، مانا تەرىپلىشەر ئەل- يۇرت: «ئىدى دىل، پىكرى زاھىر»، دەپ. تۆكۈپ ياش ھەم كۈلۈپ دېھقان بىلەن تەڭ، كۆڭلىنى ئۇتقاچ، ئاۋام يادلايدۇ سىزنى: «ئۇ ئىدى بەك ياخشى كادىر»، دەپ. بۈگۈن ھەممە ئېغىزلاردا مۇبارەك نامىڭىز زىكرى، ئەدىبلەرمۇ دېمەكتە:«ئۇ كۆيۈمچان، پىر مۇھەررىر...»، دەپ. ئاسانمۇ ئەل دىلىدىن شۇنچىلىك چوڭقۇر ئورۇن ئالماق؟ سېغىنغاچ ھەممە سەپ ئېيتتى: «ئۇ كۆپ ئىشلارغا قادىر...»، دەپ. ئېغىزدىن چۈشمىدى، چۈشمەس، ئەبەدكە نامىڭىز ئۆلمەس، بىلەر ئەل – يۇرت قەبلەردە «بۇ شائىر مەڭگۈ زاھىر»، دەپ. 2006.12.2 بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2012-5-11 16:08*

ئابدۇرېھىم زۇنۇ · ۋاقتى: 2012-4-13 11:54:34


	بەزىلەر ئەمەلدارنىڭ كەينىدىن چىقمايدىكەن بەزىلەر، ياخشىلارنى پىھاندا تىللايدىكەن بەزىلەر؛ ئارامخۇدا ئولتۇرۇپ غىزا يېمەي بىر قېتىم، «كىم، نېمىگە ئامراق؟» دەپ خىللايدىكەن، بەزىلەر. كۆڭلى تىنماس كىمنىدۇر كۈندە يوقلاپ تۇرمىسا، تەخسە يالاپ، بىكارغا قورساق توقلاپ تۇرمىسا، «قورالى» نى بىراۋغا بەتلەپ، ئوقلاپ تۇرمىسا، شۇ رەۋىشتە يۈرەكنى تىلغايدىكەن، بەزىلەر. «باشلىقى»نى پۇقرادىن قورۇيدىكەن ئۆزىچە، ياخشىلارنى يامانغا جورۇيدىكەن ئۆزىچە، قۇت-بەختىڭنى شامالغا سورۇيدىكەن ئۆزىچە، «ئۆز سېپى»گە بىزدەكنى قاتمايدىكەن، بەزىلەر. ئەل ئوتىدا تەڭ كۆيۈپ، سۇلىرىدا ئاقسا كىم، ھەق نىشاندىن ئاداشماي، ئەل كۆڭلىگە ياقسا كىم، «ئەل رايى بەك ئۇلۇغ» دەپ، خۇش نەزەردە باقسا كىم، ئاڭا يامان كۆز بىلەن قارايدىكەن، بەزىلەر. ئاقنى قارا، قارىنى ئاپپاق قىلىپ سۆز قېتىپ، پەسنى ئېگىز، ئېگىزنى پەس كۆرسىتىپ، گەپ سېتىپ، ھەريان بېقىپ مولۇندەك، يولنى توراپ، موك يېتىپ، ئەل - ئاۋمنىڭ رىزقىنى بۇلايدىكەن، بەزىلەر. «باشلىق بىلەن يېقىن مەن» دەيدۇ ھەرئان پەش قىلىپ، دېمىگەننى «دېدى» دەپ، كېلەر بىرنى بەش قىلىپ، غىڭشىپ قاشاڭ چىۋىندەك، كۆڭۈللەرنى غەش قىلىپ، «ئاكام» بار دەپ، جاھانغا پاتمايدىكەن، بەزىلەر. ئەگەر كۈندە نەچچە رەت «سالام» قىلىپ تۇرمىساڭ، دۇمبىقىنى چىڭىتىپ، ھەردەم چېلىپ تۇرمىساڭ، ھەپتىدە بىر قوي سويۇپ، داسقان سېلىپ تۇرمىساڭ، يار لېۋىگە ئاپىرىپ، قىستايدىكەن، بەزىلەر. پايدىسىغا گەپ قىلساڭ، ئۇرۇپ قويار دولاڭغا، تېگىپ قويساڭ چىشىغا، «ئورغاق سالار ئارپاڭغا»، دام - توزاقلار قۇرىدۇ ھەتتا داغدام يولۇڭغا، قولىدا بار چاغدا «ياغ چاينايدىكەن»، بەزىلەر. «چوڭ»نى كۆرسە ئېگىلىپ، ئەل-ئاۋامغا گېدىيىپ، «كۈچلۈك»لەرگە ھېجىيىپ، ئاجىزلارغا تاش ئېتىپ، يۈرۈپ ھەرخىل سورۇندا بەلنى تولغاپ، نازلىنىپ، غۇرۇرىنى ئاشۇنداق بۇلغايدىكەن، بەزىلەر. ئەگەر باشلىق ئالماشسا، يۆتكەر دەرھال خوتىنى، پالاقلايدۇ ھەرياققا يوقىتىپ ھوش - خۇدىنى، ئەۋەتىلەر «سالام»غا ھەتتا جۈپتى - خوتۇنى، ئۇشبۇ يولدىن ھەرگىزمۇ تايمايدىكەن، بەزىلەر. ئىشقا سېلىپ «ئەقلى»نى، بۇراپ ھەريان رولىنى، بىلىۋالغان تولۇقى بىلەن ئىشنىڭ يولىنى؛ كېلە كەبى سۈمۈرۈپ ناپاقلىقنىڭ نۇرىنى، گويا كەڭرى «يايلاقتا يايلايدىكەن»، بەزىلەر. قىڭغىر ئىشنىڭ سورىقى قىرىق يىلغا كەتمەيدۇ، كەسلەنچۈكنىڭ ئايىغى چىمەنلەرگە يەتمەيدۇ، ئەل-ئاۋامنىڭ كۆزى كۆپ، ناپاقلىقنى سەتلەيدۇ! توغرا يولنى ۋاقتىدا تاپمايدىكەن، بەزىلەر. بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2012-5-11 16:09

