جۇڭشىن ئاگېنتلىقىنىڭ 1-ئاينىڭ 7-كۈنى بېيجىڭدىن بەرگەن تېلېگراممىسى، جۇڭگو گوۋۇيۈەن تەرەققىيات تەتقىقات مەركىزىنىڭ مۇئاۋىن مۇدىرى ليۇۋ شىجىن مۇنداق دېگەن، ھازىر جۇڭگو بەلكىم بىر ئېشىش باسقۇچىنىڭ ئالمىشىش مەزگىلىدە تۇرۇۋاتىدۇ، 30 نەچچە يىلدا ئوتتۇرىچە سۈرئىتى %10 تىن ئاشقان ئېشىش مەزگىلىنى بېسىپ ئۆتۈپ، ھازىر ئېشىش سۈرئىتى ئاستىلاپ، يۇقىرى سۈرئەتتە ئېشىشتىن ئوتتۇرا سۈرئەتتە ئېشىشىغا ئالماشماقتا.

ليۇۋ شىجىن 7-چېسلادىكى 5- نۆۋەتلىك خەلقئارا پۇل-مۇئامىلە بازىرى ئانالىز يىللىق يىغىنىدا ئىپادە بىلدۈرگەن. ليۇۋ شىجىن ئۇنىڭدىن كېيىنكى ئىككى ئۈچ يىلدا، جۇڭگو ئىقتىسادىنىڭ ئېشىش سۈرئىتى تەخمىنەن %8 بولىدۇ، ئۇنىڭدىن كېيىن ئېشىش سۈرئىتى %7-%6 گىچە تۆۋەنلىشى مۇمكىن، خەلقئارا نۇقتىدىن قارىغاندا، بۇ ئېشىش سۈرئىتى يەنىلا خىلى يۇقىرى سۈرئەت ھېسابلىنىدۇ، ئەگەر مۇشۇ سۈرئەتنى 10 يىل ساقلىيالىسا، جۇڭگو بەلكىم « ئوتتۇرا كىرىم قىلتىقى»دىن قۇتۇلالىشى مۇمكىن دەپ مۆلچەرلىگەن.

2011-يىلى، جۇڭگونىڭ ئېكسپورت، مەبلەغ سېلىش، سانائەت قوشۇلما قىممىتىنىڭ ئېشىش سۈرئىتى قاتارلىق كۆرسەتكۈچلىرىدە ئومۇميۈزلۈك ئاستىلاش كۆرۈلگەن. ليۇۋ شىجىن مۇنداق كۆرسەتكەن، 2011-يىلى، ئاساسىي مۇئەسسەسىگە مەبلەغ سېلىشنىڭ ئومۇمىي سېلىنغان مەبلەغ ئىچىدىكى ئىگىلىگەن نىسبىتى ئالدىنقى يىلىدىكى %30 تىن %20 گە تۆۋەنلىگەن، دېڭىز ياقىسىدىكى ئىقتىسادىي چوڭ ئۆلكە گۇاڭدۇڭ، جياڭسۇ، جېجياڭ، شەندۇڭ قاتارلىق رايونلارنىڭ ئېشىش سۈرئىتى پۈتۈن مەملىكەتتىكى ئوتتۇرىچە سەۋىيىدىن تۆۋەن بولغان، يەرلىك ھۆكۈمەتنىڭ مەبلەغ يۈرۈشتۈرۈش سۇپىسى خەتىرى دىققەتنى قوزغاپ، مەبلەغ سالغۇچىلارنىڭ مەبلەغ سېلىشنىڭ پايدا بېرىش يوشۇرۇن كۈچىگە بولغان ئەندىشىسىنى كۆرسەتكەن، يۇقىرىقى ئالامەتلەر جۇڭگونىڭ ئوتتۇرا ئۇزاق مۇددەتلىك ئېشىپ بېرىش يوشۇرۇن كۈچىنىڭ تۆۋەنلىگەنلىكىدىن دېرەك بېرىدۇ.

« بۇنداق ئېشىش سۈرئىتىنىڭ ئاستىلىشى بىر خىل تەبىئىي ئاستىلىشىش ھېسابلىنىدۇ»، ليۇۋ شىجىن ياپونىيە، كورىيە، گېرمانىيە قاتارلىق دۆلەتلەرمۇ ئىقتىسادنىڭ ئۇچقاندەك ئېشىش مۇساپىسىدە ئومۇميۈزلۈك مۇشۇنىڭغا ئوخشاش بىر باسقۇچ مەۋجۇت بولۇپ تۇرغان دەپ كۆرسەتكەن.

ئۇنىڭ مۆلچىرىگە ئاساسلانغاندا، 2012-يىلى، جۇڭگو سودا ئاكتىپ بالانسىنىڭ GDP دىكى ئىگىلىگەن نىسبىتى ئالدىنقى يىلىدىكى %2.3 تىن %1.8 گە تۆۋەنلەيدىكەن، مۇقىم مۈلۈك مەبلىغىنىڭ ئېشىش سۈرئىتى %24 تىن %20 گە تۆۋەنلەيدۇ، ئىجتىمائىي ئىستېمال بۇيۇملىرىنىڭ پارچە سېتىلىش ئومۇمىي مىقدارى %12 تىن %14 گە ئۆرلەيدۇ. GDP نىڭ تۆۋەنلەش يۈزلىنىشى ئىككىنچى پەسىلگە كەلگەندە مۇقىملىشىپ، مەملىكەتلىك ئېشىش سۈرئىتى %5.8 بولىدۇ دەپ مۆلچەرلەنگەن.

ئۇ «جۇڭگونىڭ ئىچكى قىسمىدىكى ئېنىقسىزلىقنىڭ ئاساسلىق كېلىش مەنبەسى ئۆي-مۈلۈكنىڭ قىسقا مۇددەتلىك تۆۋەنلىشىنىڭ بانكا ۋە يەرلىك مالىيىگە ئېلىپ كەلگەن زەربىسى، ئۇنىڭدىن باشقا، يېقىندا يەرلىك ھۆكۈمەتنىڭ مەبلەغ يۈرۈشتۈرۈش سۇپىسى قەرز قايتۇرۇش يۇقىرى دولقۇنىنى كۈتۈۋالىدۇ، ھەمدە خەتەرگە دىققەت قىلىشقا موھتاج بولىدۇ» دەپ قارىغان.