ئەنگلىيە «مۇھاپىزەتچى گېزىتى» نىڭ 27- دېكابىردىكى سانىدا «ئەنگلىيە دۇكانلىرى جۇڭگولۇق خىرىدارلارنى جەلىب قىلماقتا» دېگەن تېمىدا ماقالە ئېلان قىلىندى، ماقالىدا مۇنداق دېيىلدى: يەر شارىدىكى كۈچلەردە ئاستا- ئاستا ئۆزگىرىش يۈز بېرىۋاتقانلىقىنىڭ نامايەندىسى بولغان جۇڭگو يىنليەن كارتىسى ئانچە ئېتىبارغا ئېلىنمايدۇ، ئەمما سىز خاررودس، سېلفرىدگېس قاتارلىق ئالىي دەرىجەلىك دۇكانلارغا كىرگەن چېغىڭىزدا، نۇرغۇن پۇل يىغىش پۇكەيلىرىدە بۇنى كۆرەلەيسىز، بۇنىڭدىن بۇ دۇكانلارنىڭ جۇڭگودا ئەڭ كەڭ تارالغان بانكا كارتىسىنى قوبۇل قىلىپ، دۇنيادىكى تېز سۈرئەتتە كېڭىيىۋاتقان بىر قانچىلا ئىقتىسادىي گەۋدىنىڭ بىرى بولغان جۇڭگودىن تىرىشىپ پۇل تېپىۋاتقانلىقىنى بىلگىلى بولىدۇ.
جۇڭگو چوڭ قۇرۇقلۇقىدىكى ئىستېمالچىلارنىڭ ھەشەمەتلىك بۇيۇملارنى ياقتۇرۇشى يېڭى ئىش ئەمەس. ئەنگلىيەدىكى دۇكانلار ھازىر نەزىرىنى ئەسەبىيلەرچە پۇل خەجلەۋاتقان جۇڭگولۇقلارغا ئاغدۇردى، ئۇلار شۇ ئارقىلىق مالىيە قىسىش سىياسىتى تۈپەيلىدىن سەزگۈرلىشىپ كەتكەن ئەنگلىيەلىكلەر قالدۇرۇپ قويغان ھاڭنى تولدۇرماقتا. ئەنگلىيەدىكى ساياھەت تارماقلىرى تېخى بايىلا بېيجىڭ ۋە شاڭخەيدىكى تەشۋىقات ۋە سېتىشنى ئىلگىرى سۈرۈش پائالىيىتىنى ئاخىرلاشتۇردى. گەرچە كۆلىمى كىچىكرەك بولسىمۇ، ئەمما جۇڭگو ساياھەتچىلىك بازىرىنىڭ تەرەققىيات سۈرئىتى تېز بولماقتا، ئۇنىڭ ئۈستىگە يۇقىرى دەرىجىلىك ئىستېمال ئەۋج ئالماقتا. ئالدىنقى يىلى ئەنگلىيەگە ساياھەتكە بارغان جۇڭگولۇقلارنىڭ سانى 110 مىڭغا يەتمىسىمۇ، ئەمما يىللىق ئېشىش سۈرئىتى %23 كە يەتتى. پارچە سېتىش سودىگەرلىرىگە نىسبەتەن ئوخشاشلا مۇھىم ئەھمىيەتكە ئىگە بولغىنى، جۇڭگولۇق ساياھەتچىلەرنىڭ خىراجەت ئومۇمىي سوممىسىنىڭ ئېشىش سۈرئىتى تېخىمۇ تېز بولۇپ، %57 كە يەتكەن، ئېنىقكى بۇ يۈزلىنىش يەنە داۋاملىشىدۇ.