ئابدۇرېھىم زۇنۇ · ۋاقتى: 2012-4-13 19:07:44


	بولساڭمۇ تەمەننادىن يىراق تۇر، شاھى جاھان بولساڭمۇ، ئەلگە كىبىر كۆرسەتمە ماھىتابان بولساڭمۇ. ئۇدۇم بىزگە ئەزەلدىن مېھرىبانلىق، سادىقلىق، ھىممەتلىك بول، كەمتەر بول خانغا جانان بولساڭمۇ. خەلقىم ــ دېڭىز، سەن ــ بېلىق، سۇسىز بېلىق نە قىلسۇن، قۇچىقىدىن ئايرىلما، نۇرلۇق چولپان بولساڭمۇ. ھەرنە قىلسا ئەل قىلدى، توققۇزۇڭنى تەل قىلدى، چانما ھەرگىز ئەسلىڭدىن، ئېگىز ئاسمان بولساڭمۇ. ئەل كۆزىنى ياشلىما، ئۆرتەپ ئوتقا تاشلىما، چىڭگىزخاندەك ئات چېپىپ شەھەر ئالغان بولساڭمۇ. قارا، تەكشى نۇر چاچار كۆكتە يۇلتۇز، ئاي، قۇياش، مەغرۇرلانما چۆللەرنى بوستان قىلغان بولساڭمۇ. سەككىز جەننەت ھۆرلىرى خىزمىتىڭدە بولسىمۇ، ئەلنى ئەستىن چىقارما «ۋالىدە خان» بولساڭمۇ. كۈچ-قۇۋىتىڭ خورايدۇ، مال-بىساتىڭ تۈگەيدۇ، ئەلنى «ئۇلۇغ» بىل ھامان داڭقى داستان بولساڭمۇ. قارا تۇپراق قوينىغا كىرمەيدىغان كىشى يوق، تۆھپەڭ بولسا يادلار ئەل، ئاددىي ئىنسان بولساڭمۇ. بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2012-5-11 16:10