ئومۇمىي جەھەتتىن ئالغاندا جۇڭگو ئەنگلىيەگە قارىغاندا خېلىلا نامرات، جۇڭگولۇقلارنىڭ كىشى بېشىغا توغرا كېلىدىغان ساپ كىرىمى ئەنگلىيەلىكلەرنىڭ بەشتىن بىرىدىن ئازراقلا كۆپ. ھالبۇكى، بايلىق ئاساسلىق ھالدا ئۆزىنى كۆز- كۆز قىلىشقا ئامراق جۇڭگو شەھەرلىرىدىكى سەرخىللارنىڭ قولىدىن يىغىۋېلىنىدۇ. گەرچە بۇنداق كىشىلەر توپىنىڭ ئومۇمىي ساندا ئىگىلىگەن نىسبىتى بىر قەدەر ئاز بولسىمۇ، ئەمما بىر مىليارد 300 مىليون جۇڭگولۇق بۇنداق كىشىلەرنىڭ سانى خېلىلا كۆپ قىلىپ كۆرسىتىدۇ. جۇڭگودا ھەشەمەتلىك بۇيۇملاردىن ئېلىنىدىغان باج يۇقىرى بولغاچقا، بۇ دۆلەتتىكى بايلارغا نىسبەتەن چەتئەلدە ساياھەت قىلغان چاغدىكى مال سېتىۋېلىش خىراجىتى خېلى كۆپ سالماقنى ئىگىلەيدۇ.
ساياھەتتە قارشى ئېلىنىش دەرىجىسىدىن قارىغاندا، ئەنگلىيە فرانسىيە قاتارلىق دۆلەتلەرنىڭ كەينىدە تورىدۇ. فرانسىيە داڭلىق ماركىنىڭ جەلپ قىلىش كۈچىگە ئىگە بولغاندىن سىرت، شېنگىن رايونى تەۋەسىدە ۋىزا بىلەن تەمىنلەيدۇ، ئەنگلىيە بولسا ئۆز ئالدىغا ۋىزا تەمىنلەشكە توغرا كېلىدۇ. ئەنگلىيەلىك سودىگەرلەر بۇ نۇقتىنى ھېس قىلىپ يەتكەچكە، ھازىر پۈتۈن كۈچ بىلەن جۇڭگولۇق خېرىدارلارنى قارشى ئالماقتا. بۇ جەھەتتە ئالدىنقى قاتاردا مېڭىۋاتقىنى بىسېستېر مال سېتىۋېلىش كەنتىدۇر، بۇ دۇكاندا خەنزۇچە سۆزلىيەلەيدىغان نۇرغۇن خادىم بولۇپ، ئۇلار جۇڭگولۇق خېرىدارلارغا تازا تونۇش بولمىغان مەھسۇلاتلارنى چۈشىنىشىگە ياردەم بېرىدۇ، يەنى ئەنگلىيەدىكى كىيىم- كېچەكلەرنىڭ رازمىرى قاتارلىقلار. بۇ ھالەت بۇ دۇكاننى مول نەتىجىگە ئىگە قىلىپ، جۇڭگولۇق خېرىدارلاردىن ئالىدىغان پايدىسى باشقا دۇكانلارغا قارىغاندا %80 ئاشتى.
ئەنگلىيەدە خەنزۇچە سۆزلىيەلەيدىغان مال ساتقۇچىلار تولىمۇ كۆپ، خاررودس تۈرلۈك ماللار شىركىتىلا مۇشۇنداق خادىمدىن 70 نەچچىنى تەكلىپ قىلغان. بۇ شىركەتنىڭ باياناتچىسى مۇنداق دېدى: «پەقەت خەنزۇچە سۆزلىيەلەيدىغان بولۇپلا قالماستىن، ئۇلار يەنە باشقا بىلىملەرگە ئېھتىياجلىق، چۈنكى جۇڭگولۇق خېرىدارلار ئادەتتە كەسىپ ئەھلى ھېسابلىنىدۇ.  يەنە بەزى كىچىك ئىشلار، يەنى خادىملارنىڭ خېرىدارلارنى كۈتۈۋېلىش شەكلى دېگەندەك، خادىملارنى كارتىنى قول قوللاپ ئالىدىغان قىلىپ تەربىيەلەش كېرەك، خۇددى سوۋغىغا مۇئامىلە قىلغاندەك. ئۇلار چوقۇم جۇڭگولۇق خېرىدارلارنى قانداق قىلىپ ئۆز ئۆيىدە تۇرۇۋاتقاندەك ھېسسىياتقا كەلتۈرەلەيدىغان بولۇشى كېرەك.»