ئابدۇرېھىم زۇنۇ · ۋاقتى: 2012-4-14 17:06:28


	تايماس ئەقىدە مېنى كۆككە يۆلىدى تايماس ئىخلاس-ئەقىدەم، ئالەمچە شان، قۇت تاپتىم شۇ يولۇمدا ھەر قەدەم. تاۋلىغاچقا مۇھەببەت، ئېشىپ باردى ئىرادەم، ئېگىلمەيمەن، سۇنمايمەن باسسىمۇ گەر دەردۇ غەم. ئىجاد ئىشقى يۈرەكتە لاۋىلدىغاچ گۈلخاندەك، شېئىر ئۈندى قەلبىمنىڭ دالاسىدا ئارماندەك. ماڭلىيىمدا كۈمۈش تەر پارلاپ ئۈنچە-مارجاندەك، چاچتى نۇر ۋە يورۇقلۇق كۆڭۈللەرگە چولپاندەك. ھاياجاندىن كۈۋەجەپ تومۇرۇمدا ئىسسق قان، سىڭىپ كەتتى گۈزەللىك، پارلاقلىققا قۇت يولۇم. ھېكمەتلەردىن بال يىغىپ، ئەلگە سۇندۇم ھەر قاچان، چۆلنى بوستان ئەيلىدى قەلەم تۇتقان بۇ قولۇم. قانات يېيىپ مۇددىئا، ھەردەم جەڭگە چىللىدى، ئەدەپ بىلەن يول ئالدى مەنزىل تامان ئىستىكىم. يۈگۈرگەن روھ توختىماي يېڭى تېما ئىزلىدى، ئارمانلىرىم قانمىغاچ ئەلەم بولدى كىملىكىم. كىتابىنى ئۆمرۈمنىڭ ئۆرۈپ يىللار شامىلى، بەتلىرىنى سارغايتىپ، رەڭلىرىنى ئۆچۈردى. بىل، يوق ئۇنى توراشقا ھېچ ئىنساننىڭ ئامالى، ئەمما خەلقىم يۈرەككە ئۇلۇغ ئوتنى كۆچۈردى. ئارمانلىرىم ھامىلىدار بولدى يېڭى ئارمانغا، يۈرىكىمنى ئوينىتىپ تۇرار قاتار كۆپ سوراق... كەچۈرمىشتىن پۈتكەن روھ سىڭدى دىلغا، ساپ قانغا، ئىزلىرىمدىن سانسىز گۈل ئۈنۈپ، چاچتى خۇش پۇراق. ئەل قەلبىگە يىلتىزلاپ، ئۆستۈم مەزمۇت چىناردەك، باش ئەگمىدىم كەلسىمۇ ھۇۋلاپ پەيلى جۇدۇنلار. نۇر ئېمىپ ئەل ـــ قۇياشتىن جۇتنى سۈردۈم باھاردەك، زەپەر قۇچتۇم ھەر جەڭدە، مەدەت بولغاچ ئۇدۇمللار... ماڭا كۈلۈپ باقماقتا ئىقبال بۇلبۇلگوياسى، قولدا قەلەم قىلىچىم، جەڭگاھ تامان ئات سالدىم. لەڭ ئۇردى پاك قەلبىمدە ۋاپا، مېھنەت دەرياسى، ئەقىدەمدىن، ئەجرىمدىن پارلاپ كەتتى كۆز ئالدىم! بۇ يازمىنى ئاخىرىدا ئابدۇرېھىم زۇنۇ تەھرىرلىگەن. ۋاقتى 2012-5-11 16:12

ئابدۇرېھىم زۇنۇ · ۋاقتى: 2012-4-15 11:16:34


	ئىنىم ئوت ماكانى، بۇ خەتنى بەك ياخشى لايىھەلەپ چىقىلسىز. شېئىرىمغا باشقىدىن جان كىرىپتۇ. شۇ قوللىرىڭىزغا دەرد كەلمىسۇن! سىزگە كۆپتىن كۆپ رەھمەتلەر يېتىپ بارسۇن!

ئابدۇرېھىم زۇنۇن: ئۇيغۇر قىزى

شېئىر ـــ روھنى كۆكلىتىدىغان تۇپراق ۋە بۇلاق سۈيى.